Den Bybel met groter neersticheyt ghecorrigeert (Liesveltbijbel 1542)

Ahab gheburyct gewelt ouer eenen armen man, ende hy neemt Naboth sinen wijngaert, ende doot hem, Elias straft hem wt beueel des HEREN.

Dat .xxi. Capittel.

[p. *]

1

⁺HEt geuiel in dese gesciedenisse dat Naboth, een Iesreelijt eenen wijnberch had te Iesreel, bi den Paleyse Ahab des conincx tot Samaria,

+ A vers 1

2

ende Ahab sprack tot Naboth ende seyde, gheeft mi uwen wijnberch, ic wilder mi eenen coolhof af maken, want hi so na aen mijnen huyse leyt, ic wilder v eenen beteren wijngaert voor geuen, oft ist dat ghi wilt ic wilder v so veel siluers voor geuen, als hi weert is.

3

Mer Naboth sprac tot Ahab, dat late die HERE verde van mi sijn, dat ic v mijns vaders erffenisse soude geuen.

4

⁺Doen quam Ahab thuys, ongemoet ende thoornich, om des woorts wil dat Naboth die Iesreelijt tot hem hadde geseyt ende gesproken, Ic en wil v mijns vaders erffenisse niet geuen, ende hi viel op sijn bedde neder, ende keerde sijn aensicht om, ende en adt gheen broot

+ B vers 4

5

Doen quam Iesebel sijne huysurouwe tot hem in, ende sprac met hem, wat ist, dat uwen geest so onghemoetich is, ende dat ghi geen broot en eet? Hi seide tot haer Ic hebben met Naboth den Iesreelijt gesproken ende geseyt. Geeft mi uwen wijnberch om gelt, oft hebt ghi daer lust toe, so wil icker v eenen anderen voor geuen.

6

Maer hi sprac, ic en wil v mijnen wijnberch niet gheuen.

⁺ Doen sprac Iesebel sijn wijf tot hem.

+ C vers 6

7

Wat conincrijc waer in Israel en dede ghijt, staet op ende etet broot, ende sijt goets moets, ic wil v den wijnberch Naboth des Iesraeliten doen hebben.

8

Ende si screef brieuen onder Ahabs name, ende besegeldese met sinen signet ende seyndese totten ouders, ende ouersten in sijnder stadt, die bi Naboth woonden

9

ende screef also in de brieuen, Laet eenen vasten wtroepen, ende sedt Naboth bouen aen int volc,

10

ende stelt twee mannen Belial voor hem die daer getuygen ende spreken, ghi hebt God ende den coninc geblasphemeert, ende leyt hem wt, ende steenicht hem dat hi sterue.

11

⁺Ende die Ouders ende ouerste sijnder stadt, die in sijnder stadt woonden, deden also hen Iesebel ontboden hadde, so si inden brief ghescreuen hadde, die si tot hen seynde,

+ D vers 11

12

ende lieten eene vasten wtroepen, ende deden Naboth bouen aen onder tvolc sitten,

13

Doen quamen die twee mannen Belial, ende stelden hen voor hem, ende getuychden tegen Naboth voor dat volc ende spraken, Nabot heeft Gode ende den coninc gelastert. Doen leyden si hem wt voor die stadt, ende steenichden hem dat hi sterf,

14

ende si ontbodent Iesebel, ende deden haer seggen. Nabot is gestenicht ende doot,

15

doen Iesebel hoorde dat Nabot gesteent ende doot was, so sprac si tot Ahab, Staet op ende neemt in den wijnberch Naboth des Iesreeliten, den welcken hi v weygerde om gelt te geuen, want Nabot en leeft niet meer, mer hi is doot.

16

Doen Ahab hoorde dat Naboth doot was, so stont hi op, dat hi af soude gaen totten wijnberge Naboth des Iesreeliten, ende dien in nemen.

17

Mer dat woort des HEEREN quam tot Elia des Tisbiten ende sprac.

18

Staet op, ende gaet neder Ahab den coninc Israel te gemoete, dye tot Samaria is, ⁺ Siet hi is inden wijnberch Naboth, dat hi henen is gegaen, dat hi dien in soude nemen,

+ E vers 18

19

ende spreect met hem, seggende, So spreect die HERE, ghi hebt doot geslagen, daer toe ooc in genomen, ende sult met hem spreken ende segghen, so spreect die HERE, Inder plaetsen daer die honden dat bloet Naboth opgelect hebben, daer sullen die honden v bloet ooc op lecken.

20

Ende Ahab sprack tot Elia, Hebt ghi mi oyt uwen vyant gheuonden? Hi sprac, Ia, ic heb v geuonden om dat ghy vercocht sijt slechts quaet te doen voor den HERE,

21

Siet ic wil ongeluc ouer v brengen, ende uwe nacomelingen wech nemen, ende wil van Ahab wtroeyen, ooc den genen die aen de want pisset, ende die besloten ende verlaten is in Israel,

22

Ende wil v huys maken gelijc dat huys Ieroboam, des soons Nebath, ende als dat huys Baesa des soons Ahia, om des verweckens wille, daer mede ghi vertoornt, ende Israel hebt doen sondigen.

23

⁺Ende ouer Iesebel sprac die HERE ooc ende seyde. De honden sullen Iesebel eten aen die muere Iesreel

+ F vers 23

24

Wie van Ahab sterft in die stadt, dien sullen die honden eten, ende wie opt velt sterft, dien sullen die vogelen onder den hemel eten.

25

Also en was nyemant die so geheelic vercocht wert quaet te doen voor den HERE als Ahab, want zijn wijf Iesebel bracht hem daer toe,

26

ende hi maecte hem tot eenen grooten grouwel, also dat hi den afgoden na ginc in alle manieren, als dye Amoriten gedaen hadden, die die HERE voor die kinderen Israel verdreuen hadde.

27

⁺Mer doen Ahab sulcke woorden hoorde, schoorde hi sine clederen, ende dede eenen sack aen sijn lijf, ende vaste ende sliep inden sack, ende ghinc cromme met neder ghebuychden hoofde.

+ G vers 27

28

Ende dat woort des HEREN quam tot Elia den Tisbite, ende sprac, En hebdi niet gesien hoe hem Ahab voor mi buyget? Want hi hem voor mi buyget, so en wil ic dat ongeluc niet brengen in sinen leuen. Mer bi sijns soons leuen wil ic dat ongheluck ouer sijn huys brenghen.