Den Bybel met groter neersticheyt ghecorrigeert (Liesveltbijbel 1542)

Hier beghint dat derde boeck der Coninghen.

Als Dauid oudt wert, so sochtmen hem een ionghe maecht, die hem verwermen soude, Adonia staet na sijns vaders rijcke BathSeba bidt voor haren soon Salomo, die wort tot eenen coninck gheordineert.

Dat .I. Capittel

1

⁺ENde doen die coninc Dauid oudt was, ende wel bedaget so en conste hy nyedt werm gheworden, al decktemen hem met cleederen, ⁺

+ A vers 1

+ Amasones, dat waren al vrouwen ende binnen haren lande en waren geen mans mer eens iaers quamen haer mannen, dye oock in een lant alleen woonden ende versamelden hen metten vrouwen ende wanneer si knechkens ontfingen ende baerden ende dye tweeiarich gheworden waren so santmense den vader thuys mer alle die meyskens hieldense ende als si borsten cregen, so sneden si die rechter borst af, om den scilt daer op te voeren, dese hadden omtrent dese tijt eenen strijt met den griecken hare nabueren daer bleuen .xxv C. vrouwen, ende xxx.m. mannen ende Amasones behielden dat velt Sameas dye prophete leefde in deser tijt.

2

doen spraken sijne knechten tot hem, Laetse mijnen Heere den coninck, een deerne, ende een maghet soecken, dye voor den Coninck stae, ende hem voestere, ende slape in sinen arme, ende verwarme mijnen heere den coninc.

3

Ende si sochten een schoon deerne, in allen den palen Israel, ende vonden Abisag van Sunen, ende brachtense den coninc,

4

Ende si was een seer scoon deerne, ende voesterde den coninc, ende diende hem. Mer die coninck en bekendese niet.

5

⁺Adonia die sone Hagith verhief hem ende sprac, Ic wil coninc worden, ende maecte hem waghens ende ruyters, ende vijftich mannen tot Arsiers voor hem henen,

+ B vers 5

6

ende sijn vader en berispede hem noch noyt daerom, dat hi had gheseyt, waerom doet ghi also? Ende hi was ooc van seer goeder gedaenten, Ende hi hadde hem gewonnen na Absalon,

7

ende sijn sake stont bi Ioab, den sone SeruIa, ende AbIathar den priester, die holpen Adonia,

8

maer Sadok dye priestere, ende Benaia dye sone Ioiada, ende Nathan die propheet ende Simei ende Rei, ende de vromen Dauids, en waren met Adonia niet.

9

Ende doen Adonia scapen, ende runderen, ende ghemeste vee offerde, byden steen Sohelet die neffens de fonteyne Rogel leghet, noode hi alle sine broeders des conincx sonen, ende alle die mannen Iuda, des conincx knechten,

10

Maer den prophete Nathan ende Benaia, ende die vromen, ende Salomo sinen broedere en noode hi niet.

11

Doen sprac Nathan tot BathSeba, Salomos moeder, En hebt ghi niet gehoort dat Adonia, die sone Agith coninck is gheworden, ende onse here Dauid en weet daer niet af,

12

Dus coemt nv, ick wil v eenen raet gheuen, dat ghi uwe siele ende Salomos siele salueert,

13

Wech, ende gaet totten coninck Dauid in ende spreect tot hem, Mijne heer coninck, en hebt ghi uwer maerten niet ghesworen ende ghesproken, V soon Salomo sal na mi coninck sijn, ende hy sal op mijnen stoel sitten? Waeromme is dan Adonia coninc geworden?

14

Siet, als ghi daer noch sijt ende metten coninc spreect, so wil ic na v in comen, ende uwe woorden volcomelijc wtspreken.

15

Ende BathSeba ghinc totten Coninck in die camere, ende die coninc was seer out, ende Abisag van Sunen diende den coninc.

16

Ende BatSeba neychde haer, ende aenbadt den coninc. Die coninck sprack wat is v?

17

Si sprac tot hem, mijn heere, ghi hebt uwer maerten bi den HEERE uwen Godt ghesworen, dijn sone Salomo, sal coninc sijn na mi, ende op mijnen stoel sitten,

18

Maer nv siet, Adonia is Coninc geworden, ende mijn heere die coninck en weet daer niet af,

19

Hi heeft ossen, ende gemeste vee, ende vele

[p. *]

scapen geoffert, ende heeft genoot al die sonen des conincx daer toe AbIathar den priester, ende Ioab den velthooftman, Mer uwen knecht Salomo, en heeft hi niet genoot,

20

Mer ghi sijt mijn heer coninck, die oogen des geheelen Israels sien op v dat ghi hen te kennen gheeft, wie op den stoel mijns heren des conincx na hem sitten sal,

21

Ende als mijn here die Coninck met sinen vaderen ontslapen is, so sullen ic ende mijn soon Salomo sondaers moeten sijn.

22

⁺Als si noch sprac metten coninc, quam die Prophete Nathan,

+ D vers 22

23

ende si bootscaptent den coninc, Siet, daer is die prophete Nathan. Ende als hi in voor den coninc quam, aenbede hi den coninc op sijn aensicht ter aerden, ende sprack,

24

Mijn Heer coninc, hebdy gheseyt. Adonia sal na mi coninc sijn, ende op mijnen stoel sitten.

25

Want hi is heden afghegaen, ende heeft osschen geoffert, ende gemest vee, ende veel scapen, ende heeft alle die sonen des conincx ghenoot, ende die hooftlieden daer toe den priester AbIathar, Ende siet, si eten, ende drincken voor hem, ende segghen, Gheluc toe den Coninc Adonia,

26

Maer mi uwen knechte, ende Sadock den priester, ende Benaia den soon Ioiada, ende uwen knecht Salomo en heeft hi niet genoot,

27

Is dat van mijnen heere den coninc beuolen, ende heuet sinen knecht niet laten weten wie opten stoel mijns heeren des conincx na hem sitten sal.

28

⁺Die coninc Dauid antwoorde ende sprack. Roept mi BathSeba, ende si quam in voor den coninck, ende doen si voor den coninc stont, swoer die coninck, ende sprac,

+ E vers 28

29

So warachtelic als dye HEERE leeft, die mijn siele verlost heeft wt alder noot,

30

ick wil heden doen so ic v gesworen hebbe, by den HEERE den God Israel, ende ghesproken, dat Salomo v sone na mi coninc sal sijn, ende hi sal op mijnen stoel sitten voor mi,

31

Doen neychde haer BathSeba, met haren aensichte ter aerden, ende aenbede den coninc ende sprac Gheluck mijnen heer coninc Dauid eewelic.

32

Ende die coninc Dauid sprac, roept mi den priester Zadok, ende den prophete Nathan, ende Benaia den soon Ioiada,

33

ende doen si in quamen voor den coninc, so sprac die coninc tot hen, Neemt met v ws HEEREN knechten, ende sedt mijnen soon Salomo op mijnen muyl, ende leyt hem af tot Gihon,

34

ende de priester Sadok metten prophete Nathan, salue hem daer tot eenen coninc ouer Israel, ende blaest metter basuynen, ende segt, Geluc den coninc Salomo,

35

ende trect hem na opwaerts, ende coemt, so sal hi sitten op mijnen stoele, ende coninc sijn voor mi, ende ic wil hem gebieden, dat hi vorste si ouer Israhel ende Iuda.

36

Doen antwoorde Benaia, die sone Ioiada den coninc, ende sprac Amen. Dye HEERE de God mijns heeren des conincx segge ooc also,

37

so die HEERE met mijnen here den Coninc geweest is, so si hi ooc met Salomo, op dat sinen stoel meerder worde, dan den stoel mijns heeren des conincx Dauids.

38

Doen ginc af die priester Sadok, ende die prophete Nathan, ⁺ ende Benaia, die sone Ioiada, ende Chreti ende Plethi, ende setten Salomo opten muyl des conincx Dauid, ende leyden hem tot Gihon,

+ F vers 38

39

ende die priester Sadoc nam den olyehoren wt den tabernacule, ende salfden Salomo, ende bliesen metter basuynen, ende allet volc sprac Geluck den coninc Salomo,

40

Ende alle tvolck trock hem na opwaerts, ende tvolc peep met pijpen, ende was seer vrolijc, also dat die aerde van haren geroep gheluyt gaf.

41

Ende Adonia hoorde dat, ende die hi genoot had-de, die bi hem waren, ende si hadden alle gheten, ende doen Ioab der basuynen geluyt hoorde, so sprac hy Wat wil dat gheroep der stadt, ende getumel, oft rumoer?

42

Doen hi noch sprac, Siet, doen quam Ionathan, die sone AbIathar des priesters, ende Adonia sprack Coemt in, want ghi sijt een talweerdich man, ende brengt goede bootscap

43

Ionathan antwoorde ende sprac tot Adonia, Ia onse heere dye coninc Dauid, heeft Salomo tot eenen coninc ghemaect,

44

ende heeft den priester Sadok ende den prophete Nathan met hem gesonden, ende Benaia den sone Ioiada, ende Chreti, ende Phleti, ende si hebben hem op sconincx muyl gesedt,

45

ende Sadock dye priestere, met den Prophete Nathan, heeft hem gesalft tot eenen coninc te Gihon, ende zijn van daer opgetrocken met vruechden, dat die stadt in roeren is, dat is dat geroep dat ghi gehoort hebt,

46

daer toe sidt Salomo opten conincliken stoel,

47

⁺ende die knechten des conincx sijn ingegaen, om onsen here den coninc Dauid te seegenen, oft te grueten, ende hebben gheseyt, v God make Salomo eenen beteren name, dan uwen name is, ende make sinen stoel grooter dan uwen stoel, ende hebben den coninc opten leeger aengebeet,

+ G vers 47

48

Ooc heeft die coninc also gheseyt, Ghelooft si dye HEERE die God Israel, die heden eenen op mijnen stoel heeft laten sitten, dattet mijne oogen ghesien hebben.

49

Doen verscricten ende maecten hen op, alle die by Adonia ghenoot waren, ende ghinghen henen elc wech,

50

Maer Adonia dye vreesde hem voor Salomo, ende maecte hem op, ende ginc henen, ende vaette die hoornen des outaers,

51

Ende Salomo wert gebootscapt, Siet Adonia vreest den coninc Salomo, ende siet, hi vaette die hoornen des outaers, ende seyde, die coninc Salomo sweere mi heden, dat hi sinen knecht niet dooden en sal metten sweerde,

52

Salomo sprack, Is hi redelic, so en sal gheen hayr van hem opter aerden vallen maer wert quaet aen hem gheuonden, so sal hi steruen. Ende die Coninc Salomo seynde henen, ende liet hem vanden outaer halen,

53

Ende doen hy quam, aenbadt hi den coninc Salomo, Maer Salomo sprac tot hem Gaet in v huys.