Den Bybel met groter neersticheyt ghecorrigeert (Liesveltbijbel 1542)

Als Dauid steruen soude vermaent hi Salomoni, dat hi soude inden wech des HEEREN wandelen, Ende als Adonias begheerde Abisag van Sunen tot eenen wijue, so liet hem Salomo dooden, AbIathar wert van dat priesterdom ghestooten, Ioab ende Semei worden ghedoot.

Dat .ij. Capittel

1

⁺ALs nv den tijt aen quam, ⁺ dat Dauid steruen soude, gheboot hi sinen soon Salomo ende sprack,

+ A vers 1

+ io. xiij d de. xxi b Ioan. i.d

2

ic gae den wech alder werelt, sijt een man, ende getroost,

3

ende neemt der bewaringhe des HEEREN ws Gods waer, dat ghi in sine wegen wandelt, ende hout sine seden, geboden, rechten, ghetuygenisse, so gescreuen staet in die wet Mose, op dat ghi cloec sijt in allen dat ghi doet, ende waer ghi v henen keert,

4

op dat v die HERE zijn woort verwecke, dat hi ouer v ghesproken heeft, ende gheseyt, Bewaren uwe kinderen mijn wegen, also dat si voor my ghetrouwelic, ende van gheheelder herten, ende sielen wandelen, so en sal van v nemmermeer ghebreken een man opten stoel Israel. ⁺

+ ij.re. iij c ende .xx

5

⁺Ooc weet ghi wel, wat mi gedaen heeft Ioab, die sone SeruIa, wat hi den twee velthooftmannen Israel dede, Abner den sone Ner, Ende Amasia den sone Iether, die hi gedoot heeft, ende stortede orloochs bloet in vrede, ende dede oorloochs bloet in sinen gordel dat om sine lendenen was, ende aen sine schoenen,

+ B vers 5

[p. *]

die aen sijn voeten waren,

6

doet na uwer wijsheyt, dat ghi sijn grijs hayr niedt met vrede onder inde helle en brengt,

7

Ooc den kinderen Barsillai des Gileaditen sult ghi ontfermherticheyt bewijsen, ⁺ dat si aen v tafele eten, Want also deden si hen tot mi, doen ic voor Absalon uwen broeder vluchte.

+ ij.re. xix a

8

Ende siet, ghi hebt bi v Semei, den sone Gera des soons Iemini van Bahurim, ⁺ die mi scandelic vloecte inder tijt doen ic tot Mahanaim ghinc, Maer hi quam af mi te gemoete, aen die Iordane, doen swoer ic hem biden HEERE ende sprac, Ic en sal v niet dooden metten sweerde,

+ ij.re. xix b ende a

9

mer en laet ghi hem niet ontsculdich sijn, want ghi sijt een wijs man, ende sult wel weten wat ghi hem doen sult, dat ghy sijn grijs hayr met bloet hier onder die helle brengt.

10

⁺Aldus ontsliep Dauid met sinen vaderen, ⁺ ende wert begrauen inder stadt Dauid,

+ C vers 10

+ Act. ij.e.

11

die tijt, die Dauid coninc geweest is ouer Israel, is veertich iaer, Seuen iaer was hi coninc tot Hebron, ende driendertich iaer tot Hierusalem,

12

Ende Salomo sadt opten stoele sijns vaders Dauid, ende sijn conincrijck wert seer stantuastich.

13

Maer Adonia die sone Agith, quam in tot BathSeba, die moeder Salomo, ⁺ ende si sprac, Coemt ghy ooc met vreden?

+ ij.re xvi a

14

Hi sprac, ia, ende seyde, Ick heb met v te spreken, Si seyde, Segt op,

15

Hy sprack, Ghy weet dat dat conincrijc mijn was, ende gheheel Israhel hadde hem op mi gherecht, dat ic coninc soude sijn, Maer nv is dat conincrijc gekeert, ende mijns broeders geworden, vanden HEERE ist hem geworden,

16

Nv bid ic een bede van v, dat ghi mi mijn aensicht niet en wilt bescamen. Si sprac tot hem, Segt op,

17

Hy sprac. Spreect totten coninck Salomo, want hi en sal v aensicht niet bescamen, dat hi mi geue Abisag van Sunen tot eenen wijue.

18

BathSeba sprack, Wel ick wil metten coninc van uwent wegen spreken.

19

⁺Ende BathSeba quam in totten coninck Salomo, ⁺ om met hem te spreken, van Adonia aengaende, Ende die coninc stont op, ende ghinck haer te gemoete, ende aenbedese, ende hi sadt op sinen stoel, ende des conincx moeder wert eenen stoel ghesedt, dat si tot sijnder rechter siden soude sitten,

+ D vers 18

+ Die stat van Cantelberch in Engelant wert gesticht als dye wereldt gestaen had .iiij.M. een C. ende lxv. iaren voor Cristus geboort M. ende vier ende xxx. iaer.

20

Ende si sprac, Ic bid een cleyn bede van v, en wilt mijn aensicht niet beschamen. Die coninc sprack tot haer. Mijne moeder bidt, Ic en wil v aensicht niet beschamen,

21

Si sprac Laet Abisag van Sunen dijnen broeder Adonia tot eenen wijue geuen.

22

Doen antwoorde die coninc Salomo, ende sprac tot sijn moeder, Waerom bidt ghi om Abisag van Sunen den Adonia? Bidt hem dat conincrijc ooc, want hi is mijn grootste broeder, ende heeft den priester AbIathar, ende Ioab den soon IeruIa,

23

Ende dye Coninck Salomo swoer byden HEERE, ende sprac, God doe mi dit ende dat, Adonia sal dat tegen sijn leuen gesproken hebben,

24

⁺Ende nv also warachtelijck als die HERE leeft die mi toe ghemaecht heeft, ⁺ ende heeft laten sitten opten stoel mijns vaders Dauids, ende die mi een huys gemaect heeft, so hi gesproken heuet, heden sal Adonia steruen,

+ E vers 24

+ i.reg. g.

25

Ende die coninck Salomo seynde henen voor Benaia, den sone Ioiada die sloech hem dat hi sterf.

26

Ende die coninc sprack totten priester AbIathar, Gaet henen tot Anatoth, tot uwen acker, want ghy sijt een man des doots, maer ic en wil v heden nyedt dooden, want ghi hebt dye Arcke Gods des HEREN voor mijnen vader Dauid gedraghen, ende hebt mede gheleden, waer mijn vader geleden heeft,

27

so verstiet Salomo dien AbIathar, dat hi niet meer priester des HEEREN en mocht sijn, op dat des HEREN woort veruult soude worden, dat hi ouer dat huys Eli gesproken hadde tot Silo.

28

Ende dit gerucht quam voor Ioab, want Ioab hinc aen Adonia, ende niet aen Salomo. Doen vluchte Ioab inden Tabernacule des HEREN, ende vaette dye hoornen des outaers,

29

Ende het wert den coninck Salomo ghebootscapt, dat Ioab totten tabernacule des HEREN geulucht waer, ende siet, hy staet aenden outaer. Doen seynde Salomo Benaia, den soon Ioiada henen, ende sprac, Gaet, slaet hem.

30

Ende doen Benaia totten tabernakel des HEEREN quam, sprac hi tot hem, Dus seyt die coninc gaeter wt, Hi sprac, Neen, Ic wil hier steruen, Ende Benaia seyde dat den coninc weder, ende sprac, Also heeft Ioab ghesproken, ⁺ ende also heeft hi mi geantwoort.

+ ij.re. iij. iij.c.

31

⁺Die coninc sprac tot hem, doet so hi ghesproken heeft, ende slaet hem, ende begraeft hem, op dat ghy dat bloet dat Ioab te vergeefs ghestort heeft, van mi, ende van mijns vaders huys doet,

+ F vers 31

32

ende dat hem dye HERE betale sijn bloet op sijn hooft, dat hi twee mannen geslagen heeft, die gerecht ende beter waren dan hi, ende heeftse metten sweerde gedoot, dat mijn vader Dauid daer niet af en wiste, te weten Abner den sone Ner, den velthooftman ouer Israel, ende Amasia den sone Iether, den velthooftman ouer Iuda,

33

dat haer bloet betaelt worde, op dat hooft Ioab, ende sijns saets eewelic, Mer dat Dauid, ende sijn saet, sijn huys ende sinen stoel, vrede hebbe, eeuwelic vanden HEERE.

34

Ende Benaia den soon Ioiada, ghinc op, ende sloech hem, ende dooden hem, ende hi wert begrauen in sinen huyse, inder woestijnen.

35

Ende die coninck sette Benaia den sone Ioiada in sijn stede ouer dat heyr ende Sadok den priester, sette die coninc in die stede AbIathar.

36

Ende die coninc sandt henen, ⁺ ende dede Semei roepen, ende sprac tot hem, Tymmert v een huys te Hierusalem, ende woont aldaer Ende en gaet van daer niet wt, noch herwaerts noch derwaerts,

+ i.re. ij.g

37

In welcken dage ghi wtgaet, ende ouer die beke Kidron gaet, so weet dat ghi den doot steruen moet, V bloet si op v hooft.

38

Simei sprac totten coninck, dat is een goede meyninge, so mijn heere die coninc gesproken heeft so sal v knecht doen.

39

Aldus woonde Semei te Iherusalem langhen tijt, Mer het gheuiel ouer drie iaren dat twee knechten den Semei ontliepen tot Achis den soon Maecha, den coninc tot Gath, Ende het wert Semei gebootscapt, Siet v knechten zijn te Gath.

40

Doen maecte hem Semei op, ende sadelde sinen ezel, ende troc henen tot Gath, tot Achis, dat hi sine knechten soude soecken, ende doen hi daer quam, soo bracht hi sijn knechten van Gath.

41

Ende het wert Salomo gebootscapt, dat Semei wech getrocken ware van Iherusalem tot Gath, ende weder gecomen waer.

42

Doen seynde die coninc henen ende liet Semei roepen, ende sprac tot hem, En heb ic dy niet gesworen byden HERE, ende v getuyget ende geseyt, In welcken dach ghi wt trect, ende herwaerts oft derwaerts ghaet, dat ghi weten soudt, dat ghi den doot moet steruen? Ende ghi spraect tot mi, Ick hebbe een goede meeninge ghehoort,

43

waerom en hebdy v dan niet gehouden na den eedt des HEE-

[p. *]

REN, ende ghebot dat ic v geboden hebbe.

44

Ende die coninc sprac tot Simei, ghi weet alle de boosheyt die uwer herten kenlijc is, die ghi mijnen vader Dauid ghedaen hebt, die HEERE heeft v boosheyt betaelt op v hooft, ende die coninck Salomo is gheseeghent,

45

ende den stoele Dauid sal bereyt sijn voor den HEERE eewelick,

46

Ende die coninck gheboot Benania den sone Ioiada, die ginc wt, ende sloech hem dat hi sterft, Ende dat conincrijc wert beuestiget door die hant Salomo.