Den Bybel met groter neersticheyt ghecorrigeert (Liesveltbijbel 1542)

¶ Dauid coemt tot Odollam, sine vrienden ende broeders comen tot hem, oock noch andere ontrent vier hondert, Daer na coemt hi in Moab, Doeg verraedt Dauiden teghen Saul, daer omme wort Ahimelech met sommige andere priesteren ghedoot

Dat .xxij. Capittel

1

⁺DAuid ghinc van daer, ende ontuluchte in die speloncke Adullam. ⁺ Doen dat sine broeders hoorden, ende dat geheel huys sijns vaders, so quamen si tot hem af derwaerts,

+ A vers 1

+ Die stat van Pauien wert gesticht als die werelt ghestaen hadde vier .M C. ende .xiij. iaer voor cristus gheboorte m lxxix iaer

2

Ende alderhande mannen die in noot, ende scult, ende van bedroefder herten waren vergaderden tot hem, ende hi was haer ouerste, also dat bi vier hondert mannen bi hem waren

3

Ende Dauid ghinc van daer tot Mizpe, inder Moabiten lant ende sprac totten Moabiten Coninc, Laet mijn vader ende mijn moeder bi v wt ende in ghaen tot dat ic verneme, wat God met mi doen sal,

4

Ende hy lietse voor den Coninck der Moabiten, dat si bi hem bleuen, soo lange als Dauid in die borcht was,

5

Mer die propheet Gad seyde tot Dauid, En blijft inden borcht niet, mer gaet henen, ende comt int lant Iuda, doen ghinc Dauid wech, ende quam in die bosscagie Hareth, ⁺

+ mar. ij.b Luc. v.f.

6

Ende het quam voor Saul, dat Dauid, ende die mannen die bi hem waren, te voorschijn waren gecomen

Als nv Saul tot Gibeath woonde, ⁺ onder eenen bosch in Rama, so hadde hi een spiesse in sijn hant, ende alle sine knechten stonden neffens hem,

+ Terwanen wert ontrent deser tijt gesticht

7

doen sprac Saul tot sinen knechten, die neffens hem stonden. ⁺ Hoort ghi kinderen Iemini, sal v ooc die sone Isai alle ackers ende wijnbergen geuen, ende v alle ouer dusent ende ouer hondert tot ouerste maken,

+ B vers 7

8

dat ghi v alle verbonden hebt tegen mi? ende daer en is niemant diet mijnen ooren openbaer, Aengesien dat ooc mijn soon een verbont gemaect heeft metten sone Isai, daer en is niemant onder v die het crencke van mijnent wegen, ende mijnen ooren openbare, want mijn sone heeft mijnen knecht tegen mi verwect, die mi lagen leget, soe het aenden dach is

9

Doen antwoorde Doeg die Edomijt, die neffens den knechten Sauls stont ende sprac, Ic sach den soon Isai, dat hi tot Nobe quam, tot Ahimelech den soon Achitob,

10

die raet vraechde voor den HERE, ende ghaf hem voetsel, ende dat sweert Goliath des Philisteeus,

11

doen seynde die coninc henen, ende dede roepen Ahimelech den priestere, den soon Achitob, ende alle sijns vaders huys, die priesters die tot Nobe waren ende si quamen alle totten Coninc.

12

Ende Saul sprac Horet ghi soon Achitob, Hi sprac, Hier ben ic mijn heere

13

Ende Saul sprac tot hem, waerom hebdy een verbont teghen mi ghemaect, ghi ende die sone Isai, dat ghi hem broot ende tswerte gegheuen hebt, ende Gode voor hem raets gheuraecht, dat ghi hem sout verwecken dat hi mi lagen soude leggen, so het is aenden dach

⁺ Ahimelech antwoorde den coninc, ende sprack,

+ C vers 13

14

Ende wie is onder alle uwe knechten, als Dauid, die ghetrouwe is, ende des conincx swager, ende gaet in die gehoorsaemheyt, ende is heerlijc gehouden in uwen huyse

15

Heb ic dan heden eerst begonst God voor hem raet te vragen? dat si verre van mi, die Coninc en legghe sinen knechte sulc niet op, in alle mijns vaders huys, want v knecht en heeft van allen desen niedt gheweten, noch cleyn noch groot.

16

Mer die coninc sprac, Ahimelech ghi moet den doot steruen, ghi ende alle ws vaders huys.

17

Ende dye coninc sprac tot sinen artsiers die neffens hem stonden Keert v ende doodet des HEREN priesters, want hare hant is ooc met Dauid. ⁺ Ende doen si wisten dat hi vluchte, en hebben sijt mi niet geopenbaert, Mer die knechten des conincx en wilden haer handen niet aen dye priesters des HEREN slaen, om haer te verslaen

+ D vers 17

18

Doen sprac die Coninck tot Doeg, Keert v ghi, ende verslaet die priesters. Doeg die Edomijt keerde hem ende versloech die priesters, alsoo dat op dien dach storuen .lxxxv. mannen die lijnen rocken droeghen,

19

ende dye stadt der priesteren Nobe, sloech hi metten scerpe des sweerts, beyde mannen ende vrouwen, kinderen, ende suygelinghen, ossen ezelen, ende schapen

20

⁺Mer een soon Ahimelech, des soons Achitob die hiet Abiathar, ontliep, ende vluchte Dauiden nae,

+ E vers 20

21

ende vercondichde hem dat Saul die priesters des HEREN gedoot hadde.

22

Dauid sprac tot Abiathar. Ic wist wel in dien dage doen die Edomijt Doeg daer was, dat hijt Saul soude bootscappen, Ic ben schuldich aen alle die sielen ws vaders huys, Blijft bi mi ende en vreest niet,

23

Wie na mijn leuen staet, die sal ooc na v leuen staen, ende sult met mi behouden werden