Den Bybel met groter neersticheyt ghecorrigeert (Liesveltbijbel 1542)

Dauid coemt in Kegilam, Saul soect hem, Dauid ontloopt hem Saul leyt ouer al laghen na hem, Mer die HERE bescermt Dauiden

Dat .xxiij. Capttel

1

⁺ENde twert Dauid ghebootscapt, siet die Philisteen strijden tegen Kegila, ende beroouen die schueren.

+ A vers 1

2

Doen vraechde Dauid den HERE ende sprac, Sal ic henen gaen ende dese Philisteen slaen? Ende die HERE sprack tot Dauid, Gaet henen, ghi sult die Philisteen slaen, ende Kegila verlossen,

3

Mer die mannen bi Dauid spraken tot hem, Siet, wi vreesen ons hier in Iuda, ende willen henen gaen tot Kegila, tot der Philisteen heyr?

4

Doen vraechde Dauid den HERE weder, ende die HERE antwoorde hem, ende sprac Op, trect af tot Kegila, Want ick wil die Philisteen in uwen handen gheuen.

5

Aldus troc Dauid met sinen mannen tot Kegila, ende street tegen die Philisteen, ende ontdreef hen haer vee, ende dede eenen grooten slach aen hem. Also verloste Dauid die tot Kegila,

6

want doen Abiathar die sone Ahimelech vluchte tot Dauid te Kegila so droech hi den lijfroc met hem af.

7

⁺Doen wert Saul gebootscapt, dat Dauid te Kegila gecomen ware, ende sprac, God heeft hem in mijnen handen ouer gegeuen, dat hi besloten is, nv hi in een stat ghecomen is, met dueren ende grendelen bewaert.

+ B vers 7

8

Ende Saul liet allet tvolc roepen ten strijde, nederwaerts tot Kegila, dat si Dauiden ende sijn mannen souden beleggen,

9

Mer doen Dauid merckte dat Saul quaet ouer hem dachte, so sprac hi totten priester Abiathar Lanct den lijfroc herwaerts.

10

Ende Dauid sprac, HERE God van Israel, v knecht heuet gehoort, dat

[p. *]

Saul daer na staet, dat hi te Kegila soude comen, die stadt te verderuen om mijnen wille,

11

Sullen mi die borgers te Kegila ooc in sinen handen leueren, ende sal Saul af comen, so v knecht ghehoort heeft? dat vercondicht HERE God van Israel uwen knecht, Ende die HERE sprac, Hi sal afcomen.

12

Dauid sprac, mer sullen die borgers te Kegila mi, ende mijne mannen ouerleueren in die handen Sauls? die HERE sprac iae.

13

Doen maecte hem Dauid op met sinen mannen, dier bi ses hondert waren, ende trocken wt van Kegila, ende wandelden werwaert dat si consten. ^{+ +} Doen nv Saul gebootscapt wert, dat Dauid van Kegila geuloden was so liet hi sijn wttrecken staen,

+ De stadt van Thours wert gesticht int walsche lant

+ C vers 13

14

Mer Dauid bleef inder woestijnen inden borch, ende bleef opten berch inder woestijnen Siph, Mer Saul socht hem, alle sijn leefdaghe lanc, Mer God en gaf hem noyt in sinen handen.

15

Ende Dauid sach, dat Saul wtgetrocken was, om sijn leuen te soecken, Mer Dauid was inder woestijnen Siph inder heyden

16

Doen maecte hem Ionathan die Sone Saul op ende ghinc henen tot Dauid inder heyden, ende sterckte sijn hant in Gode,

17

ende seyde tot hem, en vreest niet, mijns vaders Sauls hant en sal v niedt vinden, ende ghi sult coninc werden ouer Israel, So wil ic die naeste om v sijn, Ooc weet mijn vader dat wel,

18

Ende si maecten beyde een verbont met malcanderen voor den HERE, ende Dauid bleef inder heyden, ende Ionathan troc weder thuys

19

Mer die Siphiniten trocken op tot Saul te Gibeath, ende spraken, En is Dauid niet bi ons verborgen inden borch inder heyden, opten hueuel Achila, die ter rechter siden leyt aen die woestijne?

20

so come nv die coninc neder na alle sijns herten begeerte, so willen wy hem ouer leueren in des conincx handen,

21

doen sprack Saul, geseegent sijt ghi den HERE, dat ghi mijns ontfermt hebt,

22

dus gaet nv henen ende werdes noch sekerder, ende dat ghi weet ende siet, aen welcke plaetse zijn voeten geweest sijn, ende wie hem daer gesien hebben Want mi is geseyt dat hi listich is,

23

Besiet ende bespiet alle plaetsen daer hi hem verberget, ende coemt weder tot mi als ghijs seker sijt, so wil ic met v trecken, Is hi inden lande, so wil ic na hem vereysscen oft ondersoecken onder alle duysenden in Iuda.

24

⁺Doen maecten si hen op, ende ghinghen tot Siph voor Saul henen, Maer Dauid ende sijn mannen waren in die woestijne Maon opt velt, ter rechter siden der woestijnen,

+ D vers 24

25

doen nv Saul henen troc met sine mannen om te soecken, so wert Dauid gebootscapt, ende hi maecte hem nederwaerts inden steen, ende bleef inder woestijnen Maon. Doen Saul dat hoorde, iaechde hi Dauid na inder woestijnen Maon,

26

Ende Saul met sinen mannen ghinck aen deen side des berchs Doen Dauid haestede Saulem te ontghaen, doen omringde Saul met sinen mannen Dauiden, met sinen mannen, dat hijse soude grijpen.

27

Mer daer quam een bode tot Saul, ende sprac, Haest v ende coemt, want die Philisteen sijn int lant geuallen,

28

doen keerde hem Saul van dyen nae iaghen Dauids, ende trocken die Philisteen teghen, daer af heetmen die plaetse Sela Mahelkoth, Ende Dauid troc op van daer, ende bleef binnen den borchte tot EnGedi