Den Bybel met groter neersticheyt ghecorrigeert (Liesveltbijbel 1542)

Die kinderen van Israel vechten teghen die Philisteen, ende si verliesen den strijt, ende daer wert geslagen ten tweeden male, Die Philisteen winnen die arcke des HEEREN, die twee sonen van Heli worden verslagen, ende Heli viel vanden stoele, ende brack den necke.

Dat .iiij. Capittel.

[afbeelding]

1

⁺ENde gantse Israel sprac van Samuel Israel troc ten strijde tegen die Philisteen, ende legerden byden hulpsteen, maer die Philisteen waren gheleghert tot Aphek,

+ A vers 1

2

ende bereyden hen tegen Israel ende dat heyr wort gescoort, also dat Israel voor dye Philisteen geslagen wert, ende sloegen inder scerpten des sweerts inden velde by vier duysent mannen.

3

Ende doen dat volc inden leger quam, spraken die ouders Israel, Waerom heeft ons die HERE heden laten slaen voor die Philisteen, laet ons tot ons nemen Darc des verbonts des HEEREN van Silo ende laetse onder ons comen, dat si ons helpe vander hant onser vyanden,

4

ende dat volc seynde te Silo, ende liet van daer halen, die arcke des verbonts des HEREN Zebaoth, die ouer Cherubim sittet, ende de twee sonen Eli waren daer metter arcken des verbonts Gods, Hophni ende Pinnehas,

5

Ende doen dye arcke des verbonts des HEREN inden leegher quam, so iuychten alle Israel, met eenen grooten iuychen, also dat die aerde gheluyt gaf.

6

⁺Doen die Philisteen hoorden, tghecrijsch sulcx

+ B vers 6

[p. *]

iuychenen, so spraken si wat is dat gecrijsch, sulcs groot iuychens inder Ebreen leger?

7

ende doen si vernamen dat die arcke des HEREN inden leger gecomen ware, so vreesden si hem ende seyden, God is inden leger ghecomen, ende seyden voort

8

☞ Wee ons, want het en heeft te voren niet also gestaen, wee ons. Wie sal ons verlossen vander hant deser pruetscer goden. Dat sijn die goden die Egipten sloegen met alderhande plage inder woestinen.

9

Dus sijt nv getroost ende mannen ghi Philisteen op dat ghi den Ebreen niet dienen moet so si v gedient hebben, Sijt mannen ende strijdt

10

Doen streden die Philisteen, ende Israel wert geslagen, ende elc vluchte in sijn tente, ende het was eenen zeer groten slach, also dat wt Israel vielen .xxx. duysent mannen voet volcx,

11

ende die Arcke Gods wert genomen, ende die twee sonen van Eli, Hophni ende Pinehas storuen

12

Doen liep een van BenIamin wt der bataelgien, ende quam tot Sylo opten seluen dach, ende hadde sijn cleederen gheschoort, ende had aerde op sijn hooft,

13

Ende als hi in quam, sadt Eli opten stoel dat hi opten wege souden sien, want sijn herte was scromende ouer die Arcke Gods, ende doen die man in die stadt quam, so gaf hijt te kennen, ende al dye stadt crijschte

14

⁺Ende doen Eli dat luyde crijscen hoorde, so vraechde hi. Wat luyde gheruchte is dat. Doen quam die man haestelijc ende ghaft Eli te kennen,

+ C vers 14

15

Ely was acht ende tnegentich iaer out, ende sijn oogen waren duyster dat hi niet gesien en conste,

16

die man sprack tot Eli. Ic come ende ben heden wt den heyr geulucht Hi sprac, Hoe gatet met mijnen sonen,

17

Doe antwoorde die vercondiger ende sprac. Israel is geulucht voor die Philisteen, ende daer is eenen grooten slach inden volcke geschiet, uwe twee sonen Hophni ende Pinheas sijn doot, daer toe so is die Arcke Gods ghenomen

18

Doen hi der Arcken Gods gedacht, soo viel hi te rugghe vanden stoel aen die poorte, ende brack sinen hals ontween ende sterf, want hi was out ende een swaer man. Hi oordeelde Israhel veertich iaer

19

⁺Sijns soons Pinheas wijf was beurucht, ende soude schier geliggen Doen si dat gherucht hoorde dat die Arcke Gods ghenomen, ende haers mans broeder ende haer man doot waren, so cromde si haer ende baerde, want haren noot quam haer aen.

+ D vers 19

20

Ende doen si nv sterf, spraken die vrouwen die neffens haer stonden ende vreest niet, ghi hebt eenen ionghen soon. Mer si en antwoorde niet, noch en nampt ooc niedt ter herten

21

ende si hiet dat knechtken Icabod, ende sprac. Die heerlicheit is wech genomen van Israel, om dat die Arcke Gods genomen was, ende haer swagher oock ende haer man

22

Ende sprac weder, Die heerlicheyt is wech ghenomen van Israel, wandt die Arcke Gods ghenomen is