Den Bybel met groter neersticheyt ghecorrigeert (Liesveltbijbel 1542)

Die openbaringhe ende visioen die Samuel gheschieden, dye welcke oock Heli geopenbaert wert.

Dat .iij. Capittel.

1

⁺DOen Samuel dat knechtken den HERE diende onder Eli, ⁺ So was des HEREN woort diere ter seluer tijt, ende daer en was gheen seker gesichte,

+ A vers 1

+ Die stat van Lonnen in engelant wert gesticht ende haren eersten naem was Troyen

2

ende tgesciede ter seluer tijt, Eli lach in zijn plaetse, ende zijn oogen begonsten duyster te worden, also dat hi niet sien en conste.

3

Ende Samuel had hem geleyt inden tempel des HEREN daer die arcke Gods was, eer dan die lampe Gods wt ginc,

4

Ende de HERE riep Samuel, Hi antwoorde, siet hier ben ic,

5

ende liep tot Eli ende seyde, siet hier ben ic, ghi hebt mi geroepen, Hi sprac. Ic en heb v niet geroepen, gaet weder henen, ende gaet weder liggen slapen. Ende hi ginc henen ende ghinc ligghen slapen.

6

Die HERE riep weder, Samuel, ende Samuel stont op, ⁺ ende ghinc tot Eli ende sprac, Siet hier ben ic ghi hebt mi geroepen, Hi seyde, ic en heb v niet geroepen mijne sone, gaet weder liggen slapen,

+ B vers 6

7

Mer Samuel en kende den HERE noch niet, ende des HEEREN woort en was hem noch niet gheopenbaert,

8

ende de HERE riep Samuel weder ten derden male, ende hi stont op, ende ginc tot Eli ende seide, Siet hier ben ic, ghi hebt mi geroepen. Doen mercte Eli dat die HERE dat knechtken riep,

9

ende sprac tot hem, Gaet weder henen ende slaept, ende ist dat ghi geroepen wert so segghet Spreect HERE, want v knecht hooret,

10

Samuel ginc wech, ende sliep in sijn plaetse.

Doen quam die HEERE ende tradt daer henen, ende riep als te voren, Samuel, Samuel, ende Samuel sprac, spreect want v knecht hooret,

11

Ende die HEERE sprac tot Samuel. ⁺ Siet ic doe een dinc in Israel dat so wie dat hooren sal, die sullen beyde sijn ooren tuyten.

+ C vers 11

12

In dien daghe wil ic verwecken ouer Eli, al wat ic op sijn huys gesproken hebbe.

13

Ic wil beginnen ende voleynden, Want ic hebt hem voorseyt dat ic rechter sijn wil ouer sijn huys eewelicken, om der misdaet wille, dat hi wiste hoe sine kinderen hen scandelijc hielden, ende en hadder niet eens suerlijc op gesien,

14

daerom heb ic den huyse Eli ghesworen dat dese misdaet des huys Eli niet versoent en sal worden, noch met offer, noch met spijsoffer, inder eewicheyt,

15

ende Samuel lach tot smorgens toe, ende dede dye dore op aenden huyse des HEREN.

Mer Samuel vreesde dat gesichte Eli te kennen te geuen, ⁺

+ ge. xvij.d

16

Doen riep hem Eli ende sprac, Samuel mijn sone,

17

Hi antwoorde Siet hier ben ic, ⁺ Eli vraechde, Wat is dat woort dat die HERE met v gesproken heeft? en verberget niet voor mi, God doe v dit ende dat, ist dat ghi mi yet verberget van alle dyen dat hy met v gesproken heeft,

+ D vers 17

18

Doen gaft hem Samuel al te kennen, ende en verberch niet voor hem. Hi sprac, het is die HERE, hi doe dat hem wel beualt.

19

Samuel nam toe, ende die HERE was met hem ende daer en viel gheen van allen sinen woorden opter aerden,

20

ende alle Israel van Dan aen tot Barsaba toe wiste dat Samuel getrou was te sijn een prophete des HEREN,

21

ende die HERE openbaerde weder tot Silo, want die HERE was Samuel geopenbaert tot Silo, doort woort des HEREN.