Den Bybel met groter neersticheyt ghecorrigeert (Liesveltbijbel 1542)

Eenen lofsanck Hanne, Helye sonen sondigen, ende si en worden niet neerstelijc vanden vader ghestraft. Daerom wordt hi ende sine sonen vanden priesterdom verstooten.

Dat .ij. Capittel.

1

⁺MIne herte is vrolic inden HERE, minen horen is verhoget inden HERE Mijnen mont heeft hem wijt open ghedaen ouer mijne vyanden, want ic verblijde mi van uwen heyl.

+ A vers 1

2

Nyemant en is heylich als die HERE, want buiten v en is niet ende daer en is geenen troost als onse God is

3

Laet uwe veel beroemen van hoogen dinghen.

Laet wt uwen monde blijuen dat oude heyr comen want die HERE is een God, die alle dinc weet, ende hi heeft alderhande doen bescict.

4

Den boge der stercker is gebroken, ende die onstercke sijn omgort met stercheyt.

5

Die daer sadt waren, sijn om broot vercocht geworden, ende die honger lijden, hebben opgehouden, tot dat die onuruchtbaer, seuen bare, ende die vele kinderen hadden ontsterc werden.

6

Die HERE doodet, ende geeft dat leuen, hi leydet inder hellen, ende daer weder wt.

7

Die HERE maect arm ende rijcke, hy vernedert ende verhooghet.

8

Hi heft op den behoeuenden wt den stof, ende verhoget den armen wt den drec, op dat hy hem soude setten onder den princen ende den stoel der eeren laten beeruen. Want die eynden der werelt sijn des HEREN ende hi heeft den eerdtbodem daer op geset.

9

Hi sal behoeden die voeten sijnder heyligen, mer die godlose sullen stil worden inder duysternissen, want nyemant en vermach yet wt eygender cracht.

10

⁺Voor den HERE sullen verscricken sijn teghen partiders, ouer hen sal hy donderen inden hemel, die HERE sal oordeelen die eynden der weerelt, ende sal macht geuen sinen coninc, ende verhoogen den horen sijnder gesalfden.

+ C vers 10

11

Elkana ginc wech tot Ramath in sijn huys, ende dat knechtken was des HEREN dienaer, voor den priester Eli.

12

Mer die sonen Eli, waren kinderen Belial,

13

ende en wisten niet vanden HEERE, noch vanden recht der priesters aen dat volck. Als yemant yet offeren wilde, soo quamen die priesters knapen, te wile datmen vleesch koocte, ende hadden eenen crauwel met drie tanden in haer hant, ende stieten in die teyle of ketel,

14

oft panne, of potte, ende wat si metten crauwel wt trocken, dat nam die priester daer af. Also deden si allen Israel die daer quamen tot Silo.

15

Des gelijcx eer si dat vet aenstaken, quam des priesters knecht, ⁺ ende seide tot dien die dat offer brocht geeft mi dat vleesch den priester te braden, wandt hy en wilt geen gecooct vleesch van v nemen, mer rauwe.

+ D vers 15

16

Als dan yemant tot hem seyde. Laet dat vet aensteken, so het heden behoort, ende neemt daer na al wat v hert begeert, so sprac hi tot hem. Ghi sult mi nv geuen is dat niet, so wil ict met gewelt nemen.

17

Daerom was die sonde der knapen seer groot voor den HERE, want die lieden lasterden dat spijsoffer des HEREN

18

Samuel was een dienaer voor den HERE, ende dat knechtken was omgort met eenen lijnen lijfrock,

19

daer toe maecte hem sijn moeder eenen cleynen siden rock, ende brachten hem op tot sinen tijden, ⁺ als si met haren man op ginc, om te offeren den offer tot sijnder tijt

+ E vers 19

20

Ende Eli segende Elkana ende sijn wijf ende sprac, Die HERE geue v saet van desen wijue, voor dit goet dat ghi den HERE geleent hebt, ende si gingen tot haerder plaetsen.

21

Ende die HERE besocht Hannam, dat si beurucht wert, ende baerde drie sonen, en twee dochteren, mer Samuel dat knechtken nam toe byden HEERE.

22

Eli was seer out, ende vernamt al wat sine sonen alle Israel deden, ende dat si bi die wijuen sliepen die God dienden, ⁺ voor die duere ter tenten des getuygenis,

+ F vers 22

23

ende hi sprac tot hen. Waerom doet ghi dat? want ic hoore v quaet wesen van alle desen volc.

24

Niet mine kinderen, dat en is geen goet gerucht dat ic hore ghi doet dat volc des HEREN ouertreden.

25

Ist dat yemant tegen eenen mensch sondicht, so cant de richter slichten, Maer als yemant tegen den HEERE sondicht wie cant slichten? Maer si en hoorden haer vaders stemme niet, want die HERE hadse wille te dooden

26

Mer dat knechtken Samuel ginc ende nam toe, ende was aengenaem bi den HERE ende bi die menscen.

27

Daer quam eenen man Gods tot Eli, ende sprac tot hem. So spreect die HERE. Ic ben openbaer gheworden ws vaders huyse, doen si noch in Egipten waren onder Pharaos huyse,

28

ende heb hen dat selue my

[p. *]

vercoren voor alle stammen Israel totten priesterscap dat hi offeren soude op mijnen outaer, ende wieroock aensteken, ende den lijfrock voor mi dragen, ende hebbe dijns vaders huyse gegeuen alle offer der kinderen Israel,

29

waerom steect ghi dan tegen mijnen offer ende spijsoffer, die ic geboden hebbe inder wooningen, ende ghy eert uwe sonen meer dan mi, op dat ghy v sout mesten vanden eerstelingen alder spijsoffers mijns volcx Israel?

30

⁺Daerom spreect die HERE God Israhel, Ic heb gesproken, v huys ende ws vaders huys, souden voor mi eewelic wandelen. Mer nv spreect die HERE, het si verre van mi. Wandt wie mi eert, dyen wil ic ooc eeren, Mer wie mi veracht, die sal versmaet sijn.

+ G vers 30

31

Siet den tijt sal comen dat ic uwen arm, ende den arme dijns vaders huys in tween wil breken, also datter geen oude in uwen huyse en si.

32

Ende sult sien uwen vyant inder wooningen, ende in alderley goet Israel, ende daer en sal nemmermeer oude sijn in ws vaders huys.

33

Nochtans en wil ic nv niet, alle man van mijnen outaer wtroyen, op dat dijn ooghen ontbreken, ende v siele haer bedroeue, ende alle menichten ws huys sullen steruen, als si tot lieden geworden sijn.

34

Ende dat sal v een teeken sijn, dat ouer uwe sonen Hophni ende Pinehas comen sal. Si sullen beyde op eenen dach steruen,

35

mer ic wil mi eenen getrouwen priester verwecken, dye sal doen so in mijnder herten ende in mijnder sielen is, dien wil ic een seker huys tymmeren dat hi daer altoos voor mijnen gesalfden wandele,

36

ende wie ouer blijft van uwen huyse, dye sal comen ende hem aenbeden om eenen silueren penninck ende om een stuck broots, ende sal seggen, Lieue laet mi tot eenen priester deel, dat ic een bete broots ete.