Den Bybel met groter neersticheyt ghecorrigeert (Liesveltbijbel 1542)

Die Philisteen brengen die Arcke in haer lant, ende si stellen die in haers afgods tempel, welck valt af ende breeckt die Arcke wort van deene stadt totter ander gheuoert, die inwoonders worden gestraft, ende seer verscrict

Dat .v. Capittel

[afbeelding]

1

⁺MEr die Philisteen namen Darc Gods ende brachtense vanden helpsteen tot Asdod,

+ A vers 1

2

in dat huys Dagon Ende steldense neffens Dagon.

3

Ende doen dye van Asdod, des anderen morghens vroech op stonden, so vonden si Dagon op sijn aensicht liggen opter aerden voor die Arcke des HEREN, Mer si namen den Dagon, ende setten hem weder in sijne plaetse.

4

Als si den anderen morghen vroech op stonden, so vonden si Dagon weder op sijn aensichte ligghen opter aerden voor die Arcke des HEREN. Maer sijn hooft, ende beyde sijn handen af gehouden op den dorpele, alsoo dat den block daer alleen lach

5

Daerom en terden die Priesters Dagon ende alle die in Dagons huys ghaen niedt opten dorpel Dagon tot Asdod, ⁺ tot op desen dach.

+ B vers 5

6

Die hant des HEEREN wert swaer ouer dye van Asdod, ende verderfdese, ende sloech Asdod, ende al hare palen aen die heimelijcke plaetsen.

7

Doen dye lieden tot Asdod sagen, dattet so toeginc, so spraken si En laet die Arcke des Gods Israel bi ons niet bliuen want sijn handt is te hart ouer ons, ende onsen God Dagon,

8

ende seynden henen ende vergaderden alle die princen der Philisteen tot hen ende seyden. Wat sullen wi metter Arcken des Gods Israel maken doen antwoorden die van Beth, ⁺ laet die Arcke des Goods Israhel al om dragen, Ende si droegen dye Arcke des Gods Israel rontsomme.

+ C vers 8

9

Als si die selue also om droegen, soo wert voor die hant des HEREN een zeer groot getumel oft rumoer in die stadt, ende sloech die lieden inder stat, vanden cleynsten aen totten grootsten, ende verderfdese in allen heymelijcken plaetsen.

10

Doen seynden si die Arcke des HEREN tot Ekron, Maer doen dye Arcke Gods tot Ekron quam, soo riepen die van Ekron, Si hebben die Arcke Gods alom tot mi gedragen, dat si mi souden dooden ende mijn volck

11

Doen seynden si henen ende verghaderden alle princen der Philisteen ende spraken. Seynt die arcke des Gods Israel weder op haer plaetse, dat si mi ende mijne volc niet en doode. Want die hant Gods maecte een seer groot rumoer met dooden, in die geheele stadt,

12

ende welcke lieden niet en storuen, die worden gheslaghen aen die heymelijcke plaetse, also dat dat

[p. *]

ghecrijsch der stadt opten hemel ghinck.