Den Bybel met groter neersticheyt ghecorrigeert (Liesveltbijbel 1542)

Hier verhaelt hi weder opt corte, dwelcke bouen int .xix. Ca. geseyt is, van dat boec ende bloet des verbonts

Dat .xxiiij. Capittel

1

⁺ENde hi sprack tot Mose, climt op totten HERE, ghi ende Aaron, Nadab, ende Abihu ende tseuentich ouders van Israel, ende aenbidt van verre,

+ A vers 1

2

Mer laet Mose alleen comen bi den HERE, ende en laet de ander niet naerder comen, ende dat volc en sal met hem niet op comen.

3

Mose quam ende vertelde den volcke alle die woorden des HEREN, ende al sijn rechten, Doen antwoorde al tvolc met eender stemmen seggende, Alle die woorden die de HERE geseyt heeft, sullen wi doen.

4

Doen screef Mose alle de woorden des HEREN ende stont des morgens vroech op, ende maecte eenen outaer onder aenden berch met .xij. pileerkens na den .xij. geslachten van Israel,

5

⁺ende sant daer .xij. iongelinghen vanden kinderen van Israel, dat si brantoffer daer op offeren souden, ende vreedoffer den HERE, te weten .xij. stieren.

+ B vers 5

6

Ende Mose nam die helft des bloets in een becken, die ander helft sprengde hi opten outaer,

7

ende nam dat boec des verbonts, ende riep voor die ooren des volcx, Ende als si seyden al wat die HERE geseyt heeft, dat willen wi doen, ende gehoorsaem sijn,

8

so nam Mose dat bloet, ende besprengde tvolc daer mede seggende, siet, dit is dat bloet des verbonts, dat welcke die HEERE met v gedaen heeft bouen alle dese woorden

9

Ende Mose ende Aaron, Nadab, ende Abihu, ende dye tseuentich ouderen van Israel gingen op,

10

ende si ^a sagen den God van Israel. Onder sijn voeten wast gelijc eenen steen van Saphieren wercke, ende ghelijc die gedaente des hemels als hi claer is,

a God sten dat is een openbaringhe sien van God

11

ende hi en liet sijn hant niet ouer die vernaemste van Israel, ende als si God ghesien hadden, so aten ende droncken si.

12

Ende die HERE sprac met Mose, coemt op tot mi op den berch, ende blijft aldaer, dat ic v geue twee steenen tafelen ende de wet, ende de geboden die ic gescreuen had die ghi hen leeren sult,

13

Doe ginc Mose op ende zijn dienare Iosua, ende clommen opten berch Gods,

14

Ende Mose

[p. *]

sprac tot den Ouders, ⁺ Blijft hier tot dat wi weder tot v comen, siet, Aaron ende Hur sijn bi v, heefter yemant eenige sake, die laet tot hen comen.

+ D vers 14

15

Als Mose opten berch quam, bedecte een wolcke den berch,

16

ende die heerlicheit des HEREN woonde opten berch Sinay, ende bedecte den berch .vi. daghen metter wolcken, ende die HEERE riep Mose ten .vij. daghe wter wolcken,

17

Ende dat aenscouwen der heerlicheyt des HEREN, was ghelijc een verterende vier opten top vanden berge, voor den kinderen van Israel,

18

ende Mose ginc midden in die wolcke, ende clam opten berch ende bleef opten berch veertich dagen ende veertich nachten.