Den Bybel met groter neersticheyt ghecorrigeert (Liesveltbijbel 1542)

Hier worden menigerley insettingen ende rechten onder malcanderen bescreuen.

Dat .xxiij. Capittel

1

⁺GHy en sult v geender onnutter tidingen aentrecken, dat ghi eenen godloosen mensche bistant doet, ende een ongerecht getuyge sijt.

+ A vers 1

2

Ghi en sult der menichten niet volgen totten quade, ende voort gerecht niet antwoorden dat ghi metter menichten vanden rechte wijct.

3

Ghi en sult des armen saken niet bewimpelen.

4

Als ghi ws vyants osse oft ezel ghemoet so dat hi doolt dyen suldi weder thuys brengen,

5

als ghi des geens ezel siet die v haet onder den last liggen, so en suldyen niet verlaten, maer ghi sult hem ophelpen.

6

Ghi en sult dat recht der armer menschen, nyet buygen in sijnder saken. Sijt verre van valschen saken.

7

Den ontsculdigen ende den gerechtigen en wilt niet dooden, want ic en rechtuerdige den godloosen niedt

8

Ghi en sult geen giften nemen, want die giften verblinden den scherpsiender, ⁺ ende verleyden die rechte saken.

+ B vers 8

9

Die vreemdelingen en suldi niet verdrucken, want ghi kent der vreemdelingen herte, want ghi ooc een vreemdelinc geweest sijt in Egypten landt.

10

Ses iaer suldy v lant besayen, ende sijn vruchten vergaderen,

11

inden seuenden iare suldijt laten liggen ende rusten, op dat die armen van uwen volcke daer af eten, ende watter ouerblijft, laet dat wilt des velts daer af eten. Also suldi ooc doen met uwen wijngaerden ende olijfgaerden

12

Ses dagen suldi arbeyden, mer den seuenden dage suldi vieren, op dat uwe osse ende ezele ruste, ende v ioncwijf, soon, ende vreemdelinck haer vermaken.

13

Al dat ic v geseyt heb dat hout. Ende der ander goden namen en suldy niet gedencken, ende wt uwen monde en sullen si niet gehoort worden.

14

Driemael suldy my feest houden inden iare,

15

Te weten, feeste der ongeheefder brooden suldy mi houden dat ghi seuen dagen ongeheeft broot eet, so ic geboden hebbe inder tijt der maent Abib, want inder seluer sidy wt epypten getrocken, mer en verthoont v niet ydel voor mi

16

⁺Ende dye feeste als ghi uwen arbeyt eerstwerf oostet, dien ghi opten velde ghesaeyt hebt.

Ende die feeste der vergaderingen inden wtganc des iaers, als ghi v vruchten vergadert sult hebben vanden velde.

+ C vers 16

17

Driemael inden iare suldy v verthoonen voor den HERE, den regeerder van al dat onder v manlijc is

18

Ghi sult dat bloet mijns offers niet offeren neffens den heefdeech, ende dat vet van mijnder feesten, en sal niet blijuen totten morgen.

19

Dat eerste vanden eersten vruchten des veldts suldy brengen in dat huys des HEREN ws Gods Ende ghi en sult dat bocxken niet coken, al die wile dattet aen sijnder moeder melc is

20

⁺Siet ic seynde eenen engel voor v henen, die v behoeden sal inden wege, ende in die stadt brengen dye ick v bereyt hebbe.

+ D vers 20

21

Daerom wacht v voor sijn aensicht, ende hoort sijn stemme, ende en verstoort hem niet want hi en sal uwe misdaet niet vergeuen, ende minen naem is in hem.

22

Ist dat ghi sijn stemme hoort ende doet al dat ic v seggen sal, So sal ic uwer vyanden vyant sijn ende uwer tegen partijen, tegen partijdiger sijn.

23

Als mijn Engel voor v gaet, ende brengt v aen de Amoriten, Hethiten, Pherisiten, Cananiten, Heuiten ende Iebusiten,

24

ende als icse dode, So en suldi hare goden niet aenbidden, noch hen dienen, ende na hare wercken en suldi niet doen, Mer ghi sult hare afgoden afdoen ende breken,

25

ende ghi sult den HERE uwen god dienen, so sal hi v broot ende uwen wijn gebenedijen Ende alle siecten sal hi van v keeren

26

Binnen uwen lande en sal nyemant alleene noch onnruchtbaer sijn, Ic sal tgetal uwer dagen veruullen.

27

Ic sal mijn vreese voor v henen seynden ende dooden alle tvolc daer ghi comen sult. Ende ic sal v alle v vianden in de vlucht geuen,

28

ic sal horsselen voor v seynden die voor v veriagen sullen die Heuiten, Cananiten ende Hethiten

29

Ic en salse in eenen iare niet wtstooten voor v, Op dat, dat lant niet en verwoeste, ende dat de wilde dieren niet vermenicht en worden tegen dy,

30

Ic salse allenskens voor v wtstoten, tot dat ghi vast ende dat lant besidt,

31

ende ic sal v palen stellen die roode zee, ende der Philistinen zee ende die woestijne tot aen dat water. Want ic sal dye inwoonders des lants in v hant geuen, dat ghise voor uwen aensicht wt sult stoten,

32

Ghi en sult met hen, noch met haren goden geen verbont maken,

33

mer laetse in v lant niet wonen, op dat si v niet sondich en maken tegen my, Ist dat ghi haren goden dient, het sal v qualicken vergaen,