Den Bybel met groter neersticheyt ghecorrigeert (Liesveltbijbel 1542)

Die HEERE beueelt Mosi te maken dat heylichdom, ende al wat daer toe behoort.

Dat .xxv. Capittel

1

⁺ENde die HERE sprack met Mose segghende,

+ A vers 1

2

segt den kinderen van Israel, dat si mi een hefoffer geuen, ende neemt dat van een yegelijc, diet ghewillichlijc geeft.

3

Ende dit is dat hefoffer dat ghy van hem nemen sult, gout, siluer, metael,

4

geel side, schaerlaken, rosetroot, witte ghetweernde side, geyten hayr,

5

roode rams vellen, hemelblau vellen, vueren hout,

6

olie voor die lampen, specerie tot salue, ende tot goeden rueckwerck,

7

Onixsteen, ende edele steenen tot eenen lijfrock, ende tot eenen borstlap.

8

Ende si sullen mi een heylichdom maken, dat ic bi hen woone,

9

Nader gelijckenis van eenen beworpe dat ic v thoonen sal, met al dat daer toebehoort, also suldy dat maken.

10

Mer die arcke van vueren houte, twee ellen ende een halue sal die lencte sijn, ⁺ anderhalf die breyde, ende anderhalf die hoochte, Ende ghi sultse met louteren goude ouertrecken binnen ende buyten,

+ B vers 10

11

ende maect daer bouen al om ende omme een gulden croone,

12

ende ghiet vier gulden ringen, ende doetse aen haer vier hoecken, also datter twee ringen zijn op een side, ende twee op dander side,

13

ende maect hantbomen van vueren hout, ende ouertrectse met louteren goude,

14

ende steectse in die ringen aen de arcke, datmense daer mede draghen mach,

15

ende si sullen in die ringen bliuen, ende daer wt niet gedaen worden,

16

ende ghi sult in die arcke dat getuychnis leggen, dat ic v geuen sal.

17

Ghi sult ooc eenen Ghenaden stoel maken van louteren goude, twee ellen ende een halue sal die lencte zijn ende anderhalf die breede,

18

ende ghi sult twee ^a Cherubim maken, van ghesmeden goude, op beyde den eynden vanden Genaden stoel,

a Cherubim, dat waren beelden, ghelijcmen nv de engelen scildert.

19

Dat dye een Cherubim si aen dit eynde, ende die ander aen dander eynde, ende also sullen daer sijn twee Cherubim aen des Ghenaden stoels eynden.

20

Ende die Cherubim sullen haer vloghelen wt spreyen ouer al, dat si den Ghenaden stoel bedecken met haren vlogelen, ende haer aensichten sullen deen tegen den anderen staen, ende haer aensichten sullen opten Genaden stoel sien,

21

Ende ghi sult den Genaden stoel bouen op die arcke doen, ende op die arcke leggen dat ghetuychnis dat ic v gheuen sal.

22

Van daer sal ic v betuygen, ende met v spreken, te weten, vanden Genaden stoel tusscen die twee Cherubim die opter arcken des getuygenis is alle dat ic door v den kinderen van Israel ghebieden sal.

23

⁺Ghi sult ooc een tafel maken van vueren houte, twee ellen lanc, ende een elle breet, ende anderhalf elle hooch,

+ C vers 23

24

ende ghi sultse ouertrecken met louteren goude Ende een gulden crone al om ende om,

25

ende eenen lijst daerom, een hantbreet hooge, ende een gulden crone om den lijst,

26

Ende ghi sult vier gulden ringen daer aen maken, aen die vier hoecken bi sijn vier voeten,

27

vast onder den lijst, sullen die ringen sijn, datmen daer hantboomen in doen mach ende die tafel dragen,

28

ende ghi sult die hantboomen van vueren houte maken, ende ouertreckense met goude datmen die tafel daer mede draghe.

29

Ghi sult ooc sine scotelen, lepelen, cannen, scalen van louteren goude maken, datmen daer mede wt ende in giete,

30

Ende ghi sult altijt thoonbroot op die tafel leggen.

31

Ghi sult ooc eenen candelaer van gesmeden louteren goude maken, ende wten opgaende schacht sullen armen comen met coppen, knoopen ende bloemen.

32

Ses armen sullen wt sinen schachte ter siden wtcomen, wt elcker siden drie armen,

33

een yegelic arm sal drie coppen gelijc als amandel noten hebben,

34

ende drie knoppen, ende drie bloemen, dat sullen die ses armen vanden candelaer sijn, Maer den schacht des candelaers sal vier coppen, knopen ende bloemen hebben,

35

onder elck twee armen, dye welcke wt den scacht des candelaers comen, eenen knoop

36

Want beyde, te weten den knoop ende die armen sullen wt den schacht comen, ende dat al van ghesmeden goude.

37

Ende ghi sult bouen op seuen lampen maken, dat si tegen malcanderen lichten,

38

ende keerssnutters ende blusuaten, van louteren goude,

39

van hondert pont fijns gouts suldi dat maken, met al zijn gereetscap,

40

Ende siet toe dat ghijt maect na dat beworp dat ghi opten berch gesien hebt.