Den Bybel met groter neersticheyt ghecorrigeert (Liesveltbijbel 1542)

¶ Hoe God Abrahe openbaerde ten anderen male dat Sara eenen sone hebben soude, ende hem ooc verthoonde hoe hi Sodoma ende Gomorra soude laten vergaen

Dat .xxviij. Capittel

1

⁺ENde die HERE openbaerde hem in dat dal Mamre, als hi sadt aen dye duere sijnder woningen, als den dach ten alder heetsten was,

+ A vers 1

2

ende als hi zijn oogen ophief, ende sach, doen stonden drie mannen teghen hem Ende doen hijse sach, liep hi hen te gemoete vander dueren sijnder woningen, ende buychde hem voor hen neder, opter aerden, ende seyde

3

HERE heb ic genade geuonden voor uwen ogen, so en gaet niet voorby uwen knechte

4

⁺Men sal v een luttel waters brengen, ende uwe voeten wasscen, ⁺ ende rust v onder den boom,

+ B vers 4

+ mat. xij.

5

Ende ic sal v een beetken ^a broots brengen dat ghilieden v herte laeft, dan suldy voortgaen, want daerom sidi tot uwen knecht comen, Si spraken, Doet also als ghi ons geseyt hebt

a By dat broot verstaetmen inder scriftueren, al dat den menscen van noode is Genesis xxviij.d

6

Abraham haeste hem tot Sara inder woningen ende seyde, Haest v ende menget drie maten bloemen vanden mele knedet ende bact koeken,

7

Hi liep totten runderen ende haelde een seer goet calf, ende gaft den knape, die haeste hem ende bereydet,

8

Ende hi droech op boter ende melc, ende vanden kalue dat hi bereydt hadde, ende settet hen voor ende ginc voor hen staen onder den boom, ende si aten

9

Doen spraken si tot hem, ⁺ Waer is v wijf Sara? Hy antwoorde, daer binnen inder wooningen,

+ i.pe. ij.a

10

Doen seyde hi, Ouer een iaer, nader tijt dat die vrucht geleuen can sal ic weder tot v comen, so sal Sara v wijf eenen sone hebben, Dat hoorde Sara, want si stont achter dye duere der wooningen,

11

ende si waren beyde Abraham ende Sara out ende wel bedaecht, so dattet Sara niet meer en ghinc nader vrouwen aert,

12

daerom loechse bi haer seluen ende seyde, Nv ic out ben, soude ic noch met welluste omgaen, ende mijn Heere is ooc out.

13

Doen sprac die HERE tot Abraham, Waeromme lacht Sara, ende seyt, ⁺ Meyndy dat waer is dat ic noch baren sal, ende ic toch out ben,

+ Dat rijc van griecken beginnet .M. vij.c. ende lvi. iaer voor Cristus gheboorte als de wereldt ghestaen hadde .iij.m.ccc. ende xliiij. iaer

14

sout dan den HERE dat te swaer sijn? tsijnder tijt sal ick weder tot v comen nader tijt dat die vrucht geleuen can, so sal Sara eenen sone hebben,

15

Doen loochendet Sara ende seyde, Ic en hebbe niet gelachen, want si vreesde, Mer hi seyde. Ten is so niet, ghi hebt ghelachen.

16

Doen stonden die mannen op van daer ende keerden hen tegen Sodoma, ende Abraham ginc met hen op dat hise gheleyde,

17

Doen seyde die HERE, Hoe can ick Abrahame verborgen, dat ic doen sal?

18

Aengesien hi in een groot machtich volc werden sal, ende alle volc der aerden sullen in hem gebenedijt worden,

19

want ic wete hy sal beuelen sinen kinderen ende sinen huyse na hem, dat si des HEREN wegen houden ende doen dat recht ende redelijc is, ⁺ Op dat die HERE op Abraham laet comen, alle dat ghene wat hi hem belooft heeft.

+ C vers 19

20

Ende die HEERE sprac, Daer is een gheroep te Sodoma ende Gomorra, ende dat is groot ende die sonden die sijn seer swaer,

21

daerom wil ic afuaren ende sien oft sijt lieden alle ghedaen hebben na den roep die voor my gecomen is, oft dat alsoe niet en is, op dat ict weten mach.

22

Ende die mannen keerden haer aensicht ende gingen te Zodoma, Maer Abraham bleef staende voor den HERE ende ghinc tot hem ende seyde.

23

Wildi dan den rechtuerdighen met den ongodlicken te nyeute doen?

24

Het mochten misschen vijftich rechtuerdige inder stadt zijn, soudi die ooc te niete doen, ende dien hoec niet vergeuen om der .l. gherechtighen wille, die daer in waren?

25

⁺Dat si verre van v dat ghi dat doen sout ende dooden den gherechten metten godloosen dat die gherechte si als de godlose Dat si verre van v, ghi die alder werelt rechter sijt, ghi en sult alsulcken recht niet doen.

+ D vers 25

26

Die HERE sprac, Vinde ic .L. gerechtige te Sodoma inder stadt, so sal ic om haerder wille al den hoecken oft plaetsen vergheuen.

27

Abraham antwoorde ende seyde, Och siet ick heb mi onderwonden te spreken metten HEren, hoe wel ick stof ende asschen ben.

28

Het mochte misscien vijf min dan vijftich gerechtighe daer in sijn, soudy dan alle dye stadt verderuen om der vijf wille, Hi sprack, vinde icker in .xlv. so en sal icse niet verderuen.

29

Ende hi voer voort met hem te spreken, seggende, Men mochter misschien .xl. daer in vinden. Maer hi seyde, Ic en sal hen niet doen, om der .xl. wille,

30

Abraham sprac, En weest niet gram mijn HERE, dat ic noch meer spreke, Men mochter misschien .xxx. daer in vinden Ende hi antwoorde, vinde icker .xxx. daer in soe en sal ic hen niet doen,

31

Ende hi seyde, Och siet, ick hebbe my onderwonden te spreken met minen HEren, Men mochter misschien .xx. daer in vinden. Hi antwoorde, Ick en salse niet verderuen, om der .xx. wille,

32

ende hi sprac Och en weest niet gram mijn HERE dat ick noch eens spreke, Men mochter misschien .x. daer in vinden, Maer hi seyde, Ic en salse niet verderuen om der thienen wille

33

Ende die HERE ginc wech, doen hi met Abraham wt geseyt had, Ende Abraham keerde weder tsinent waert.