Den Bybel met groter neersticheyt ghecorrigeert (Liesveltbijbel 1542)

Hoe dat Abram die besnijdenisse ontfangt, ende Isaac hem belouet werdt daeromme dat Sara lachte, ende der Sodomiten verderuenisse wort voorseyt

Dat .xvij. Capittel.

1

⁺ALs nv Abram .xcix. iaer out was, openbaerde hem die HERE ende sprac tot hem Ic ben die almachtighe God, wandelet voor mi, ende weest sonder veranderinge

+ A vers 1

2

ende ic sal tusschen mi ende v mijn verbondt setten, ende ick sal v wter maten seer vermeerderen,

3

Doen viel Abram op sijn aensichte.

Ende God sprac breeder tot hem ende seyde,

4

Siet ick bent, ende hebbe mijn verbont met v, ende ghi sult een vader van veel volcx worden,

5

daerom en suldi niet meer Abram heeten, mer Abraham sal uwen naem sijn, want ic heb v gemaect van veel volcx een vader,

6

ende sal v wtermaten seer vruchtbaer maken, ⁺ ende wil volcken van v maken, ende daer sullen ooc coningen van v comen.

+ B vers 6

7

Ende ic sal mijn verbont tusschen mi ende v setten, ende uwen sade na v, ende haren nacomelinghen dat een eewich verbont si, Also dat ic v God si, ende ws saets na v,

8

Ende wil v, ende uwen sade na v, gheuen dat lant daer ghi een vreemdelinc in sijt, te wetene dat geheele lant Canaan ter eewiger besittinghen ende ic sal haer God sijn

9

Noch seyde God tot Abraham, so hout dan mijn verbont, ghi ende uwe saet na v,

10

Dat is mijn belofte die ghi houden sult tusscen mi ende v, ende uwen sade na v, ende hare nacomelingen,

11

Alle wat manlic is onder v sal besneden werden, ende ghi sult dat slofken van uwen vleessce snijden, Ende dat sal een teeken sijn des verbonts tusscen mi ende v,

12

Ende een yegelijc knechtken wanneert acht dagen out is suldijt besnijden, ende uwe toecomelingen,

13

Des selfs geliken ooc alle wat uwe gesin is te huys geboren, oft gecocht oft anders vreemt ende niet uwe saet en is, ⁺ Also sal mijn verbont in uwen vleessce zijn ten eewigen verbonde

+ C vers 13

14

Ende waer een knechtken niet besneden en wert aent slofken zijns vleeschs, diens siel sal wtgeroeyt worden wt sinen volcke, daeromme dat hi mijne verbont, niet gehouden en heeft.

15

Ende God sprac noch tot Abraham Ghi en sult v wijf Sarai niet meer Sarai heeten mer Sara sal haren naem zijn,

16

want ic wilse gebenedien, ende van haer wil ic v eenen soon geuen, dien wilic gebenedien ende veel volcx sal van hem comen, ende coningen ouer veel volcx,

17

Doen viel Abraam op zijn aensichte ende loech, ende seide in zijn herte, soude mi die hondert iaer out ben een kint geboren worden, ende Sara tnegentich iaer out baren.

18

Ende Abraham

[p. *]

sprac tot God, Och dat Ismahel leuen soude voor v

19

Doe seyde God Ia, Sara v wijf sal v eenen sone baren, dien suldy Isaac heeten, want met hem sal ick mijn eewich verbont oprechten, ende met sinen sade na hem

20

Daer toe van Ismael heb ic v ooc verhoort, siet ick heb hem gebenedijt, ende wil hem vruchtbaer maken ende vermeerderen seer, twaelf vorsten sal hi voortbrengen, ende sal hem tot eenen grooten volcke maken,

21

Maer mijn verbont sal ic oprechten met Isaac dien v Sara baren sal te deser tijt ten naesten iare

22

⁺Ende hielt op met hem te spreken, ende Godt voer op van Abraham,

+ D vers 22

23

Doen nam Abraham sinen sone Ismael, ende alle die knechten die daer ten huyse geboren waren, ende alle die hi gecocht had, ende al wat van mans naem was in sinen huise, ende besneden tslofken van haren vleessce, inden seluen dage so hem God beuolen had,

24

Ende Abraham was .xcix. iaer oudt, als hy dat slofken sijns vleeschs besneedt

25

Ismael was .xiij. iaer out, doen tslofken sijns vleeschs besneden wert,

26

Effen op eenen dach werden si alle besneden Abraham, zijn sone Ismael

27

ende wat van mans naem in sijn huys was, daer te huys geboren ende ghecocht, oft anders vreemt.. Het wert al met hem besneden

[afbeelding]