Liber Magstri Avicenne

[32]

Het es vrese te snidene vanden stene ouden lieden. want de wonde mach cume emmermeer genesen. Eer men kindren of ouden lieden snidet sal mense setten in .1. bad ende laten den steen weyken. ende dus salmer toe gaen ¶ Eist .1. kint of een ander. so sal .1. starc man tkint setten op beide sine knien metten lendenen. ende men sal den man slaen .1. doec om sinen hals ende om des kints benen ende onder sine armen gebonden. entie man sal met elker hant .1. been houden. Entie meester sal knielen op sine knien. ende leggen een

[p. 105]

dicke plaester onder des kints navel ende leggen sine .4. vingere alle gestrect opt plaester. ende duwen den lichame utermaten zere. so dat de steen sciete in den crop van der blasen. Ende vander ander hant die .2. vingere sal hi steken int fundament also diepe alse hi mach. Ende tast hi der dan dat moru es. so eist de vijc. so en sal hi niet sniden ende salne weder striken opwert Ende tast hi dan dat hart es. so eist een steen. so sal hine boven driven metter hant ende metten .2. vingeren so hi naest mach in den crop vander blasen ten vede wert. dan suldi den steen houden met .3. vingeren dat hi niet en kere. dan suldi nemen een sceers ende sniden opten steen .1. wonde lanx niet meerre dan die steen uut comen mach dat die wonde saen genesen mach. dan suldi nemen enen holen lepel ende vaten den steen metten leple ende trecken ute. Dan salmen tarwen bloeme werpen in die wonde. ende laet der op liggen droge stoppen. Ende dan leggen den zieken in siin ruste. Ende wet dat men niet vervaert en sal siin al loop dorine ter wonden ute .4. dage of .5. want die wonde sal wel genesen ¶ Ende es die vijc daer dat moru si. so salmen den zieken doen orbaren ende maken van watere dat stopt ende dat heilende es. alse water der rute in gesoden es ende rosen ende alsene ende regen water