Roman van Lancelot (1846-1849)

Roman van Lancelot

(1846-1849)–Anoniem Lanceloet– rechtenstatus

Auteursrechtvrij

naar het (eenig-bekende) handschrift der Koninklijke Bibliotheek

Vorige Volgende


XI. Hoe die [coninc] Lancelote bel[ach ende] hoe dat Lanceloet strijt h[adde]. Nu seget ons die aventure, Dat quamen toten coninc Arture, Ten selven dage dat hijt geboet Te hem te comene te Karmeloet, 5565[regelnummer] Ridders so vele, datmen vordien In langen niet meer hadde gesien, Noch op ene wile wesen so groet Ridderscaps binnen Karmeloet. Mijn her Walewein was doe genesen, 5570[regelnummer] Die sere siec hadde gewesen; Soedat op dien selven dach Dat daer tridderscap vergadert lach Sprac tote Arture den coninc: ‘Here, ic rade u ene dinc, 5575[regelnummer] Ende het donct mi sijn nutscepe, Dat kiest u te desen ridderscepe Alsoe vele ridders sonder sparen Alse joncsten verslegen waren Dore mire vrouwen der coninginnen, 5580[regelnummer] Ende eer gi porret van hier binnen Die ridders maect nu ter stonde Gesellen vander tavelronde In der gerre stede die sijn doet, Soe dat dit geselscap alsoe groet 5585[regelnummer] Alst te voren was blive in al, Ende dat wi hebben onse getal, Dats hondert ende viftech. Ic segt om goet; Es dat sake dat gi dus doet, Al u geselscap saels wesen 5590[regelnummer] Te beter, ende gi sult bi desen
[pagina 225]
Over al te meer sijn ontsien Waer gi comt, sijt seker van dien.’ Alse dit horde die coninc Hi priesde wel dese dinc 5595[regelnummer] Ende seide dat hijt gerne dade, Ende riep te hant te rade Sine hoge barone, ende bat Dat si kisen souden ter stat Onder hare liede sonder sparen 5600[regelnummer] Die beste ridders die daer waren, Alsoe vele alsere tier stonde Gebrake in die tavelronde; Ende dat si niet dore aermode En liten te kisene die goede. 5605[regelnummer] Si seiden dat sijt gerne daden, Ende gingen hen daer baraden. Int irst si daer ane spraken Hoe vele daer hen gebraken, Ende si vonderre in gerechten getale, 5610[regelnummer] Alsise ghetelt hadden wale, Dattere .lxxij. gebraken. Alte hant na desen saken Hebben sire also vele daer gecoren Alser hen gebrac te voren, 5615[regelnummer] Ende hebbense geset, sonder sparen, Inder gerre stat dire doet waren, Ende in Lanceloets stede Ende in sire gesellen mede: Maer onder hen allen en was 5620[regelnummer] En geen so stout, alsict las, Dat hi dorste bestaen mede Te sittene in dopperste stede. Ende ic segt u in warre dinc, Dat in Lanceloets stede sitten ginc 5625[regelnummer] Een riddere, die was genant Her Lyam van Yrlant; Ende dese was oec becant Die beste riddere diemer in vant, Ende vander meester name doe, 5630[regelnummer] Ende hi was conincs kint altoe. Ende daer sat in Bohorts stede Een die conincs kint was mede, Die goet riddere was ende crachtech Van wapinen ende van vrienden machtech, 5635[regelnummer] Ende die Helynon was genant. In Hestors stede sat, alsict vant, Van Scollant een riddere coene, Seker ende starc van allen doene, Ende hiet Vadaän die coninc. 5640[regelnummer] Hi was fel in allen dinc, Ende sere pijnlijc mede Ende vol van groter verweenthede. In Lyoneels stede sat, alsict las, Een riddere die doe maech was 5645[regelnummer] Des conincs van Nort-Gales, Een goet riddere, sijt seker des, Over edel ende weert becant, Ende die godertierste diemen vant. Sijn name was, sijt seker des, 5650[regelnummer] Gaherijs van Nort-Gales. Alse dit was gedaen al bi staden, Bi sconincs ende bi Waleweins raden, Die taflen waren gereet: men sat Ten taflen doe ende men at. 5655[regelnummer] Daer dienden vorden coninc tien stonden, Ende vor die vander tavelronden, Sevene coninge, die hilden dan Van Arture leen, ende waren sine man. Daerna gereiden si alle haer vaert 5660[regelnummer] Te vaerne ten orlogewaerd. Opten anderen dach daernaer Porden uter steden daer Sulke dusent man, die hadden gere Lancelote te doene dere, 5665[regelnummer] Ende des conincs Bans geslachte, Met wille ende met machte. Alse die coninc messe hadde gehort Porde hi selve uter port, Ende met hem vele baroene, 5670[regelnummer] Die stout waren ende coene: Ende reden dien dach dat si quamen Tenen castele, di hiet bi namen Lambor. Daer lach snachs inder stede Die coninc ende sijn geselscap mede; 5675[regelnummer] Ende opten anderen dach daernaer Soe voren si alle van daer, Ende reden soe hare dachvarde, Dat si bider Joyosergarde Quamen gehinde ere halver mile. 5680[regelnummer] Si merkeden le dire wile Dien casteel ende dat werc, Dat si vonden wonderlijc sterc, Soe dattie casteel niet ontsach Geen volc dat was onder den dach. 5685[regelnummer] Ende si gingen loetgieren Alle daer neven der rivieren, In tenten ende in pavilione Ende in fulgien di waren grone; Maer dit was in enen dele 5690[regelnummer] Herde verre vanden castele, Vorder dan een man diet wel vermochte Men enen selfscote scieten dochte. Ende die daer waren met Arture Loetgierden daer dien dach dure. 5695[regelnummer] In deser maniren soe waren Gelogirt daer des conincs scaren, Ende al gereet om tontfane Hare viande, na minen wane, Opdat si ute wilden varen. 5700[regelnummer] Die van binnen den castele waren Ridders vangroter stouthede Ende van groter manlijchede. Si hadden utgesent optien nacht Ridders daer te voren van groter macht 5705[regelnummer] In enen bosch, die stont daer bi, Om there te bestane, alse si Haren tijt ende poent sagen, Van dier stede daer si bedect lagen, Soe dat sise in deser maniren 5710[regelnummer] Beide mochten asselgieren, Die vanden castele, alsi poent sagen, Ende die daer inden bosch lagen. Die van binnen ne temayerden Hen niet dattie andere lotgirden, 5715[regelnummer] Ende dat si oec wel sagen Bat sise daer alsoe belagen; Maer si seiden in allen manieren Si soudense laten lotgieren, Ende laten in die irste nacht 5720[regelnummer] In paise ende hare macht; Maer si soudense asselgieren Opten anderen dach in maniren Dat si poent ende stede sagen. Die gene die inden bosch lagen 5725[regelnummer] Waren .l. ridders bi getalle, Die goet ende waerd waren alle; Ende Bohort ende Hestor waren Leitsmanne van derre scaren. Ende die gene die binnen bleven 5730[regelnummer] Hadden hen een teken gegeven, Ten welken tiden dat si sagen Ene roede baniere wagen Optie meeste veste van daer binnen, Dat si dat licteken souden kinnen, 5735[regelnummer] Ende te hant uten bosche varen Ende slaen in des conincs scaren; Ende die vanden castele mede Souden dan varen uter stede. Aldus soudemen te dien tiden 5740[regelnummer] Dat here bestaen in tween siden.
[pagina 226]
Die menechte die inden bosch lach Sach ten castelewaerd alden dach, Oft die gene dire binnen bleven Hen enech teken souden geven 5745[regelnummer] Ute te varne; maer noch van dien Condense geen teken gesien, Want Lanceloet in gere maniren Ne wilde niet laten asselgiren Dat here inden irsten dage; 5750[regelnummer] Maer hi wilde dat lage Den irsten dach in goeden vrede Ende dien nacht oec [daer mede]. Bi desen werden die vanden here Verbout ende versekert mere 5755[regelnummer] Dan si te voren waren, Ende spraken onder hen daer naren: ‘Waerd alsoe dat Lanceloet Vele liede hadde ende here groet, Si waren in allen manieren 5760[regelnummer] Utcomen ende ons asselgieren; Bedie alsment wel besiet, Die gene en es altoes ridder niet, Die gerne dangier ende pant Doget dus van sinen viant.’ 5765[regelnummer] Alse min her Lanceloet dit gesach, Dattene die coninc Artur dus belach, Dien hi so gemint hadde, sonder waen, Ende die hem meest eren hadde gedaen, Hi kinde mede wel te hant 5770[regelnummer] Dat hi was sijn doetslagen viant, Ende meerre dan enech man. Hi werd herde sere drove dan, Ende werd soe sere tongemake, Hine wiste wat doen vander sake. 5775[regelnummer] Niet bedi dat hi den coninc Iet sere ontsach van eneger dinc, Maer om dat hi doe herde sere Minde den coninc, ja, vele mere Dan hi dede enegen anderen man, 5780[regelnummer] Die hem niet na en ginc an. Hi sprac ene joncfrouwe ende bat hare Dat si toten coninc Artur vare, ‘Ende sult seegen minen here, Dat mi wondert barde sere 5785[regelnummer] Dat hi heeft begonnen op mi Aldus grote orloge, bedi In waende niet, ha minen waen, Soe vele jegen hem hebben mesdaen, Dat hi sculdech ware te miward 5790[regelnummer] Alsoe te doene alsi nu gebart. Seget hi dan dat dese onminne Es om mire vrowen wille, der coninginne, Dat hem daer ave hebben gedaen Enege liede nu doen verstaen 5795[regelnummer] Dat ic hem hebbe gedaen daer an scande, Soe segt hem dan altehande Dat ic ben gereet, ende dat wel love, Jegen twee ridders vanden hove, Die beste dire nu sijn binnen, 5800[regelnummer] Mi te verwerne in allen sinnen, Dat ic niet met waerheiden en bem Daer af mesdadech jegen hem. Ende om sine grote werdechede, Ende om sine minne oec mede, 5805[regelnummer] Die ic hebbe al hier te voren Bi quaden, valscen ocsoene verloren, Soe suldi hem bieden over mi, Dat ic mi sal werpen wilt hi, Int recht ende int wijsdoem al 5810[regelnummer] Dat mi sijn hof daer af wisen sal. Ende seget hi dan of ander side Dat hi heeft nu te tide Begonnen dit orloge soe groet Op mi om sire neven doet, 5815[regelnummer] Van dire doet suldi dan secgen hem Dat ic niet soe mesdadech en bem Dat hi sculdech ware daerbi Van doetveden te haten mi. In ben so mesdadech niet, in wille loven 5820[regelnummer] Te blivene in wisdome van sinen hoven. Ende en wilt hi niet dan vangen an En geen van desen tween, segt hem dan Dat ic hem ontbiede bi u Dat ic sal ontbeiden nu 5825[regelnummer] Sire cracht, bi mire trouwe, Ende dat sal sijn met groten rouwe Die ic hebbe omden evelen moet Die tuscen mi ende hem wesen moet. Dat wete die coninc ende si seker des, 5830[regelnummer] Nadien dat dorloge begonnen es, Dat ic sal hulpen den minen Ende na mire macht deren den sinen. Maer sijns selfs lichame, sect hem nu, Versekeric na mine macht, secgic u, 5835[regelnummer] Ende dat hi mi niet en dar vresen; Maer ic sal hem een bescermere wesen Na mire macht jegen die goene Die hem deren setten te doene; Bedie ic houde hem in allen kere 5840[regelnummer] Over minen gerechten here, Ende over vrient, al ne comt hi Niet alse vrient versoeken mi, Maer alse een groet viant Van doetveden, dats wel becant. 5845[regelnummer] Joncfrouwe, dit suldi hem doen verstaen, Dat ic hem dit ontbide, sonder waen.’ Die joncfrouwe antwerde daer te desen: ‘Die boetscap sal wel gedaen wesen.’ Die joncfrouwe porde metter vard 5850[regelnummer] Ende voer ten coninc Arturward, Ende dede hare boetscap groet ende smal, Alsoe alse hare Lanceloet beval: Sine liets achter niet een word. Ende alse min her Walewein dit hord 5855[regelnummer] Spranc hi op, ende seide saen: ‘Here, die scade die u heeft gedaen Lanceloet an u vriende ende an u Hebdi macht te wrekene nu, Ende hebdi wille alse coninc vri 5860[regelnummer] U te wrekene, alsoe als gi Vermeten hebt, dat gi met crachte Nederen sout conincs Bans geslachte, Die bi harre groter verwoethede, Ende bi haerre groter overdaet mede, 5865[regelnummer] Ende bi haerre groter ongenade U hebben gedaen so grote scade, Die u nieman heden den dach, Sonder God selve versetten mach, Soe dat gi onteert sout wesen, 5870[regelnummer] Ende al u geslechte bi desen Genedert soude werden embermere, Dat wi nembermeer gecregen ere, Gevielt dat gi pays maket nu Hier tuschen Lancelote ende u.’ 5875[regelnummer] - ‘Her Walewein,’ sprac die coninc saen, ‘Die sake es soe verre gegaen, Lanceloet ne gecriget nembermere Pays jegen mi in negenen kere; Ja, alsoe lange alsic blive 5880[regelnummer] Levende hier in desen live, Om gene saken die Lanceloet Doen oft geven mach, clein oft groet. Nochtan es hi man van ertrike Dien ic best sculdech ben lichtelike 5885[regelnummer] Ene grote mesdaet te vergevene; Want hi hevet in sinen levene Vele meer dore mi gedaen Dan enech ander man, sonder waen. Maer int inde eest daertoe brocht, 5890[regelnummer] Dat hijt mi so dire heeft vercocht,
[pagina 227]
Dat hi dat nu heeft genomen Dat mi nembermer mach wedercomen, Van minen vleescheliken vrienden, Die mi minden ende dienden, 5895[regelnummer] Ende die ic oec meest minde Van alden genen die ic kinde, Sonder oec alleenlike u. Hierbi en mach niet gescien nu Enech pays tuscen mi ende hem. 5900[regelnummer] Bider trouwen die ic sculdech bem Gode onser alre vader ende here, Walewein, dit versekeric u embermere.’ Die coninc kerde hem sonder beide Ter joncfrouwenwaerd, ende hi seide: 5905[regelnummer] ‘Joncfrouwe, gi moget doen verstaen Uwen here al sonder waen Van dien dat hi versoect an mi, Dat ict nine doe, ende dat hi Seker mach wesen al dien tijt 5910[regelnummer] Dat ic leven sal te hebbene strijt; Ende hine gecriget nembermere Pays jegen mi in genen kere Binnen minen live op genen dach Om gene sake die gevallen mach.’ 5915[regelnummer] - ‘Sekerlike,’ sprac die joncfrouwe, ‘Het es scade groet, bi mire trowe, Ende merre van u dan om ander dine; Bedie gi sijt, here, her coninc, Een der machtechster, secgic u, 5920[regelnummer] Die levet in die werelt nu, Ende vander meester name tot desen. Gi sulter bi al gedestrueert wesen Ofte daer ombe laten u leven, Oft die vrode sijn tscerne gedreven, 5925[regelnummer] Die hebben ten menegen male Van uwer doet gehouden tale. En es geen twivel van desen, Die vrode mans di hebben gewesen In onsen tiden, di te sprekene plagen 5930[regelnummer] Van stucken die si vorsagen, Die dinge, die si vanden lieden Te secgene plagen, sine gescieden Int inde alsoe, sonder waen, Alsi int begin daden verstaen; 5935[regelnummer] Want si seiden vanden geslachte Van coninc Ban, dattet met machte Te boven soude comen van al Sinen vianden, groet ende smal. Ende gi, her Walewein,’ sprac si doe, 5940[regelnummer] ‘Die bi rechte vroet sout sijn daertoe, Gine donct mi niet in desen Alsoe vroet alse gi sout wesen. Gi sult hier jagen uwe doet, Dat mogedi selve sien al bloet. 5945[regelnummer] Bedinct u wat gi tere uren Saget int palais van aventuren Tes conincs Vischers, ter selver tijt Dat gi daer saget ane den strijt Vanden lupaert ende vanden serpente. 5950[regelnummer] Bedacht u van dien contente Wel, ende vanden wondere mede Die gi daer saget tier stede, Ic ben herde seker van dien, Dit orloge en soude niet gescien 5955[regelnummer] Opdat gijt beletten mocht nu. Maer uwe ongeluc jaget u Hiertoe, ende u ongeval, Dat u hierna wel scinen sal; Bedie gi sult van desen hier naer 5960[regelnummer] Bedroeffenesse hebben so swaer, Als gi niet en sult mogen Ontkeren die grote orlogen.’ Die joncfrouwe ginc van hem saen Ende quam vorden coninc gegaen 5965[regelnummer] Ende seide: ‘Here, nadat ic an u En gene antwerde vinde nu, Noch in gene maniren mede Van payse genadechede, Maer orloge ende groten nijt, 5970[regelnummer] Ic sal wederkeren nu ter tijt, Ende sal min here doen verstaen Wat gi hem ontbiet, sonder waen.’ - ‘Vard als gi wilt,’ sprac die coninc, ‘Mi es lief dat gi hem segt die dinc.’ 5975[regelnummer] Die joncfrouwe voer danen metter vard Ende voer te haren hereward, Ende quam daer in stilre ware, Datmen nine wiste van hare. Alsi vore Lancelote doe quam, 5980[regelnummer] Ende hi dat ane hare vernam, Dat hi niet bi eneger dinc Pays mochte vinden anden coninc, Hi was sere tongemake Ende drove oec bi deser sake; 5985[regelnummer] Niet bedi dat hi op dien dach Den coninc iet sere ontsach, Maer bi dat hi sinen here Den coninc minde alsoe sere. Hi es in ene camere gegaen, 5990[regelnummer] Ende werd versuchtende saen In swaren gepense ende in dipen, Soe dat hem die trane liepen Ute sinen ogen bedichte Ende spreitden op sijn ansichte. 5995[regelnummer] Alsi dus een stic daer hadde gewesen Die coninginne quam daer binnen desen Ende werd sijns pensens geware. Si was een stic bi hem dare Eer hi wiste dat si daer was. 6000[regelnummer] Doe werd si hem vragende das, Twi dat hi so drove ware? Ende Lanceloet antwerde hare, Dat hi drove ware om di dinc, Dat hi nine mochte anden coninc 6005[regelnummer] Pays vinden no genadechede. ‘Niet bedi dat wi teser stede Hem iet duchten op desen dach, Dat hi ons iet grote dere doen mach; Maer ic segt bedi, sonder waen, 6010[regelnummer] Dat hi mi hevet gedaen Soe vele dogeden ende eren, Dattet mi sere soude deren Geviele bi mi, teneger uren, Sinen lichame sware aventure.’ 6015[regelnummer] - ‘Here,’ seit si, ‘men moet ter noet Op sine cracht sien: si es so groet. Maer wat micti te done nu? Segt mi dat, des biddic u.’ Lanceloet seide hare: ‘Twaren, 6020[regelnummer] Wi selen mergen utvaren Om vechten jegen dat here; Ende dien God wilt geven di ere Hebse in Goedsname, bedi En sal niet bliven bi fauten van mi, 6025[regelnummer] Wine selen utvaren hen te jegen Die den casteel hebben belegen. Nadien dat ic met genen saken Minen pais jegen hen mach maken, Ic ben die gene die vort an 6030[regelnummer] Niet sparen ne sal genen man, Sonder minen here den coninc, Die ic om ne gene dinc, Daer icken kinnede, nu dade Enege swaernesse oft scade.’ 6035[regelnummer] Doe litense haren raet staen, Ende Lanceloet ginc int palays saen Sitten onder sine baroene, Ende toende hem blider in sinen doene Dan hem sijn herte gaf binnen. 6040[regelnummer] Daer was geten met minnen.
[pagina 228]
Na den etene begonste vragen Lanceloet een deel van sinen magen Ende van sinen hemeliken rade Wat si riden wat hi best dade 6045[regelnummer] Metten orloge daer si in waren? Ende si seiden hem alle sonder sparen: ‘Latewi ons dus lange sluten Ende wi niet en varen buten, Die gene die sijn [int here] mede 6050[regelnummer] Si selen ons houden nu gerede Over geaffalgiert ende quaet. Ende beter ward, nadien dat staet, Dat wi eer ut hadden geslegen Ende hadden hen gevaren jegen, 6055[regelnummer] Dan wise in deser manieren Liten rusten ende logieren.’ Lanceloet sprac: ‘En roke u van dien; Bidien dat si dit an ons hebben gesien Dat wi op hen nine pongierden 6060[regelnummer] Alsi quamen hier ende lotgierden, Si sijn te sekerre in haren sin Ende dochten ons vele te min, Ende si wanen wel daerbi Dat hier nieman binnen ne si. 6065[regelnummer] Maer ic hope, al sonder waen, Dat si dat wel selen verstaen Eer morgen avont lijt. Wi selen uttrecken ter tijt Morgen te primtide met goder hopen, 6070[regelnummer] Ende selen dan soe op lopen; Ende hierombe so biddic u, Dat gi u so gereit alle nu, Dat wi morgen mogen utvaren Tilike met onsen scaren.’ 6075[regelnummer] Ende desen raet prisden si al Die daer waren, groet ende smal; Want si hadden groten gere Te vergaderne an Arturs here; Ende hen gaf grote coenhede 6080[regelnummer] Ende grote herte oec mede Dat si dus hadden van haren accorde Mijn her Lancelote ende Bohorde, Om dat dese waren namelike Twe manne van ertrike 6085[regelnummer] Van alder meester stouthede, Ende vanden meesten ridderscap mede. Si daden gereiden hare wapen Alden nacht dore haren knapen, Elkerlijc na sinen wille. 6090[regelnummer] Si hilden hen dien nacht al stille, Datmen wel waende int here Henlieden winnen sonder were, Ende seide datmen die van binnen Lichtelike soude mogen winnen. 6095[regelnummer] Maer die coninc wilde niet geloven Daer ne waren vele liede boven Inden casteel met Lancelote doe. Mador gaf antwerde daertoe: ‘Here, daer sijn binnen al nu 6100[regelnummer] Vele liede, dat secgic u Over ene gerechte waerhede, Ende goet, waerd ridderscap mede.’ Mijn her Walewein vragede waerbi Hi dat wiste? Doe seide hi: 6105[regelnummer] ‘Here, ie weet wel sonder waen. Ic lite u min hoeft afslaen En sidise niet met haren scaren Eer margen none utvaren, Ende ons oplopen soe sere, 6110[regelnummer] Dattie stoutste van desen here Vrese sal hebben van dien Dat hi ane hen sal sien.’ Die twee heren waren dien nacht Wel ende rikelike bewacht, 6115[regelnummer] Datmen lettel mochte tien tiden Mesdoen ane eneger siden. Sanderdages, alse houde, twaren, Alse die vanden castele utewaren Ende si gereet hadden sonder falge 6120[regelnummer] Hen selven ende hare battalge, Si daden te hant utsteken Ten torre haer roede teken. Ende alse dat roede teken sagen Die gene die inden bosch lagen, 6125[regelnummer] Si toendent daer ter stede Bohorde ende Hestore mede. Alse Bohort dit hadde gesien Hi sprac ten gesellen nadien: ‘Hier nes els niet te doene nu 6130[regelnummer] Dan op te sittene, secgic u; Bedie wi mogen wel weten Dat min here es opgeseten. Laet ons metter vaerd utslaen, Ende dit here so vaste bestaen, 6135[regelnummer] Soe dat wi vellen met stouten done Tenten ende paulione, Ende al dat wi vinden op ende weder, Dat wijt al vellen ter neder.’ Si antwerden hem van desen, 6140[regelnummer] Dat hijs seker mochte wesen, Si souden na harre macht deren Haren vianden ende confunderen. Dus sijn si uten bosce gevaren Daer si in bedect waren, 6145[regelnummer] Ende liten hare paerde gaen Ten stilsten dat si mochten, sonder waen. Nochtan worden die vanden hare Altehant hens geware, Die haer paerde hebben vernomen, 6150[regelnummer] Die op hen terdende sijn comen. Men riep daer ten wapenen, datmen horde Inden casteel dese worde, Ende seiden dat haer liede waren Vergadert doe an gene scaren, 6155[regelnummer] Ende dat els en ware doe Anders niet te done daertoe, Dan dat si opt here tien tiden Vergaderen tere andre siden. Ende si gingen alsoe doen. 6160[regelnummer] Lanceloet dede die porten ontoen, Ende si voren ut doe te waren Geordineert met haren scaren. Tirst dat Bohort uten bosche quam Daer bi sconincs here vernam, 6165[regelnummer] Hi versach comen met groter vard Des conincs Yons broder op een groet part, Wel gewapent ende rikelike. Tirst dat elc anderen sach kinlike Si liten lopen doe haer parde 6170[regelnummer] Elc op anderen met groter varde. Des conincs broder op Bohorde soe stac, Dat sine glavie in sticken brac; Ende Bohort stakene soe sere weder, Dat hine droech vanden perde neder, 6175[regelnummer] Ende hem ne mochte te staden staen Scilt no halsberch, sonder waen, Hine stac dorden lichame bede Dyser ende die glavie mede, Soe dat hi lach in ommacht 6180[regelnummer] Ende in vresen van sire cracht. Ende die andere die hem volgeden naer Slogen in genen here sonder vaer, Ende worpen wech ende weder Tenten ende paulione neder. 6185[regelnummer] Si slogen doet ridders ende paerde, Ende worpent al ter aerde Dat quam in haren gemote, Ende tordent onder hare vote. Doen begonstmen in geen here 6190[regelnummer] Lude ropen ende oec sere:
[pagina 229]
‘Ten wapenen! Ten wapen!’ te waren, Die gene die ongewapent waren. Als min her Walewein des geware ward Riep hi om sine wapine ter vard, 6195[regelnummer] Alse dire daer hadde te doene. Ende hi ende des conincs baroene Wapenden hen al sonder sparen, Alse die wel seker ne waren Naden gerope dat daer ward. 6200[regelnummer] Tirst dat coninc Artur op sijn part Was geseten ende met hem die gone Die daer doe waren, sine barone, Ende hi sine tente vor hem sach, Dat si ter nedergewarpen lach, 6205[regelnummer] Ende hi den drake liegende verstoet, Die opten appel vander tenten stoet, Ende daertoe neder sach vallen Die andere tenten daer met allen..... Ende al dit dede Bohort di hopen, 6210[regelnummer] Ende Hestor, dat si waenden belopen Den coninc Artur met desen doene Binnen sinen paulione. Ende alse min her Walewein gesach Dwonder dat si daden opten dach 6215[regelnummer] Togedijt den coninc Artur mettien, Ende seide: ‘Ginder mogedi sien Hestore ende Bohorde, Die op u doen grote morde, Ende die ons hebben beraden 6220[regelnummer] Vele pinen ende vele scaden.’ Her Walewein voer ut metter vard Ende keerde op Hestore sijn part, Ende gaf hem enen swaren slach, Die hem soe sere verwach, 6225[regelnummer] Dat hi ware nedergevallen Van sinen orsse met allen, En hadde gesijn dat hi sijn part Metten halse gegreep ter vart. Ende min her Walewein, die dien here 6230[regelnummer] Haette van doetveden sere, Als hine aldus tonder sach, Hi sloech op hem noch enen slach Dat hine neder nicken dede Al op sijns paerts hals daermede, 6235[regelnummer] Soe dat hi moeste bi dien doene [Hem] houden vore an die artsoene. Ende alse Bohort dat versach, Dat min her Walewein dus oplach Hestore ende soe cort daer helt, 6240[regelnummer] Dat hine nalike hadde gevelt Ter neder, hine mochs niet laten Hine moeste hem staen in baten, Ende sloech op Waleweine so haerde Men enen scarpen swaerde, 6245[regelnummer] Dat hi dat swaert, al sonder waen, Soe dipe dede in sinen helm gaen, Dat her Walewein werd daernaer Biden slage, die groet was ende swaer, Tebarenteert sere utermaten, 6250[regelnummer] Ende heeft Hestore gelaten, Ende van Bohorde alsoe sciet Al verdovet, dat hi en twint niet Ne wiste tien tiden waerward Dattene droech daer sijn pard. 6255[regelnummer] Aldus begonste die batalie Groet ende wonderlijc, sonder falie. Ende die vanden bosce waren comen Hadden alle op geweest genomen Van des conincs Arturs scaren, 6260[regelnummer] Bedie dat harre so lettel waren; Maer dat hen stonden in staden Die vanden castele ende hebben beraden. Tirst dat si an hen vergadert waren, Die vanden castele met haren scaren, 6265[regelnummer] Daer mochtmen sien slage groet, Ende liede met rouwen slaen doet. Si toenden daer varinge wel Dat elc andrenwaerd was fel, Ende dat si drogen groten nijt 6270[regelnummer] Elc tandrenwaerd tier tijt; Bedie daer werd verslagen tien tide Soe vele liede an elke side, Dat en geen man die nu levet, Die dat herte soe hart hevet, 6275[regelnummer] Hem ne soude ontfermen van dien Datmen daer doe mochte sien. Boven hen allen doe tien tiden, Die daer waren in beiden siden, Soe dadent wel in dien wijch al bloe 6280[regelnummer] Mijn her Walewein ende Lanceloet. Die historie doet ons verstaen Dat min her Walewein was so bevaen Met rouwen van Gariëts doet, Dat hi om dien rouwe groet, 6285[regelnummer] Die hem int herte soe sere woech, Inden selven dage daer versloech Dertich ridders met sinen handen, Die daer waren van sinen vianden, Sonder die andere die daer ter stont 6290[regelnummer] Van hem aldaer waren gewont, Ende sonder die grote scade mede Die hi met stoten, met slagen dede. Ende hine werd, sonder sage, Noit moede in dien dage, 6295[regelnummer] Maer sijn wesen gedurde tier ure Toter vespertijt alden dach dure, Ende soude hebben geduert alsoe Alvort toten avonde toe, En hadde Bohort niet gewesen, 6300[regelnummer] Die inden wijch gemoette desen. Tirst dat elc andren heeft versien Liep elc anderen op mettien, Ende begonsten daer onder hen tween Onderlinge vechten, dat wel sceen; 6305[regelnummer] Want dat vechten werd wreet ende fel, Ende men soude gesien hebben wel Den besten van hen daer haestelike, Ne mare dat alle gemeinlike, Die gene die omtrent hen waren, 6310[regelnummer] Inslogen al sonder sparen, Soe dat daer begonste di strijt Sere wreet ende fel tier tijt, So datter menech goet man ende werd Te dier tijt verslegen werd; 6315[regelnummer] Soe dattie van binnen tier tijt Wel mochten hebben verloren den strijt, Bedie dat minder waren haer scaren Dan der gerre die int here waren, En hadde Lanceloet niet gewesen 6320[regelnummer] Ende sine drie gesellen tot desen, Bohort, Hestor ende Lyoneel, Die daer daden meer dan haer deel. Maer Lyoneel doe ter selver tide Sciet al gewont uten stride 6325[regelnummer] In die luchterc scoudere, sonder waen, Dat hem her Walewein heeft gedaen. Tirst dattie nacht quam, di van den here, Die gemoit ende gepint sijn sere, Sijn in haer loetsen gevaren, 6330[regelnummer] Ende die van binnen waren Keerden in haren casteel mede. Tirst dat si waren in haer stede Si besagen hoe vele si ter tijt Liede hadden verleren inden strijt, 6335[regelnummer] Ende si vonden daer, in waren saken, Dat hen hondert ridders gebraken, Sonder die seriante die waren Doet geslagen in hare scaren. Ende hier en haddense bate gene, 6340[regelnummer] Sonder dertich ridders allene,
[pagina 230]
Die si inden wijch hadden gevaen Ende daer binnen bracht, sonder waen. Tirst dattie vanden here quamen In hare tenten si vernamen 6345[regelnummer] Dat ben tweehondert ridders gebraken, Datse rechte gram mach maken. Na etene spraken si een deel Vanden genen die waren inden casteel, Ende seiden: ‘Gewaerlike nu was Lanceloet 6350[regelnummer] Inden casteel niet sonder genoet, Die goede liede waren ende cone, Ende machtech in haren done.’ Men gaf Waleweine ende Lancelote Alden prijs van alder rote, 6355[regelnummer] Ende seiden dat dese twee ridders, twaren, Die beste van beiden siden waren. Die ene gingen resten bi nachte Ende die andere gingen ter wachte. Ende wachten den nacht al dure 6360[regelnummer] Omt here, op daventure Oft die van binnen op hen quamen, Dat sise niet ombewaerd opnamen. Opten selven avont sprac in di stede Lanceloet sine gesellen mede 6365[regelnummer] Ende dede hen aldus verstaen: ‘Nu hebdi geleert, al sonder waen, Wat connen doen die vanden here, Ende oft si sijn van starker were. Gi hebse geproeft, so doen si u; 6370[regelnummer] Maer des hebbe God danc nu, Sine dorren niet sere verbliden Van dien dat si hier nu ten tiden Hebben gewonnen, al hadden si Meer volx opt velt dan wi. 6375[regelnummer] Danc hebbe God vanden trone, Het es ons nu comen scone, Dat wi ons hebben bider Gods cracht Behouden jegen so grote macht! Nu laet ons over een dragen saen 6380[regelnummer] Wat wi margen selen anegaen, Ende hoe wi striden selen numere. Ic wilt wel, wout onse here, Dat wi mochten onse dingen Tenen eerliken inde bringen, 6385[regelnummer] Soe dat wire ere af gewinnen, Als wi hebben gehad int beginnen. Nu segt mi uwen raet daertoe, Wat u wille es datmen doe; Bedie en sal niet doen van desen, 6390[regelnummer] En sal bi uwen rade wesen.’ Si rieden datmen ut soude varen Opten anderen dach sonder sparen. Lanceloet antwerde hen mettien: ‘Nu laet ons onder ons besien 6395[regelnummer] Wie margen irst utvaren sal.’ Bohort seide: ‘Ic sal utvaren vor al.’ Doe sprac Hestor: ‘Ic sal utvaren Metter andere battalge, twaren.’ Heliser, des conincs Pelles soene, 6400[regelnummer] Een stout riddere ende een coene, Seide dat hi soude, sonder falge, Leiden daer die derde batalge Metten genen die hi daer brochte, Dat wel tweehondert ridders wesen mochte. 6405[regelnummer] Een riddere, die van Soroloes was, Ende hertoge van Ayoel, alsict las, Die goet man was, sekerlike, Leide die virde batalge rike; Soe dat si vanden lieden die daer waren 6410[regelnummer] Ordinerden te leidene acht scaren; Ende in elke batalge van desen Mochten wel hondert ridders wesen; Ende in die achterste was Lanceloet Met groter macht, oft ware noet. 6415[regelnummer] Si gingen na desen besien Die gewonde liede; ende mettien Dat Bohort sinen broder sach, Lyoncle, die daer gewont lach, Wet wel, dat hi om die sake 6420[regelnummer] Gram was ende tongemake; Ende hi sprac doe dese worde, Aldaer menech riddere toehorde: Hi soudene wreken daer af Op hem die hem die wonde gaf, 6425[regelnummer] Mocht hire te poente comen an, Waerd Walewein, waerd ander man.

Vorige Volgende