[957]
Boudin de Jonghe, sone van Arnoudt den Ouden, was de vierde grave van Vlaenderen, hadde te wive vrouwe Machtilt, shertoghen Hermans dochter van Sassen; dese Boudin regneerde iij jaer in Vlaenderen, binnen der tijd dat sijn vader noch levede, om dat sijn vader zeere out was van jaren, ende onmoghende. Dese Boudin dede vele dueghden ende proffijts den lande van Vlaenderen; hy ordineerde steden, ende die dede hy bevesten, ende bemuren, als Ypere, Berghen, Duunkerke, Brugborch, Cassel, Dixmude, Roesselare, ende Cortryke ende meer andere steden, ende hy gaf hemlieden vryheden, ende omme dat men in Vlaenderen niet vele gelts en hadde, daeromme ordeneerde hy de comanschepe te stane op permutatie, dats in barteren oft wisselen, dat een dinc, om een andere; dese grave was seere devoet ende hy en regneerde niet langhe naer sijns vaders doot, ende starf van den pocken op den Nieudach, ende Machtilt sijn wijf, naer d'overlyden van hem, nam te manne Godevarde den hertoghe van Eenham, waer by dat so hadde iij sonen, te weten: Gocelijn, Godevarde en Enceline, ende regierde Vlaenderen vj jaer, omme dat Arnoudt haer sone te jonc was.
Auteursrechtvrij