[881]
Boudin de Caluwe, Boudin Yserins sone, dese vorseiden Boudin Yserin ierste grave van Vlaenderen hiet Boudin de Yzerin, om dat hy ende sijn paert daghelijcx ghewapent waren. Sijn sone, Boudin de Caluwe, was de tweeste grave van Vlaenderen, ende regneerde xxxix jaer, onder viij coninghen van Vrankeryke, denwelken hy alle manschip dede, te weten: Lodewyke, Boudene, metten schoenen baerde, sinen oem, die Judiths broeder was, ende onder sine twe rechtzwers, bastarde van sinen vorseiden oem Karlemanne, ende Lodewyke, ende onder den coninc Hughe, den voght van den Sotten Karle, ende onder Otten, den anderen voght, ende onder sinen rechtzwier Kaerlen den Sotten, des conincx Lodewijcx wettelyke sone, ende onder den coninc Robbrecht, ende onder den coninc Rodulfus. Deze grave Bouwin hadde te wive Eltruden, de dochtere van Egfriedt, Adelwaerdts sconincx van Ingelandt sone, ende sy hadden te gadere den groeten ende schoenen ende stouten Arnodt, dewelke dede maken den cloester te Blandin, dat men nu ter tijd heet te Sente Pieters te Gendt. Hy levede zeere langhe, ende met groeten payse; hy starf in 't jaer Ons Heeren IXc ende xviij, 's anderdaghs, nar xiij dach; hy leghet begraven te Sente Pieters te Gendt.
Auteursrechtvrij