Kronyk van Vlaenderen

[p. 14]

[863]

Bauden de Yserin, Andakers sone, de seste ende de achterste forestier van Vlaenderen, hy verwoen vele heydenen, hy halp den coninc Lodewijc de Goederthieren winnen Constantinoble ende Andronoble, daer hy vele yeeren onder de kersten behaelde, ende in 't jaer VIIJ^c ende lxiij comende van Constantinoble te Vrankeryke waert, soe vant dese Boudin Yserin de schoene Judith, conincx Karels Caluwen dochtere te Senlys, met der sustere van den coninc Lodewijc vorseit, derwelker Judith de vorseide Boudin ontschakede, ende voerdese op sijn borch te Brughstoc, in Vlaenderen, ende hy hadde by hare ij cnapeline kinderen, d'een Kaerle, die te sinen xij jaren starf, ende Bouwen de Caluwe. Dit verhoerede de coninc Karle de Caluwe, haer vadere, hy vergaderde te Parijs een groet here, ende hy quam neder tot Atrecht omme Boudene met orlogen te schoffierene, ende buten Atrecht by sente Loysberge, soe schoffierde Bouden Yserin de Franssoizen, ende de coninc wart daer ghewont, soe dat hy by noede vloet te Parijs, ende des jaers daer naer sende de coninc Karle de Caluwe Ancelmus, den bisschob van Riemen, met vele der edelsten van der croene in Vlaenderen, omme Boudin d'Yserin ende Judith te verwatene, naer eene decretael, by Gregorius te Parijs gheordineert, jeghen de ontschakers; ende de bisscop meende te vermalendye al dlandt van Vlaenderen. Boudin d'Yserin dit verhoerende, hy trac den vorseiden bisschop te ghemoete oedmoedelyken biddende, dat hy hem dies verdraghen wilde, mar de Franssoysen sloughen stappans op Boudine, ende op sijn volc, mar Boudin Yserin met sinen volke, dat hy daer met hem hadde, verslouch de Franssoysen, vinc se, ende maecte se vluchtich; daer bleef versleghen dese vorseide bisschop Ancelmus. Dit verhoerende de coninc Karel de Caluwe, van Boudins vromicheyt, ende oec merkende dat Boudin hadde by

[p. 15]

Judith sijnder dochtere twe cnapelen kindere, hiet tracteeren om een bestant van eenen jare, dwelc alsoe wart gheconsentheert en an beeden zyden, ende binnen den tyden van den bestande, soe voeren Boudin Yserin, ende Judith te Roeme tot den paus Nicolaus, dieze biede absolveerde en trauwede, ende sende de paus needre ij cardinale tot den coninc, bevelende ende ghebiedende dat hy in dat huwelic soude consentheren. De coninc hoerende des paus meeninghe by rade van den ij cardinalen, ontboet Boudijn Yserin ende Judith sijnder dochtere, dat zy te Parijs comen souden, by letteren van zekerheden ende van saufconduite. Boudin en Judith commende te Parijs waren wel ontfaen, ende Karle de Caluwe, haer vadere, ordeneerde eene rykelyke feeste te Aussare in de stede, dewelke viij daghen lanc geduerde, ende in die feeste hy makede Boudin Yserin, grave van Vlaenderen, ende alsoe began 't graveschip van Vlaenderen, ende hy dede hem gheven den lichame van van Sente Donaes, conffessoer ende aerdtsbisschop van Riemen. Boudin dede desen heyligen lichame bringhen in de burch te Brugghe, ende dede daer breken een cleene capellekin van Onser Vrouwen, dewelke Liederijc van Haerlebeke hadde ghedaen maken; hy dede dit capellekin meerderen, ende vautheeren alsoe men nu den choer in de burch te Brugghe daghelijcx sien mach, gaf daer ende stelde Sent Donaes lichame, ende stelder monneken, die de vij ghetijden doen souden, ende hy dede den steen maken van der vanghenessen, ende d'oude scepenenhuus, dwelke binnen 's graven Lodewijcs tyden van Male te broken was, in 't jaer Ons Heeren M. CCC. ende lxxvij, ende daernaer hermaect, alsoe men nu des daghs sien mach. Hy regneerde als grave xvj jaer, starf in 't jaer VIIJ ende lxxxj, ende leght begraven te Sente Bertins.