Het keurboek der stad Diest

Bijvoegsels aan het codex B in de 16^e eeuw toegebracht.

178.	Van het vleesch. Tot art. 26. Item, sullen oic alle deghene die enige rendere slaen of doen slaen, om voert te vercoepene gesoden off ongesoden, binnen hueren huysen off elswaer, zonder int vleeschuys te comen, hetzy in cabaretten off anderen huysen, dezelve rendere moeten

[p. 49]

	thoenen den gesworenen, gelijc den vleeschouweren, eer zij die sullen moigen slaen, ende opten zelven koire dien de vleeschouweren daeraen verbueren souden.
179.	Tot art. 31. Ende men sal negeen verkensvleesch int vleeschuys ontwe houwen noch beginnen te brekene, daer en sijn te minsten een van den waerdeerderen bij ende over, off, bij absencien van hen, die ene van sambachs ghesworene; ende in gebreke van dien, die twe tyntmeestere; off, bij faute van desen, twe doutste vleeschouwere niet verkensleegers.
180.	Tot art. 38. Item, so wat vleesche van verschen vleesche eensmaels int vleeschuys es geweest te cope, dat en sal men anderwerf niet vercopen bij enich versch vleesch van den yersten maele, noch op die selve bancke, dat en ware yerst afvercocht; op die pene van xxx. s.
181.	Tot art. 41. Item, nieman en zal zijn vee zetten onder zijns meesters vee, noch vercopen, op een pene van c. s.
182.	Item, so wat scape een quade leevere inheeft, die sal men uutsnijden eer ment scaep int Huys brengt, op die pene van xx. s.
183.	Item, nieman en zal hamelvleesch deilen meer dan tveerdel in drien, op een pene van xx. s.
184.	Item, nyemant en sal vleesch brengen int vleeschuys dat niet tuychberich en es, op de pene van x. s.
185.	Item, nieman en zal ouwen vleesch achter sinte Kathelinen dach slaen, om te vercopene, op een pene van xx. s.

[p. 50]

186.	Item, nyemant en sal vleesch vercopen noch copen om voert te vercopene, anders dan om te siedene off te bradene, het en ware drie weeken gesouten geweest, alsoit gewoenlijc es xx. s.
187.	Item, men sal tweerhande vleesch onder een zieden noch vercopen, mer elc bij hem selven, ende tgesoden vleesch mer eens mogen verwermen; ende so wes gebraden es, dat en sal men des anderdaechs niet mogen verwermen, op de pene vorseit.
188.	Tot art. 52. Item, nyemant van den voercopers en sal overbleven vleesch moigen vercopen des anderdaechs, tensij van den waerdeerderen tijerst besien; op de selve pene.
189.	Tot art. 53. Item, nyemant en sal duven eesen tiegen dat hi se vercopen wil, op die pene van x. s.
190.	Van vleesch en visch. Tot art. 53. Item, alle vleesch, worste, pensen ende vesch, dat eens savons overblijft ende ter marct oft onder tHuys te cope geweest es, en sal men sanderdaechs niet vercopen mogen, ensij besien van den waerdeerren, op de pene van. xx. s. Ende soe wat vleesche die waerdeerdere vynden int vleeschuys onbesien na die vijntte, sal gelden den selven coire.
191.	Item, alle worstvleesch sal men int vleeschuys cappen ende bereyden, ende die worste aldaer vullen, ende nyegerins els, oppenbaerlijc metten dage, des morgens nae die vyncke ende savons daervore, op de pene van xx. s.
192.	Nog van visch. Item, soe wye ale vercoept, sal se vercopen beneden staken; soe wie des niet en dade, souds gelden xx. s.; ende sal se setten versceiden uuyt den palin-

[p. 51]

	gen, ende daerop steken enen wympel van jz. ellen hoge, op de pene xxx. s.
193.	Tot art. 61. Item, dat men ghenen rivesch nieman van binnen vercopen en sal, men sallen uuttellen in scilde, op v. s.
194.	Item, men sal enghenen cabbeliau oft anderen vesch, die men snijdt, vercopen, men sal den besten voersniden, ende daernaest den besten altoes vervolgende; ende desgelijcs van vloten ende van de salmen; mer men mach enen cleynen vesch bij de beste snijden om enen yegelijken te geryevene, op xx. s.
195.	Item, als mer xvj. off xx. cabbeljauwe en sijn, dan en sal men mer viere te maele moigen vercopen noch copen; ende also van den vloote; ende van de salmen drie, als er mer x. of xij. en es.
196.	Item, soe wie enich goet van waghenen, ocht van der stad daert op vercocht wort, droeghe roeden verre, en ware ghesien van den inders.......
197.	Item, dat gheen uutvardere meer dan eene mande ocht twee goets trecken en zal vore xj. ure, dat voerseit goet en ware vercocht. Ende soe wie dat meer toghe van den voers. goede, dat ment hem afdeilen mach tot ij. manden.
198.	Item, Otte Nacke sal vercoepen tgoet dat coemt van sinte Gheertrudenberghe, ende Art Snaerderin alle dander goet, van waert comt. Ende hieraf solen se hebben hoer vercoepghelt, ghelijc alst gewoenleec es.

[p. 52]

199.	Item, men sal die vloote maer in vieren deylen, off tveerdel in tween, ende niet meer, zonder muyl off stertten, off anders onredelijc daertoe te doene, op die pene van x. s.
200.	Van recht boven recht te zoeken. So wie recht boven recht suect, sals gelden iiij. Royal.