Het keurboek der stad Diest

[p. 46]

Dit sijn de coeren van den laedere⁽¹⁾ dimen houden zal ende waerderen in der maniren hiernae volghende⁽²⁾. In den eersten:

161.	Item, dat men iiij waerdeerre hebben zal: twee van der vetterien, ende twee van der scoemekerien. Die waerderen zoelen, sgoensdaeghs, opte merct van Dyest, alle ghevedt leder, van binnen ende van buten; ende dat niet ghenoech ghevedt en ware, zouden zij wedersegghen, op zinen coere, van elken velle j. clayken, ende van elken stucke j. parysisen.
162.	Item, soe wie leeder loefde, ocht vercochte, ocht cochte, die waerdeerre en heddent besien, dat waere een dobbel coere.
163.	Item, soe wie dat vuerde ocht droeghe ute der stad, die waerdeerre en heddent besien, die zoude ghelden van elken stucke enen halven guldenen, ende dleder verliesen.
164.	Item, soe wat leeder dat men wederseeght, dat zal men weder inlegghen ende beteren met watre ende met scorssen, ende dat zal men wederbrenghen bi de waerdeerre binnen iij. (dagen? weken?); ende wijs niet en brechte, zouds ghelden, van elken stucke, enen halven guldenen.

(1) Heeft de schrijver wellicht aan de Latijnsche ae gedacht?

(2) De keure van het leder is in A slechts aangewezen, rubr. lxxi.

[p. 47]

165.	Item, men zal gheen calveren- (ocht) perdenscoen maken, zij en zijn beneden vj. dume; ende zoe wie dat dade, zoude ghelden, van elken pare, een half clayken.
166.	Item, soe wat scoen dat te Dyest comen van buten, die en zal men loven, noch copen, noch vercopen, die waerdeerre en hebben se besien. Soe wijt dade, opten coere, van elken pare, j. ouden enghelschen.
167.	Item, nieman en zal enich scoen van buten onder scoen van binnen zetten opte mercht, noch opte vinstere, opten coere, van elken pare, j. ouden engh.
168.	Item, dat nieman touwen en mach dan corduwaen, besaen ende vesschen, op dleeder verloren ende van elken stucke enen guldenen.
169.	Item, dat men engheen leder, dat ghescorst ocht ghelaeft es, vueren noch draghen en zal uut der stad, opten voerseiden coere.
170.	Item, dat gheen coenreider leder touwen en zal, enzij ghetekent metter stad tekene, opte pene van enen halven guldenen.
171.	Item, dat gheen coenreider leder coenreiden en zal met stynkende smoute, opte pene van elken stucke enen ouden engelschen, ende zinen aerbeit verloren.
172.	Item, soe wie calveren- ocht pynken- ocht perdenscoen maken wilt, die zoelen (zijn) twee duymbreet lanc, met palanen van selfter zolen, ocht twee vale echterste ocht ghehouwen. Soe wie anders dade, opte pene, van elken pare, v. vl. g.

[p. 48]

173.	Item, dat nieman daer bi comen en zal daer die waerdeerre waerderen zoelen, op enen desch nae, in beiden ziden, opte pene van enen ouden enghelschen.
174.	Item, soe waer dat men vonde verkelct leder, dat men dat calengeren zoude; want niet te beterene en es, soe zoelent die waerdeerre tot hoen nemen, sheren, ter stad ende ter waerdeerre behoef, op verbeteren van den scepenen.
175.	Item, soe waer men vonde gheherste scoen, opte pene van elken pare enen ouden enghelschen ende de scoen verloren.
176.	Item, dat gheen scoemekere leeder ocht scoen uter stad vueren en zal tot enegher jaermarcht wert, die coermeesters en hebbent besien, opte pene, van elken stucke, enen halven guldenen, ende dleder verloren, ende van elken paer scoen enen ouden enghelschen.
177.	Item, dat die waerdeerre omgaen moghen, ocht dieghene dien zijt bevelen, ter Vetterhuys, ter Touwerehuys, ter Scoemekerehuys ende ter Coenreiderhuys.