Het keurboek der stad Diest

[p. 23]

Codex B.

Dit sijn die statuten ende coeren der stad van Dyest.

1.	Van wapens te dragen en te gebruiken, en van 's nachts uit te gaan. So wie sweert, knijf, mes, scarpordich ende sacheleec, ocht enegherande gheslepen wapen trect op yemanne, hem te quetsene, zaels ghelden x s. Ende wont hine met wapenen die voergh. zijn, ocht in wat anderen maniren dat hine wont, zaels ghelden v lib., sonder ons heren recht.
2.	Item, soe wie yseren stave, coperen stave, wapene, sweerde, knive, messe scarpordich, sachlijc, ocht enegherande gheslepen wapen ocht clippele dreeght, metten daghe zaels ghelden xx s., metter nacht, na die leste clocke, xl. s., ende die wapenen verliesen. Ende die dreeght een idel sceide den voergh. wapene tubehorende, sonder die zelve wapene, metten daghe, hi zaels ghelden x. s., metter nacht xx. s.; hij en ware vreemde.
3.	Item, soe wie yemanne sleet met cluppelen, met steven, met stocken, ocht sleet ocht worpt met stenen, ocht nae yemanne sleet ocht worpt, ocht met eneghen anderen ghewere dan met vuysten, zal ghelden alsulke pene als men ghelt van gheslepenen wapenen.
4.	Item, soe wie metter nacht gheet nae die leste clocke sonder openbaer liecht ocht vuer, en waren die ghene die ter waken gheordineert werden, saels ghelden x. s.; ende

[p. 24]

	maer drie ocht viere te male met enen lichte, ende recht voert. Ende soe wie metter nacht nae die clocke ghewapent gheet, ocht verseeghde wapene, cluppelen ocht ghemaecte stocke, ocht mes dreeght, zaels ghelden xx. s. ende die wapenen ende dmes verliesen.
5.	Van dobbelen en kansspelen. Item, die dobbelt metten daghe zaels ghelden v. s., metter nacht, ocht enegherande wedspel speelt, op x. s. Ende die weert, dijt ghedoeght in zinen huyse ocht hove, zaels oec ghelden: metten daghe v. s., ende metter nacht x. s., hi en onsculdeghe hem met zinen eede dat sonder zinen wetene ghesciet es, ocht sonder zinen wille, ende dat hijt niet benemen en conste; soe sal hi vander mesdaet quite zijn.
6.	Nog van wapens te drage. Item, soe wat weerde zinen gast niet en waernt metter nacht dat hi zijn mes ocht zijn gheslepen wapenen aflegghe, zaels ghelden xx. s. hi en betoene ter waerheit, ocht hi en houde op zinen eet dat hine ghewaernt heeft; ende dan zal die gast ghelden die mesdaet die daerop steet.
7.	Item, die hoeme metter nacht van den richtere ocht van den vorsteren ocht waerdeerren niet en leet besoeken, ocht hem ommekeert daer hem die richtere, ocht vorstere, ocht waerdeerre heyschen omme te besuekene, zaels ghelden xl. s., hij en onsculdeghe hem met zinen eede, waer dat zake dat hij maer van enen ghecalengeert en ware; maer ware hi van hoen tween ocht meer ghecalengeert, soe en soude hem gheen onscout stade doen.
8.	Van tol en accijnsen. Item, soe wij den here zinen tol ende der stad hoere assise besaect, zaels ghelden x. lb.,

[p. 25]

	alsoe dicke als hijt duet; ende met enen ghetughe, ende tgoet verloren.
9.	Item, soe wie tol sculdich es ende buten der porten trocke, hij en hedde zinen tol betaelt, ocht hij ocht zijn weerd en hedden consent des tolneers, souds ghelden v. lb. den here.
10.	Item, soe wie enich comescap dede omme den here zinen tol ende der stad hoer assise tontreckene, souds ghelden v. lb., half den here ende half der stad. Nochtan soude die here zinen tol ende de stad hoere assise hebben.
11.	Van de stadsvesten te beschadigen. Item, soe wie der stad vesten erghert, ocht inwerpt, ocht eerde daeraf ewegh vuert ocht dreeght, zaels ghelden xl, s.; ende met enen man te betoenene. Ende soe wat beesten dat men opten vesten vint, zaels ghelden x. s., alsoe meneghe als er es.
12.	Van de kerken te beschadigen en op het kerkhof te spelen. Item, soe wie die kerke erghert met werpene ocht met schietene, ocht in anderen maniren, zaels ghelden xl. s., ende die scade verstoren. Ende soe wie op eneghen kerchof enich spel speelt, saels ghelden x. s. ende daertoe tspeelgelt verliesen. Ende die enich vuylnesse daer op dreeght, ocht ghebeynte uten vleeschuyse daerop dreeght ocht werpt, saels ghelden v. s.