Jan van Beverley

[p. 14]

Hoe sint Ian die heremijt droncken dranck ende hoe hi sijnder suster vercrachte ende vermoerde. dwelcke hem namaels seer leet was ghelijck ghi hier na hooren sult.

ENde na dese woerden es sint Ians suster in haers vaders hof ghegaen ende heeft daer ghehaelt vanden besten wijne ende vander bester spisen die si crighen conde ende bracht die haren broeder. Die welcke so overvloedelic vanden wijne dranck als dat hy soe droncken wert dat hi niet en wiste wat hy seyde oft dede. Ende die duvel dit merc-

[p. 15]

kende dat hy den goeden man alsoe bedroghen hadde ende tot der dronckenscap bracht dachte in hem selven dat hi hem nu wilde tempteren metter oncuysheit dwelck hi dede ende hi tempteerden soe wtermaten seere als dat die goede man so seere metter oncuysheyt onsteken ende van binnen bernende wert dat hi begheerte creech tot sijnder suster om met haer sijnen wylle te doene ende seyde tot haer aldus.

Desen wijn can doen met vruechden leven
Suster dit es een edel traen¹⁾
Ic werder af verhuecht wel saen²⁾
Dat ict ghevoele al in mijn lijf
Suster ghi sijt een suverlijc³⁾ wijf
Ghi sout mi sciere⁴⁾ al wel behaghen.

Colette

Och broeder hoe dordi⁵⁾ my des ghewaghen
Des verwondert my wel seere
Ghi souwes u scamen voer onsen heere
Ic peyse ghi sijt wt uwen sinne
Oft het gheeft u die viant⁶⁾ inne
Die ons gheerne soude bederven
Ic souder liever die doot om sterven
Eer ic die sonde met u dade
Ghi leerdet my doch in uwen rade
Dat ic alle sonden soude begheven
Ende leyden een suver maechdelijck leven
Dit hebdi my doch selve gheleert
Ooc souden wi daer bi sijn onteert
Want ghi heet een heylich man.

1) Vocht

2) Weldra

3) Schoon

4) Nu ter stond

5) Durft gij

6) Duivel

[p. 16]

 

Die heremijt

 

Suster weet dat icx niet ghelaten en can

 

Dat seg ic u met woerden snel

 

Ic sal met u spelen der minnen spel

 

Weert¹⁾ u leet si ofte lief

 

Ic sal met u doen mijn gherief

 

Ende mijn wille met u bedriven.

Ende na desen heeft hi sijnder suster in beyde sijn armen ghenomen ende werpse foertselinghe²⁾ in dat gras ende deder sijnen wylle mede ende doen hi sijnen wille volbracht hadde wert hi duchtende dat sijt haren vader claghen soude ende seyde in hem selven aldus.

Nu sorch ic boven alle werck
Datsi mi sal te scanden bringhen
Eest dat si seyt van desen dinghen
Ende bederven mi met haren woerden
Het es best ga icse vermoerden
Dat dunct my nu in mijnen ghedachte
Dan dat sy mi te scanden brachte
Ende in eene put gaen steken
Soe en sal nemmermeer mensche weten
Waer dat si es gevaren
Ic en salse niet langher sparen
Ic sal haer rechtevoert³⁾ gaen nemen dleven.

Ende doen hise vermoert hadde so groef hi haer in eenen put om dat⁴⁾ niemant weten soude ende doen hy haer begraven hadde wert hi met so grooten vaeck bevanghen

1) Weder het, d.i. of het

2) Met geweld

3) Dadelijk

4) Opdat het

[p. 17]

als dat hy moeste slapen ende doen hi sadt en sliep rieper een stemme wten hemel ende seide tot hem aldus.

Och Ian wat sonde hebdi ghewracht¹⁾
Ghi waert te male een heylich heremijt
Nu sidy al uwer heylicheyt quijt
Ende van al uwer duecht berooft
Om dat ghi den viant hebt ghelooft
Die u valschelijc heeft bedroghen.
Om dat hi u heeft beloghen
Soe drijft hy nu groote feeste.

Ende doen die heremijt wt sijnen slaep onwaecte was hi wtermaten seere verscrict ende vervaert in hem selven, als dat hi van groter vervaertheyt nauwelijck en conde ghegaen noch ghestaen ende seyde al weenende aldus.

Ic werde verscrict in mijnen gheeste
Hier aldaer ic sadt en sliep
Hoordic dat mi een stemme toe riep
Dat ic van binnen ben verveert
Ic hebbe ghedaen dat mi seer deert
Want mijn consciencie es al versaecht
Och waer sidi schoone maecht
Die alder liefste suster myn
Och heere God waer machse sijn
Ic duchte[t] niet wel met haer en es
Want ic vinde hier al bebloet mijn mes
Ic duchte ic hebber my aen mesgaen
Dat coomt mi nu wel voerstaen
Dat ic wel weet dat icse vercrachte
Ende met foertsen²⁾ daer toe brachte

1) Gedaan

2) Met geweld

[p. 18]

 

Ende dat icse ooc hebbe vermoert.

 

Dat wet ic nu wel rechtevoert

 

Dat dronckenschap des sijt ghewes

 

Wortel van allen quade es

 

Al coes icse voer die minste sonde

 

Het es die meeste van quaden gronde.

 

Nu sie ic wel met mijnen oghen

 

Dat my die viant valschelijc heeft bedroghen

 

Dwelck mi eewelijck sal rouwen.

 

Nochtan en willic my niet mestrouwen¹⁾

 

Ghelijck als Iudas dede

 

Ic wil gaen besoeken die romsche stede²⁾

 

Ende biechten daer mijn sonden algader

 

Voerden paus onsen eertschen vader

 

Ic en weet op eerde mijns anders geen raet

 

Dan den priesterlijcken staet.

Ende na dese woerden heeft die goede heremijt met weenenden ooghen met droever herten ende met grooten berouwe sijnder sonden den wech begonst na Rome om hem te biechten teghen den paus hopende daer penitencie te ontfane³⁾ van sijnen sonden ende daer nae gheabsolveert te werden vanden paus.

1) Wanhopen

2) De stad Rome

3) Ontvangen