Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1611.
Acte van executie vande ommestellynghe.

Myne edele heeren Hoochbailliu ende Schepenen vander Keure der Stede van Ghendt, up tvertooch hemlieden by supplicatie ghedaen by Heuverdeken, Deken ende Proviseerders vanden souverainen Gulde van myn heere S^t Anthuenis, onderhouden binnen deser Stede, hoe zy gheresolveert syn, tot recouvre vande oncosten noodich tot restauratie ende restitutie vanden selven noodighen Gulde in synen ouden goeden eersten staet, tmaecke van eene nieuwe vaene, standaert, teleeden vanden teeckenaere, ende andere ghelycke oncosten den selven Gulde alreede overghecommen, ofte noch in alle occurentien over te commen, te procederen by ommestellynghen, tot laste van alle de guldebroeders vanden voornoemden Gulde, ende specialic nu tot vyf schellynghen grooten tot laste van elc suppost, volghende der acte van resolutie vanden selven Gulde danof synde ghedateert vanden x^e octobris xvi^e thiene te desen ghesien, ende alsoo zy tselve nyet en vermochte ter executie te

[p. 89]

legghen sonder consent, aggreatie ende confirmatie van heurlieder Hoochbailliu ende Schepenen, daeromme sy biddende waeren, soo eyst dat zylieden, Hoochbailliu ende Schepenen, de selve haerlieder goede ende noodighe resolutie gheadvoueert ende gheconfirmeert hebben, lastende ende bevelende dienvolghende wel expresselick, alle diet behoort, hemlieden respectivelick daernaer te reguleren, ende alsoo den tauxe, thuerlieder laste respectivelick alreede ghestelt ofte noch met vulle kennisse van saecken te stellen, ten selven effecte furnieren in handen van haerlieden supplianten ghecommitteerde, authoriserende, in ghevolghe vandien, den eersten officier hierup versocht, omme de deffaillanten daertoe daedelick te bedwynghen, albehoudens behoorlick rekenyngh bewys ende reliqua, die zy supplianten ofte haerlieder ghecommitteerde danof schuldich sullen syn te doene, tallen tyden dies versocht synde. Actum xxviiii^e january xvi^e elfve. (Onderteeckent), J. Hebberecht⁽¹⁾.

(1) Reg. b, f^o xxxiij.