Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

[p. 84]

1611.
Privilegie daerby gheiont is vryheyt van schieten achter lande.

Albert ende Isabel Clara Eugenia, infante van Spaignen, byder gratien Godts, eertshertoghen van Oostenrycke, hertoghen van Bourgoignen, van Lothryc, van Brabant, van Lembourch, van Luxembourch ende van Gelre, graven van Habsbourg, van Vlaenderen, van Artois, van Bourgoignen, van Thirol, Palsgraven ende van Henegouwe, van Hollandt, van Zeelandt, van Namen ende van Zuutphen, marcgrave des heylichs rycx van Roome, heere ende vrauwe van Vrieslandt, van Salins, van Mechelen, vande stadt, steden ende lande van Utrecht, Overyssel ende van Groenynghe, allen den ghenen die dese teghenwoordighe sullen sicn, saluut. Wy hebben ontfaen d'oodtmoedighe supplicatie van Conynck, Hooftman, Deken ende Proviseerders, midtsgaeders de ghemeene supposten ende medebroeders vanden souveraine Gulde vanden coleuvreniers ofte cannoniers ende busschieters, onderhouden binnen onser Stede van Ghendt, onder den naeme, tytle ende patronaetschap van myn heere S^te Anthuenis, inhoudende dat tselve Gulde, van allen ouden ende immemorialen tyden, is gheweest een seer schoon, groot ende notabel Gheselschap, vande ghene exercerende ende beminnende de conste van engiens ende instrumenten van oorloghe, bussen, serpentynen ende coleuvren, respectivelick ter eeren ende bewarenesse van onser Stede van Ghendt, midtsgaeders tot dienste ende assistentie soo vande justitie, als van ons ende vanden lande van Vlaenderen. Ende oversulcx van allen tyden ghehouden ende ghereputeert voor een vry ende gheprivilegiert Gulde, midtsgaeders

[p. 85]

als ghefondeert binnen de stadt van Ghendt, wesende metropolitaine van onsen voornoemden lande ende graefschepe van Vlaenderen, voor souverain ende eenich ressort van alle andere Gulden ende Gheselschepen van ghelycke professie inden selven landen, voor soo veele alst raect de gheschillen ende disputen rysende ter causen van texercitie vande voornoemde conste, oft om andere saecken, danof de voorseyde andere Gulden van oudts ghewone syn te kennen, de welcke midts dat de decisie vandiere meer consisteert inde scientie ende hervarentheyt vande ghene inde voorseyde conste gheverseert synde, dan in rechte ofte ordinaris train van justitie, van allen tyden gheploghen hebben daeromme huerlieder recours te nemen tot het selve Gulde, als tot huerlieder hooftplaetse ende ressort, ten welcken respecte is tvoorseyde Gulde oock eertyden by onse voorsaeten ende naemelick by (hoochlovelicker ghedachten) de Co. Ma^t nyet alleene gheconfirmeert, nemaer oock met diverssche schoone rechten, vryheden ende liberteyten beghift ende ghedoteert gheweest, ten tytle vande welcke ende anderssins deuchdelick de voornomden supplianten ende haerlieden medebroeders ende supposten vry wesende ende gheeedt synde inde selve Gulde, gheuseert hebben, van soo ouden ende langhen tyde datter gheen ghedyncken en is, ter contrarien van paysivelicken met huerlieder handtbussen te gaene achter lande, ende omme haerlieder plaisir, midtsgaeders tot exercitie van haerlieder conste te schietene naer alle ongheprivilegierde voghelen als aentvoghels, duuckers, bruwiers, craeyen, meerlaers, lysters ende alle ander minder voghels, behoudens dat zy noch swanen, oyvaers, reyghers, putoiren, faisanten, pertryssen ofte andere gheprivilegierde voghelen en schoten, volghende de placcaten ende ordonnantien daerup ghemaeckt, sonder dat onse officiers oft van onse vassalen gheorloft is gheweest hem

[p. 86]

lieden ten cause vandien, onder tdexele van eenighe verboden ende ordonnantien, te calengieren ofte huerlieden stock af te nemen, nemaer alsoo de supplianten bevinden, dat, gheduerende de voorleden troublen ende oorloghe, tvoorseyde Gulde ontmaect ende ghespolieert is gheweest, nyet alleene van alle huerlieder gouden ende zelveren juweelen ende ornamenten, soo den Gulde als den Goddelieken dienst angaende, nemaer oock van alle haerlieder privilegien, bewysen, boucken ende documenten, dienende tot verifficatie vande voorseyde rechten, vryheden ende possessie, sonder datmen de selve weet te becommen ende recouvreren, ende dat oock, ten respecte van het placcaet onlanext emmers tsedert de daete vanden tractaete vanden trefves ghepubliceert, angaende tdraeghen vande wapenen achter lande, de voornoemde guldebroeders nyet wel nochte vryelick sonder vreese van calainge en durfven uutgaen met huerlieder stocken, om schieten inder manieren voorseyt, zoo zy van ouden tyde ghewoone syn van doene, hoewel de supplianten nyet en meenen onse intentie gheweest te syne henlieden onder de prohibitie vanden selven placcate te begrypen, midts dat zy alle syn treffelicke persoonen ende van goede ghestaethede, alle an ons midtsgaeders an Heere ende Wet der voorseyder Stede eedt ghedaen hebbende, elck int particulier, die om gheen goedt ter weerelt huerlieder eedt en souden willen te buuten gaen, veelemin yemandt hinderen in lyfve ofte goede, ofte oock anderssins overtreden ende contravenieren de placcaten ende onse ordonnantien, de selve supplianten, omme tvoorseyde Gulde in zynen fleur te mainteneren, tot decoratie vande voornoemde Stede van Ghendt ende tot onsen dienste, nemen huerlieder toevlucht tot ons, biddende oodtmoedelick dat ons ghelieven soude henlieden supplianten, uut sonderlynghe gratie, te consenteren, met huerlieder stocken ofte handt-

[p. 87]

bussen, ten platten lande te moghen gaen ende schieten naer de voorseyde ongheprivilegierde voghels ende passagiers, emmers byde voorseyde guldebroeders doende eedt van naer gheen ander te moghen schieten, ende behoudens van by hemlieden doende blycken van pasport, onder thandteecken vanden Hooftman, Deken ofte ghesworen Clercq ende den seghel ofte cachet secret vanden voorseyden Gulde, van dat zy int selve Gulde vry ende gheeedt syn. Waeromme soo eyst dat wy, de saecken voorseyt overghemeerckt ende hierup ghehadt tadvys van Hoochbailliu, Schepenen ende Raedt der voorschreven Stede van Ghendt, gheneghen wesende ter bede vande voorseyde supplianten, hebben den selven, inder qualiteyt alsboven, gheoctroyeert ende geconsenteert, octroyeren ende consenteren, uut onse sonderlynghe gratie midts desen, dat zy sullen vryelicken ende paisivelick moghen (alst hen goedt duuncken sal) gaen ten platten lande met huerlieder stocken ende handtbussen, ende te schieten naer de voorseyde ongheprivilegierde voghels ende passagiers, midts doende byde voorseyde guldebroeders eedt van naer gheen ander te moghen schieten, ende doende by hen blycken van het voorseyde pasport hierboven vermelt, volghende henne presentatie, ontbieden daeromme ende bevelen onsen seer lieven ende ghetrauwen die Hooftpresidenten ende luyden van onsen secreten ende grooten Raeden, President ende luyden van onsen Raede in Vlaenderen, ende allen anderen onsen rechteren justicieren, officieren ende onder saeten dien dit angaen sal, dat zy de voorseyde supplianten van dese onse teghenwoordighe gratie, octroy, consent ende accordt, upde conditien inder voughen ende manieren boven gheroert, doen, laeten ende ghedooghen, rustelick, vredelick ende volcommelick ghenieten ende ghebruycken, sonder hun te doen noch te laeten gheschieden eenich hinder, letsel

[p. 88]

oft moeyenisse ter contrarien, want ons alsoo ghelieft. Des toorconden, soo hebben wy onsen seghel hier an doen hanghen. Ghegeven in onse stadt van Brussele den xvii^en january int jaer ons heeren duust zes hondert ende elfve. Onderstondt up den ploy: Byde eertshertoghen in hunnen Raede, onderteeckent d'Enghien, ende gheseghelt metten seghel vande eertshertoghen, uuthanghende van rooden wasse in dobbelen steerte van zyden coorden vande coleuren vande serenissime infante, te weten roodt, wit ende blauw⁽¹⁾.

(1) Reg. b, f^o xxix v^o.