Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1566.
Ordonnantie daerby gheordonneert is dat alle guldebroeders van Sente Anthuenis schuldich syn, ter exclusie van alle andere Gulden ende Neerynghen, te staene ten dienste van tselve Gulde.

Alsoo de Hooftman ende Deken vanden ouden Gulde van Sinte Anthuenis, binnen deser Stede, myn heeren Schepenen vander Keure te kennen ghegeven hebben, dat soo wanneer by Heere ende Wet hemlieden ghelast es gheweest (zoo binnen desen jaere om den troublen tydt alsnu regnerende ten diverschen stonden ghebeurt es) te committeren tot zekere ghetal van huerlieder guldebroeders, om de wake tzy by daeghe ofte nachte te houdene, ende hemlieden

[p. 37]

ghereedt te houdene tallen stonden ter conservatie vande ghemeene ruste ende welvaert deser voornoemde Stede, met huerlieder stocken ende behoorelick gheweere, diversche vande selve guldebroeders, als wesende supposten vande vrye Neerynghe vanden vleeschauwers, vischkoopers ende schiplieden, hemlieden niet en vinden, jae weygheren te comparerene, nemende huerlieden excuse dat de Heuverste ende ghesworene vande voornoemde dry Neerynghen, by laste van Heere ende Wet, zekere ghetal van huerlieden supposten committeren, om te waeckene ten selven daeghe ende tyde, als die vanden voornoemden Gulde, oock daertoe ghelast zyn gheweest, waerdeure, soo de voornoemde vertooghers segghen, dicwils ghebeurt dat zy huerlieder guldebroeders in goeden competenten ghetalle niet en connen vergaederen, zoo zy wel wilden ten meesten dienste deser Stede, versouckende midts dien dat myn Heeren daerinne souden willen voorsien soo behoort. Soo eyst, dat Schepenen voornoemt, hieruppe rypelick ghelet hebben, by advyse van myn heere den Hoochbailliu deser Stede, ende by maniere van provisien, ende tot huerlieden wedersech gheordonneert ende ghestatueert, ordonneren ende statueren by desen, dat zoo wanneer by hemlieden ende huerlieder naercommers, den Hooftman ende Deken vanden voornoemden Gulde, inder tydt zynde gheordonneert zyn zal huerlieder guldebroeders te doen vergaederen ende ghereedt te houden ten dienste deser Stede, dat de selve guldebroeders, wie dat die zyn, tsy supposten vande voornoemde drye Neerynghen, ofte van andere Neerynghe deser Stede, negheene uutghesteken, ghehouden sullen syn hem te vinden voorsien met stocken, loot, cruyt ende andere gheweere, ten vermaene ende dachvaert hemlieden ghedaen van weghen huerlieder voornoemde Hoofman ende Deken, ter zulcker plaetsen als zy van weghen Heere ende Wet hemlieden de-

[p. 38]

commeren zullen, sonder dies in ghebreke te zyne, ende alsoo comparerende, zullen gheexcuseert zyn van inde voornoemde huerlieder Neerynghe te waecken ofte elders ten voornoemde tyde te comparerene, ordonnerende den voornoemden guldebroeders ende alle andere hem naer dese ordonnantie te reguleren tot wedersegh alsvooren, ende ditte sonder prejudicie van yemandts preeminentien. Actum den dertichsten octobris xv^e zessentzestich. (Onderteeckent), Prysbier⁽¹⁾.

(1) Reg. b, f^o xj v^o.