Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1562.
Privilegie ende octroy tot innynghen vande dootschulden vande guldebroeders ende guldezusters up haerlieder hoirs.

Philips, byder gracie Godts, Conynck van Castillien, van Leon, van Arragon, van Navarre, van Naples, van Sicilien, van Maiorcque, van Sardaine, vanden eylanden Indien ende vasten landen vander zee Oceane, eersthertoghe van Oostenryck, hertoghe van Bourgoignen, van Lothryc, van Brabant, van Limbourch, van Luxembourch, van Gelre ende van Milanen, grave van Habsborch, van Vlaenderen, van Arthois, van Bourgoignen, Palsgrave ende van Henegouwe, van Hollandt, van Zeelant ende van Namen, van Zuutphen, prince van Zwave, marcgrave des heylichs rycx, heere van Vrieslandt, van Salins, van Mechelen, vande stadt, steden ende

[p. 33]

landen van Utrecht, Overyssel ende Groenynghen, ende dominateur in Asie ende in Afrycque, allen den gonen die dese jeghenwoordighe sullen sien saluyt. Wy hebben ontfaen de oodtmoedighe supplicatie van Adriaen van Riebeke, Jan Legiers d'oude Conynck, ende Franchois Toebast, vryschipper, Deken vanden Gulde ende Broederschap van S^t Anthonis, diemen noompt coleuveriers ofte busschieters, onderhouden ende gheobserveert binnen onse Stede van Ghendt, voor hen ende inden naeme vande ghemeente ende lichaeme vanden voorseyden Broederschappe ende Gulde, inhoudende hoe de selve Gulde tzedert jaer xv^e ende xv^e wel ende eerlick byde voornoemde supplianten ende huere voorzaeten onderhouden, gheregeert ende gheadministreert is gheweest, uut crachte vande briefven van confirmatie hen int selve jaer verleent, by wylen hoogher ende looflicker memorien de Keyser Kaerle, onsen heere ende vaedere, maer alsoo de voorseyde brieven van confirmatie ofte privilegien nyet executable en syn, voor soo veele alst roert tpoinct vande dootschulden, de voornoemde thoonders inden naeme vanden selven Gulde, verliesen d'meeste deel vande voorseyde dootschulden, midts dat sommighe schuldenaers vande selve syn uutlanders, wonende ende steerfvende buuten onsen landen ende graefschepe van Vlaenderen, als in Hollandt, Henegouwe, Arthois, Namen, Zeelandt ende elders, insulckerwys dat tvervolch, omme betaelynghe vande voorseyde dootschulden te ghecryghen, costelicker es dan tproffyt, waerdeure de voornoemde Gulde ofte Broederschap, die oorboirlick ende nootlick es binnen onse voorseyde Stede van Ghendt, ende tot bewarenesse vandiere, gheschapen es te vergaene ende te nieuten te commen, gheheelick ten achterdeele van onse voorseyde Stede ende verminderynghe vanden goddelycken dienste, die de voornoemde thoonders daghelicx doen celebreren ende administreren ter eeren Godts ende van

[p. 34]

huerlieder patroon S^t Anthonis voorseyt, ten zy dat ons beliefve, confirmerende de voorseyde briefven van confirmatie hen by wylen onsen voorseyden heere ende vaeder verleent, hen te consenteren ende accorderen dat zy supplianten ende huere naercommers, inden naeme vanden voorseyden Gulde, sullen moghen doen innen ende ontfanghen, by reele ende prompte executie, alle de dootschulden diemen de selve Gulde van S^t Anthonis schuldich ende tachter es, ende noch sal moghen schuldich ende tachter wesen, alsoo die vanden Broederschappe ofte Gulde vanden boghe, binnen onser voorseyde Stede, by heure privilegien, mandementen ende confirmatien hebben gheheele ende ghereede executie van huerlieden dootschulden, ende daerup hen doen expedieren behoorlicke briefven, alsoo zy segghen, tselve seer oodtmoedelicken biddende, soo eest, dat wy, de saecken voorschreven overghemeerckt, begheerende d'onderhoudenissen vanden voorseyden Gulde van S^t Anthonis ende vanden goddelicken dienste dier ghedaen wordt, soo voorseyt es, ende hierup ghehadt tadvys van onse lieve ende ghetrouwe de President ende lieden van onsen Raede in Vlaenderen, den voornoemden supplianten gheneghen wesende thuerer voorseyde bede ende supplicatic, hebben ghegonnen, gheoctroyeert, gheconsenteert, gheaccordeert ende ghewellecuert, gonnen, octroycren, consenteren ende wellecueren, hem ghevende oorlof ende consent, uut onse sonderlynghe gratie midts desen, dat zy van nu voortaen alle de weduwen ende hoirs ende actie hebbende vanden overledenen guldebroeders ofte guldezusters vanden voorseyden Gulde, die in ghebreke ofte refusant syn ende wesen sullen die dootschulden vande voorseyde guldebroeders te betaelene, danof zy hoirs syn, sullen moghen vervolghen ende bedwynghen ter betaelynghe vande voorseyde dootschulden door de wetten ende justicieren vande

[p. 35]

Stede ende plaetse daer zy wonachtich syn, sonder dat sy ontfaen sullen moghen syn in oppositien ofte appellatien, het en zy dat zy namptieren de voorseyde dootschult, ofte emmers de weerde vandien, in handen vanden ghuenen die daertoe byden supplianten ghecommitteert werdt, ende dat up goeden suffisanten sekere subject der justicien vander plecke, daer de executie ghebeuren sal, omme dat te restituerene by sententie diffinitive, indien dat alsoo gheseyt waere, hehouden dat vande voorseyde dootschult deughdelick blycke byden registre ofte extraicte van dien, onder thandteecken van onsen Greffier van Vlaenderen, ofte die vande wethouders vander Keure onser voorseyde Stede van Ghendt, het en waere dat de voorseyde debiteurs in promptis deden blycken by quytancie ofte suffisanten oorconden der voorseyde dootschult betaelt hebbende, ontbieden daeromme ende bevelen onsen seer lieven ende ghetrouwen den Hoofde, Presidenten, ende lieden van onse secrete ende grooten Raeden, Cancelier ende lieden van onsen Raede in Brabant, den voornoemden van onsen Raede in Vlaenderen, Stadthoudere, President ende lieden van onsen Raede in Hollandt, Rentmeesters van bewest ende beoistersghelt in Zeelandt, Bailliu van Ghendt, ende allen anderen onsen rechteren, justicieren ende officieren, wien dit angaen ofte anroeren sal moghen, hueren stedehouderen ende eenen yeghelicken van hen besundere, zoo hem toebehooren sal, dat zy den voorseyden supplianten ende hueren naercommers, guldebroeders vanden voorseyden Gulde van S^t Anthonis, binnen Ghendt voorseyt, doen laeten ende ghedooghen van dese onse jeghenwoordighe gratie, octroye ende consent, ende van allen den inhouden van desen, inder voughen ende manieren vooren verhaelt, rustelick, vredelick ende volcommelick ghenieten ende ghebruycken, zonder hen te doene nochte laeten gheschien eenich hinder, letsel, stoot ofte

[p. 36]

moeyenesse ter contrarien, ende omme dieswille datmen ten diveersche plaetsen te doene mochte hebben van desen onse briefve, wy willen datmen op tvidimus ofte copie autentycque van dien, onder seghel ofte ghehandteeckent van eenen onsen Secretarissen, gheloove gheadjousteert worde, ghelyck an dese presente originale lettren, want ons alsoo ghelieft. Des toorconden soo hebben wy onsen seghel hieran doen hanghen. Ghegeven in onse Stadt van Bruessele, den dryentwintichsten dach van octobre, int jaer ons heeren duusent vyf hondert tween zestich, van onsen rycken, te wetene van Spaignen, Sicilien, etc., tzevenste, ende van Napels tneghenste. Onderstondt op den ploy: Byden Conynck in synen Raede, onderteeckent Vlierden, ende gheseghelt met sConyncx zeghel van rooden wasse, uuthanghende in dubbelen parchemynen steerte⁽¹⁾.

(1) Reg. b, f^o xxvj v^o.