Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1532.
Aenkoop door de Schepenen vander Keure van een nieuw hof op den Vogelzang voor het Gulde van S^t Antone.

Allen den ghonen die deze presente lettren zullen sien ofte hooren lesen, Scepenen ende Raedt vander Stede van Ghendt, saluut. Doen te wetene dat wy ghehoort hebbende tvertoogh ende begheerte voor onslieden ghedaen by den Keysers, Coninc, Dekin, Proviserers ende den meestere met zynen Dyseniers over hemlieden ende haerlieder andere ghemeene medeghesellen ende guldebroeders in dezer tyt vanden Gulde van myn heere Sente Anthonis, ghenaemt de colvenriers ofte busschieters dezer Stede, te kennen ghevende hoe dat hemlieden, omme tschieten ende hanthieren vander busse int jaer achte ende tachtentich, by Scepenen den voorsaten verleent es gheweest zeker plaetse up de Veste deser Stede, binnen der prochie van Ackerghem, zeer verre vander handt gheleghen ende daertoe nyet wel idoine omme de vremde van ghelycke hantieringhe, alhier commende, te festierene, ende ooc om alle andere poorters ende inwonende dezer Stede daertoe te verweckene, ooc omme dat men ghemeenlic in tyden vander peste ende haesteghe siecte de ghone danof gheinfecteert zynde, inde turren aldaer legghende ende huerlieder vertrec verleenende es, waerby zo wel spetialic omme

[p. 23]

den tyt vander zelver siecte jeghenwordich als toecommende ten schuwene van meerderen pericle, dezer Stede de voornomde plaetse wel behouven zoude ende hemlieden vanden Gulde orborelic ware, hadden daeromme eene andere plaetse, vertrec ende hof, naerdere ende uuten voorseiden dangiere, ter vermeerderinghe ende hantieringhe vander zelver busse, ghesocht ende ghevonden zeer bequame, plaisant ende welgheleghen daerment eet ten Voghelensanghe, achter thof vander Keyserlicke Maiesteit, die zy zouden moeten coopen totter somme van hondert ponden grooten, te betalene met zestien ponden grooten ghereet ende zes ponden grooten tsiaers, welcke somme zy nyet ghestaet en zyn noch en zouden connen ghefurnieren ofte betalen zonder derzelver Stede hulpe, wiene tzelve Hof ende reparatie bliven zoude, verclaersende, indien men hemlieden inde voornomde huerlieder begheerte consenteren wilde, dat zy afgaen ende renunchieren zouden tprincipael ende alle achterstellen daeranne clevende by collatien hemlieden tanderen tyden toegheleyt, behoudende alleenlic up de zelve Stede de somme van zes ponden grooten elcx jaers. So eist dat wy. Scepenen voornomt, gheneghen zynde hemlieden vanden Gulde in haerlieder voorseide versouc te dezer waerf te ghelievene, regard ooc nemende up dat tzelve Gulde ende hantieren der conste vander busse hoirborelic es dezer Stede, hemlieden gheaccordeert, gheconsenteert ende by virtute van dezen gheassigneert ende bewesen hebben, ter betalinghe vanden voornomden coope van haerlieder nieuwen Hove, de voorseide somme van hondert ponden grooten, met zestien ponden grooten alnu ghereet ende zes ponden grooten tsiaers telcken zevenentwintichsten daghe van wedemaent achtervolghende, deerste zes ponden grooten verscinende den zevenentwintichsten van wedemaent XV^e drye ende dertich naestcommende, te

[p. 24]

halene, up te heffene ende ontfane ande Ontfanghers ende Tresoriers der voornomder Stede, die hemlieden Ontfanghers in rekeninghen defalquieren zal, dies renunchierden ende deden hemlieden duechdelic de voornomde vanden Gulde gheheelic te buten te dezen present, over hemlieden ende haerlieder naercommers inden name alsvoren nu ende ten eeuweghen daghen ter voorseider Stede behouf ende profite, zulcke haerlieder actie, recht ende vryheit als zy hadden ofte pretenderen mochten uut crachte der voornomder ghifte int jaer achte ende tachtentich, hebbende an tvoornomde Hof ende plaetse up de Veste te Ackerghem, metten turre daer an clevende, by hemlieden tot alnoch ghepossesseert, zonder hemlieden vanden Ghulde daer anne nemmermeer eenich recht te hebbene in eenigherwys, noch derghelycke an de ellef ponden grooten tsiaers hemlieden voortyts by Collatie toegheleit, voordere dan tot den zes ponden grooten die zy by ordonnantie van Scepenen jaerlicx heffende zyn om tonderhoudt vanden guldebroeders.

Ghegheven in kennessen der waerheden, onder den zeghele van zaken der voorseider Stede van Ghendt, den neghensten dach van hoymaent xv^e tweendertich⁽¹⁾.

(1) Reg. ordonnantien politique beginnende 1548, LL, f^o 18 v^o.