Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1537.
Ordonnantie daerby blyckt dat den Deken vande schutters mette ghemeene schutters ter Camere ordinairelick vergaedert, kennen moghen vande meshusen die int Hof ghebeuren.

Schepenen vander Keure in Ghendt, ghesien hebbende zeker supplicatie hemlieden ghepresenteert by Keysere,

[p. 25]

Conynck, Deken, metgaeders de ghemeene Proviserers vanden Gulde van mynen heere Sinte Anthuenis, gheseyt de colveniers oft busschieters, inhoudende hoe dat m^r Jan de Juede, engien-meestere der voornoemde Stede, hem lovende hooft zynde vanden voornoemden Gulde, ende dienvolghende vermochte te doen beterene alle zaecken int Hof ofte schuete ghebeurende, zoo hy ghedaen hadde, sonder adveu ofte toedoene vanden voornoemden Keysere, Conync, Deken ende Proviserers, te wetene vander ruuthede ghedaen int Hof by eenen Jan vander Meere, ter presentie van veele diveersche persoonen, ende eenen vremden man van eeren, die om tschieten int voornoemde Hof commen was, die byden selven vander Meere zeer rigoreuselick toeghesproken was, sonder cause ofte redene, in zulcker wijse dat tgheheele Hof ende schutters van diere scheeden moesten, dat meer was, persevererende van quaeden in argheren, quam int gheselschap daer de ghesellen naer costume vergadert waeren tgheheele gheselschip beroeren, zoo dat men hem moeste zyn lanc mes afgurden om grief te schuwene, welck mesuus de voorseyde m^r Jan hem vervoordert hadde alleene te doen beterene, sonder eenich van hemlieden supplianten oft eenich vanden thien Diseniers over te roupene, twelck hy niet en vermochte, volghende den privilegie hemlieden supplianten ghejont ende verleent byden drye Leden der voornoemder Stede, inhoudende ende verclaersende dat alle questien ende gheschillen ghebeurende int voorseyde Ghulde ende int Hof niet afgheleyt, ghebetert ende ghecorrigiert souden werden byden voornoemden supplianten ende guldebroeders; was boven dien de selve de Juede, den voornoemden Gulde groote cleenicheede doende in tguene dat hy tbert ende teecken vanden Gulde voor de twaelf grooten, die hy ghehouden was alle sondaeghe in tgheselschip daer de schuete gheleyt

[p. 26]

was te betaelene, nyet jeghenstaende dat hy die jaerlicx ontfynck uuter handt vanden Tresorier deser Stede, soo dat men van hemlieden ter zelver causen daeghelicx cleenichede zegghende was, dat zy niet betaelen en consten, dat zy verdroncken hadden, ende dat de voorseyde Juede den Ghulde ende der Stede voor haerlieder supplianten ancommene veele cleenicheden ghedaen hadde, zoot inde maeltydt van S^te Anthuenis daeghe lestleden te kennen ghegheven was. Emmers soo dat de Hooftman vande supplianten metten selven Juede niet dienen en wilde, ende jeghenwoordich waeren sonder Hooftman, versouckende up als provisie, den voornoemden m^r Jan de Juede verlaeten ende eenen anderen nutten ende ydoinen persoon in zyne stede ghestelt thebbene, ende hem gheinterdiceert de voornoemde twaelf grooten, diemen alle sondaeghe inde schuete den ghesellen was ghevende, niet meer te ontfaene, maer die soude laeten ontfaen den Deken vanden voornoemden Gulde ende zynen Eedt, die hemlieden verbinden souden alle weke int gheselschip te commene, ten minsten zy twee dienende. Naerdien de voornoemde Jan de Juede de supplicatic themwaert ghehadt, ghesien, ende die overlesen hebbende sustineerde contrarie den voorstelle vanden supplianten, ende nochtans hem van als submitterende inde discretie van Schepenen, daer hy soude moghen inne mesdaen, ofte contrarie zynen vermoghene gheuseert hebben, soo eyst dat Schepenen voornoemt, up al wel ende rypelic ghelet hebbende, appoincteren ende wysen twysdom vanden halven ponde was, byden voornoemden de Juede in zynen naeme alleene, sonder kennisse vanden voornoemden Gulde ghedaen, contrarie zynen vermueghene gheuseert te zyne, negheen ende van onweerden, hem voor zyn mesuus condemnerende tselve half pont was te betaelene, daer ende soo hy den selven mesusant ghecondemneert

[p. 27]

heeft, ende den selven mesusant van zynen delicte byden supplianten ghecorrigiert te werdene, volghende haerlieder vermoghene, by manieren van provisien, ende totter anders by hemlieden Schepenen in voorsien werdt, voorts ordonnerende de twaelf grooten der schuete, alle sondaeghe vander Stede toegheleyt, byden supplianten ontfaen, ende ten minsten by twee van hemlieden, ter plaetsen daert behoort, brocht ende betaelt te werdene, ende den voornoemden de Juede van nu voortaen hem soo te reghelene, dat zy cause noch redene en hebben hem te destituerene, compenserende de costen uut causen. Actum xiij^e in maerte xv^e xxxvij. (Onderteeckent), J. Vanderhaeghe⁽¹⁾.

(1) Reg. b, f^o ix.