Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

[p. 1]

1497.
Diveersche ordonnantien voor tGulde.

Allen den gonen die dese presente letteren zullen sien ofte hooren lesen, Schepenen ende Raedt vander Stede van Ghendt, saluut. Met kennessen der waerheden, doen te wetene, dat wy, ghesien de oodtmoedighe supplicatie ons overghegeven by Conync, Deken, Proviserers ende Disniers vanden Gulde vanden grooten heere ende vriendt Godts, myn heere S^t Anthuenis, over hemlieden ende den ghemeenen gheselschepe vanden voornoemden Gulde ende Coleuvreniers der selver Stede van Ghendt, omme tonderhoudt, eendrachticheyt, broederschip, minne ende vrientschip vanden selven Gulde, ende in ampliatien ende vermeerdertheden van dien, inclinerende thaerlieder versoucke ende supplicatie, hebben hemlieden gheconsenteert, ghewillekuert, gheaccordeert ende gheordonneert, consenteren,

[p. 2]

willekueren, accorderen ende ordonneren den selven vanden voorschreven Gulde, over hemlieden ende haerlieder naercommers, ende in ampliatien vanden ghiften hemlieden by onsen voorzaeten ghegeven, ende omme de redenen daer inne verclaerst, ende andre ons daertoe porrende, et onderhoudene ende naervolghene, nu ende t'eeuwelicken daeghen, dese naervolghende poincten. Eerst, dat de thiene Diseniers vanden selven Gulde onghehouden werden van dienste vander blomme te draeghene, dies zullen zy metten Proviserers ghelden de twee maeltyden, dies zullen daertoe ghelden den ouden Eedt ghelyck den nieuwen Eedt ghecostumeert heeft. Item ende als de Vooght sal doen daeghen de thien Diseniers, dat de boete wesen sal twee grooten in stede zynde. Item, dat soo wanneer ghesellen van andren Steden schutterlic commen te schietene om den wyn, dat Conync, Deken, Proviserers ende thien Diseniers zullen dooghen ghelycke costen, ende insghelycx, indien zy yevers buuten trecken ter schutteryen, zullen oock ghelycke costen ghelden. Item, dat de Proviserers ghecoren zynde, zullen kiesen den Deken ende Clerc. Item, dat de voghele gheschoten zynde, de Conync metten ghemeenen Eede zullen kiesen eenen Bailliu. Item, de Hooftmeesters vanden Gulde ghecoren zynde, sullen moeten dienen haerlieder jaerschaere, maer zullen moghen ghecryghen heerlicke executie up die hemlieden niet en betaelen binnen derden daeghe. Item, dat int kiesen vanden Proviseerders vanden voorseyden Gulde nu zynde in ghetalle van zes persoonen, om tGulde te bet te besorghene, te ghecryghene ende innene, datmen hem schuldich es ende werden sal, zy voortaen daertoe zullen moghen nemen ende kiesen tot thien ofte twaelf persoonen, ghelyc de andere Gulden vanden boghen. Item, dat de Bailliu ende Clerc vanden voorseyden Gulde onghehouden sullen syn van eenighe costen te dooghene, anders

[p. 3]

dan zy inde Gulden vanden boghen dooghen. Ende omme dieswille dat wy de voorschreven poincten ende artyclen elc bysondere willen ende begheeren onderhouden ende vulcommen te werdene, naer huere vorme ende inhoudene, soo hebben wy dese presente, in kennesse der waerheden, ghedaen zeghelen metten seghele van zaecken deser voorseyde Stede van Ghendt, den zesthiensten dach van lauwe, int jaer ons heeren alsmen screef duust vier hondert zeven ende tneghentich, onderteeckent up den ploy, Clerc, ende gheseghelt met eenen groenen seghele uuthanghende in dobbelen parchemynen steerte⁽¹⁾.

(1) Register b, f^o xvij.