Publications de la Société Historique et Archéologique dans le duché de Limbourg. Deel 10

Anno 1581.

In desen jaere syn burgermeisters geweest Jacob van Lom, Jan Goltstein.

In dit jaer heeft de stadt Ruremunde aenden gouuerneur Essenue voir syn seruis sdaechs moeten geuen een pistolet, maeckende int jaer 988 gl. 4 st. brab.

Daer nae is hyer comen een broeder vanden gouuerneur Essenue, monsieur de Stripeny, ende toe Ruremunde eene compagnie Walonnen opgericht.

[p. 233]

Ende alsoe tusschen burgers ende de soldaeten wegen het seruis groote dissentie was, om sulx te remedieren ende eenicheit met malcanderen te maecken, heeft der voirscr. gouuerneur dese naevolgende ordonnantie gegeuen. Ierstlick, dat een burger gehalden, aenden soldaeten te leueren eene eerlicke camere mit bedde ende toebehoir voir 2 soldaeten, oft einen mit eene vrouwe ende ten XIIII daegen 2 schoon laeckens, midts dat den borger syne eygene camere sal behalden ende ter weken een seruette mit eenen handtdoeck, die sy sullen moeten wasschen, maer geene hembden, nuesdoecken oft anders. Sullen oick aende soldaeten leueren een tafel, stoelen, pot, ketel, panne ende andere meubels naer die qualiteit, item ter weken een pinte eecx, een portie saltz ter weerden van een stuuer, eenen redelicke competentie van licht, sonder yet meer. De soldaten sullen hun warmen by hun patrons vuyr ende daer ouer moegen coecken, sonder dat sy den patron sullen moegen dwinghen elders te stoecken ofte buyten tyts. Ende soe verre eenighe borghers die middel nyet en hadden, om sulcken seruis te furneren, sullen hun addresseren aende magistraet om daer inne by assistentie te versien. De soldaten en sullen den borgers nyet moegen dwingen tot eenich ander seruis dan bouen gesaght, oft onder tdexsel van seruis hun doen gelt geuen, op peene van gestraeft te worden nae discretie van hunne ouericheit. Ende soe eenighe borgers hun willen beclaegen van insolentie, gewalt ofte ongelyck, soe hem ofte den synen byde soldaten aengedaen wert, sullen hun ierstlick addresseren aenden capiteyn oft ouericheit, om daer inne versien te werden, ende by faulte dessen sullen hun toevlucht nemen aenden quartiermeisteren oft magistraet, ten eynde sy sulcx aenden gouuerneur remonstreren, omb daer inne der gebeur remedieert

[p. 234]

to werden. Int logeren ofte billetteren der soldaeten sal achtervolcht worden dordonnantie van hunne hoicheit, te weten twee te saemen oft anders, soe het bequaemste sal connen geschieden. Ende is dese ordonnantie doir commandement vande voirscr. gouuerneur gepubliceert geweest.

Der seluer gouuerneur heeft sedert st. Petri totten 26 Aprilis aen seruis genoeten 97 gulden 16 st. brab., der sergeant major in deser tyt was eenen Italiaen, genant Veronici.

Op st. Johans nacht haelden die soldaten van Venloe vuyter khoe schantzen der stadt Ruremunde alle de khoyen ende brachten omme die inde schantze waeren, welcke meerendeils borgers syn geweest.

Den 2 Augusti wardt Lyer duer verstandt des garnisons, soe daer in lach ende Schotten waeren, ingenomen tot grooten achterdeil der van Antwerpen, Mechelen, Viluorden ende Bruessel.

Ende alsoe byde stadt clachten gedaen waeren om 2 compagnien Italiaenen ende versochten versien te werden mit eenen gouuerneur van den lande is voir appostille gegeuen als volght: Son excellence sest resolue denuoyer brieffuement aultre capitaine et gouuerneur pour la garde de ceste ville, que viendra incontinent et entretant a commandé au capitain don Gaston, de ne faire aucune foulle, exces ny mauuais traictement sur les pouures inhabitans, ce que sera de rechieff escript bien expressement et a certes, faict a Namur le XXI jour d'Auril 1580. Signé Alexandre et plus bas estoit escript: par ordonnance de son excellence, signé Verreycken.