Publications de la Société Historique et Archéologique dans le duché de Limbourg. Deel 10

Anno 1582.

In desen jaere syn burgermeisters geweest Johan Hillen der jonghe, Marten Montenaeken.

[p. 235]

In dit jaer hebben die putten mit noch 50 gewaepende borgers ende wel vyftich soldaeten in bywesen vanden capiteyn Cortenbach den maendtzgriendt ende der stadt griendt opgegrauen, om den vyandt daer aff te halden.

Item als die burgers in desen jaere d'ierste reyse waeckten, syn hun byde magistraet eenige schenckagien gedaen worden.

Den 21 January is vuyt Ruremunde getrocken de compagnie van capiteyn Fabio Matteloni naer Loeuen.

Aenden magistraet deser stadt Ruremunde syn brieuen vanden hertoge van Parma comen in dato den 26 Aprilis, om den heere van Warlusel voir gouuerneur aen te nemen ende te respecteren, welcken volgents den 5 May hem nae syne aencompste mit die 2 commissarissen Cigoigne ende Merode te gaste gehadt, dat ontrent 60 guld. brab. gecost heeft. Van des heeren gouuerneur Warlusel, (die sich intituleren liet Adriaen de Warlusel, ridder, heer aldaer, Sombrin, Bertencourt, Grandcourt etc. als superintendent gouuerneur ende capiteyn van Ruremunde, forten ende daerom liggende plaetsen), logement te stofferen, rusten ende mit meubelen te versien heeft aende stadt gecost 368 gl. 11 st. brab. Volgen die meubelen, die de stadt tot behoeff ende seruis van des gouuerneurs Warlusel heeft moeten leueren: De vrouwe gouuernante bekende in bewaeringe te hebben 19 bedden, daer toe geleuert 16 alde heuftpuluen ende 3 nieuwe, synt oick 19, item 16 oirkussens ende 5 nieuwe syn 21, kusteycken van alde 4 ende 14 nieuwe syn 18, slaeplaeckens 6 paer alde ende 16 paer nieuwe syn 22 paer, sartzen 13 alde ende 6 nieuwe syn 19, mit noch een Spaensche gruen sartze voirden heer gouuerneur; ander lynwaet, seess dosynen seruetten ende 11 gebeelde amme laeckens; aen tennenwerck, drye dosynen schotelen min een doir den burgermeister

[p. 236]

Montenaecken geleuert halffwerck, twee dosynen spaensche tellioeren halffwerck, ein dosyn tennen lepelen mit drye tennen pispot, vuyt Geriet van Wissems huys 10 tennen schotelen ende 9 tellioeren; noch op nieuwe geleuert een dosyn middelbaer groote schotelen, noch 30 gemeyne schotelen van fyn tenne, ein dosyn tellioeren halffwerck ende 6 fyne tellioeren, vyer tennen kandelers, yserwerck, een vuyttreckent vuyryser ad 6 gl., noch een stoeckyser, seess yseren luchters, vyer yseren lepels, twee schuympannen, een yser omt vuyr voirde kynders mit 1 braetspit. Noch bouen alle tgene moeten leueren als volght: acht sartzen, 2 tot myn heeren bedde, noch 5 heuftpuluen, acht oirkussens mit kusteycken, ammelaeckens tot myn heeren taeffel, ammelaeckens tot der knechten ende ceucken, mit droochdoecken, 2 tennen kandelers, 2 lampetten mitte beckens, 4 mostart schoetelkens, 2 tennen byer cruycken, 4 tennen croesen, 1 dosyn lepels, 2 coperen kandelers, bedtsteden etc. Sedert den 26 Aprilis tot St. Petri aenden heere van Warlusel voir seruis des maendts betaelt 40 gulden, syn 382 gulden 15 st.

In Junio op st. Peeter ende Pauli dach weert een vendel burgeren bynnen Ruremunde aengestalt, om in val der noot die selue tegens den vyandt te gebruycken ende syn dieselue aengenomen sonder soldye ende tot die wedercompste des heeren gouuerneurs werdt die monsteringhe vuytgestelt, ter oirsaecken dat der capiteyn Cortenbach sich die monsteringe nyet aennemen en wolde, wie wel der gubernator hem sampt den heer vander Horst den jongen sonderlinge commissie daer van gegeuen hadde.

Der heer gouuerneur Warlusel voir syn vertreck d'ordonnancie vanden gouuerneur Essenue int voirgaende jaer gemaekt opt stuck vant seruis voirde soldaten weder doen republiceren.

[p. 237]

Den 1 July anno 1582 dweil der hopman Thiesselinck mit syn vendel Duytschen vuyt Ruremunde toigh, oick mit die nederlaege des garnisoens op Kriekenbeeck, voir Dulcken, die andere vyer vendels hier seer geswaeckt waeren, alsoe dat mit die reste der criechsluyden alhier alle wahrden ende wachten nyet behoirlick naer heysch des criechs langer besadt konden werden, dede derhaluen der capitein Cortenbach de magistraet aenseggen dat sy hem 30 borgern mit haere wapenen doen sollen, die buyten aende meulens de wacht solden halden, ende soe de magistraet sich des beswaert vonde, seggende dat het nyet redelich wehre dat die soldaeten bynnen ende die burgeren buyten de stadt waecken solden; alsoe der vyandt daer van geaduerteert wesende solde te balder daerop bedacht syn om die borger mit gewaldt onuersiens by nachtlicker wyle te befallen ende touerweldigen, ter oirsaecken dat die beuten der burgeren grooter ende hun aengenemer syn sollen, als van die soldaeten, begeerende derhaluen dat sy hem gern die borgeren doen wolden, vurbeheltelick dat sy bynnen de stadt ende nyet buyten waecken mochten, waerop den capitein Cortenbach trotzlich geandtwordt dat hy die doen waecken wol daert hem gelieffde ende wan sy es doen wolde, dat sy es baldt deden, dan lieuer lieten syt als syt deden; dan hy solde alsdan wel weten wat hy te houe scryuen soll ende wan sy oirsaecke gaeuen eins vingers lanck sol hy het ein arms lanck maeken, daer nae die magistraet mit haere burgheren sich to richten hedden. Ende soe tseluigemael der heer commissaris van Merode hier was ende die magistraet sich des aen hem beclaechde, bleeff dat doenmaels duer onderrede des vurscr. heer van Merode achterwegen, saght doch den burgermeister aen dat hy volcx genouch hadde ende dat hyt alleen dede om hun te versuecken.

[p. 238]

Ende soe middelerwyle der vyant soe te voet als te perde langs Erclents naerden lande van Valckenburch toegh ende aen deser syden opde spoet geen middel van criechsuolck en was, om den onder de ooghen te trecken ende te slaen, ende dan oick onseker was, wat des vyandts aenslegen ende intentiones werhen, gesan Cortenbach andermaels die magistraet aen mit harde ende trotzliche woorden dat sy een bysonder aental van burgeren buyten inde vursteden ende aende meulens solden doen waecken, ende soe die magistraet om oirsaecken bouen vermeldt sich des beswaert fandt, begeerde, dweil hy die monsteringhe sich nyet had aennemen willen, dat de saecke oick vuytgestelt mocht werden biss tot wedercompste des heeren gouuerneurs, oft dat die burgeren bynnen der stadt aen orteren, daert hem gelieffde, mochten waecken, antwoorde Cortenbach, seggende trotzlich: godtswonden, ihr sullet doen, off ick sal den burgeren hun gewehr nemen ende bedenckt euch wel ende geeft my aenstondt antworde, dan ick ben vur dese reyse euwer gouuerneur.