Publications de la Société Historique et Archéologique dans le duché de Limbourg. Deel 7

[p. 219]

Bijlage n^o 1.
Bladz. 203.)
Vergelijk over de verpanding van het laad van Valkenberg aan graaf Frederik van Meurs.

10 Januarij 1416.

Jan bi der gracien Gods, Hertoge van Lotharingen van Brabant ende van Lymborch, Marcgreve des heilichs Rycs. Allen den ghenen die desen brief selen sien saluut; doen cont van sulker aenspraken als die Edel her Frederich oudste soen te Moerse, Greve van Sarwerden tot ons gehat heeft van wegen ons liefs heere ende vaders Hertogen Anthonis van Brabant dien Got genade; te weten es van twee dusent Rynsche gulden die hem gebraken als hi meynt aen die achtien dusent Rynsche gulden, die hi op die borch, stat ende lant van Durbuy hadde met der pantscap daertoe gehoerende die hi den selven, achtien dusent Rynsche gulden overgaf onsen lieven heere ende vader voirs. dair af dat hi niet meer en boerde dan vier dusent Rynsche gulden gereet ende die twelf dusent Rynsche gulden hem bewyst worden op onse slot ende ampt van Valkenborch, wairaf dat voirwaerde was, als hy seegt, wanneer hi onsen lieven heere ende vader brieve bracht van onsen genedigen heere den koninc van Behem dat onse lieve heere ende vader, die twee dusent Rynsche gulden soude mogen slaen op al sulc gelt als onse voirs. lieve heere ende vader hadde op tlant van Lutzemborch ende dat hi hem dan op Valkenborch dese twee dusent Rynsche gulden op die sesthien dusent Rynsche gulden hoegen soude, welc brieve hi seegt dat hi overbracht heeft ende gegeven onsen lieven heere ende vader voirs. dese selve twee dusent Rynsche gulden op die sesthien dusent Rynsche gulden ongehoegt blivende. Item van achtien hondert

[p. 220]

Rynsche gulden die hi meynde dat hem gebreken souden van sinen hantgelde van ses dusent Rynsche gulden op Valkenborch, eer hi tot synre betalingen quam na dat hi Dubuy overgegeven hadde, des hi hem keerde ter genaden ons liefs heeren ende vader voirs. die dat noch niet verclaert en hadde. Item van acht hondert Rynsche gulden verlet van vier jaren siaers twee hondert Rynsche gulden van enen manleen, dat hi seide dat onse lieve heere ende vader hem gaf ende hem hulde ende eet dairaf dede. Item van twee dusent Rynsche gulden die hi ons hiesch van henxsten ende perden gestorven ende verderft in ons liefs heere ende vaders dienst voirs. doen hi syn hulper was in der veden van den lande van Lutzemborch, daer hi sinen gesellen af moet vernuegen ende van cost van voederinge op ter reysen van Lutzemborch in sinen dienst gedaen, dat hi also boet te bewisen. Item van twelf hondert Rynsche gulden die hem gevallen selen syn tot uutgaende Merte naest comende van twee jaren van sinen hantgelde van den ses dusent Rynsche gulden die hi op Valkenborg heeft, dair hi onbetaelt af es. Dat wi op ten dach datum des briefs overmids onsen rade ende steden van Brabant met den selven onsen neve overdragen syn, dat wi voir alle syn aensprake voirs. ende des wi dair af tot hem gehouden mogen wesen hem of den helder des jegewerdichs briefs met sinen wille betalen selen bynnen enen halven jare alre naest volgende der daten van desen brieven, vyf ende twintich hondert Rynsche gulden, of dat wi die vyf ende twintich hondert Rynsche gulden selen mogen slaen, waer wi hem, of helder des briefs die hier en bynnen niet en betaelden op die ses dusent Rynsche gulden die hi heeft op onse voirs. slot stat ende ampt van Valkenborch met alsulken hantgelde van elken hondert Rynsche gulden siaers thien Rynsche gulden van dan voirt, ende in alsulker maten als die brieve inhouden van onsen lieven heere ende vader, die onse voirs. neve van hem heeft, van den ses dusent Rynsche gulden

[p. 221]

voirs. Oic es voirwaerde of heere Jan, heere van Wittham die onse slot van Valkenborch in heeft hem niet en volvuerde sulc geloeften ruerende van den ses dusent Rynsche gulden voirs. als bi tiden ons liefs heere ende vaders voirs. verdedinget waert ende die brieve dair af inhebben, dat wi enen anderen op onse voirs. slot setten selen die hem genuglic si, die hem alsulc gelyc geloeften doe, als her Jan hem gedaen soude hebben, also dat hi dair bi engeen gebrec en hebbe. Ende oic enen rentmeester van Valkenborch sulc bevele selen doen, dat hi onsen voirs. neve syn voirs. jairlics hantgelt uutreike, na inhouden der brieve, van den ses dusent Rynsche gulden voirs., welc overdrach alsus geschiet gelyc boven verclairt steet. Wi geloven in goeden trouwen te houden vast ende onverbrekelic ende onsen voirs. neve van Sarwerden van punte te punte te doen volschien, alle argelist uutgescheiden. In orconden des briefs dair wie onsen seghel aen hebben doen hangen. Gegeven in onser stat van Antwerpen thien dage in Januario in den jair ons heere dusent vier hondert ende sesthien na costumen des hoofs van Cameric.

(Onder stond)

Bi mynen heere den Hertoge ter relacien van den abden van Haffligen ende van Tongerlo, den heere van Diest, heere Heinric van Bergen, Raesse van Gaveren, Reynere Moirs, Clause van Steenlant ende heere Dirc de Roever.

Het origineel in het Rijks Archief te 's Gravenhage op perkament met een uithangend zegel in rooden was.