Publications de la Société Historique et Archéologique dans le duché de Limbourg. Deel 7

[p. 222]

Bijlage n^o 2.
(Bladz. 84, 176 en 185.)
Akte van accoord aangegaan tusschen pater Laureus van Bocholt en de bewoners van Kinrode, wegens het verplaatsen van het klooster des H. Grafs naar Maeseyck.

1 Julij 1496.

Inden naem Godes. Amen. Overmitz deese tegenwordighe openbare instrumenten, die het syen sullen offte hoiren leesen, sy kennelick inde openbaer dat in die joer nae der geboirte onss lyeffs Heren, duysent vyerhondert ende sesennegentich, opten yersten dach der maent Julius, omtrent eyn uur noe myddach, in der veertiende Indictie ende vierde joer des Pausdoms des alderheyligsten vaeder ende Here in Christo Heer Alexandry van der godelycker voirzienycheyt des sesden paus van dyen naem, syn verschenen voir mich openbaere notaris ende erbaren middelaeren, vrindelicken peysmeckeren inde scheysluyden noebeschreven: der geestelycke broeder Laurentius van Bocholt, als vaeder inde pater offte voirgenger des Convents inde Gotshuys onsser Liever-Vrouwen Wil-en-Eer van Kynroed, des ordens onss lyeffs Heren graeffs, gelegen onder die prochye van Kessenych, des rychs Ludick, ende nu inder stadt Maeseyck in die Pelsserstraet getranslateert, in den naem van d'een; inde die erbare mannen Jannen van Knabbenhousse, Everart Vander Nath, Dirck Vandy Dryesch, Jan Vuerpyl, Jan Vandy Laer ende Thys Pypen gemechtigt ende sich mechtigent inde sterck maekende vuer die ganse gemeynte des herganxs van Kinroed vors. in den naem van de andre syde, oem te slechtten ende neder te leggen alle twisten ende stryte, welcke dy vors. partyen onderlinghe hobben gehat, hobben offte nomols hobben muchtten, oirspronck ende beginsel genomen

[p. 223]

uyt ende van de affscheydinge ende translatie des vors. Convents van der capellen Onser liever Vrouwen tot Kinroed tot in der stat Maeseyck, ter plaetse vors. hon georloifft uyt beden ende sollicitacie des vors. paters ende vuergengers van den Erwerdighen Here Johan van Horne, buscop tot Ludick, hertoch van Bullion graeff van Loen, meynende ende voir sich nemende allen die guyden, gereyden ende ongereyden, behoirende totter vors. capellen van O.L. Vr. tot Kinroed met hoem te vueren ende te transfereren; nyet aenghemerckt, dat die vors. capelle inden beginsel der fondacie, ten tyde eer dat van dy orden offte plantacy van dy orden ons lyeffs Heren graeffs, hetsy van broders offte susters eyn begin aeff bestont, gefondert, erigert ende gedotert is gewest vanden nabuyren ende ondersaeten des heerganxs van Kinroed, oem daer alle weken sekere Missen gedaen te werden, mits den verren wech ende grotter distancy des vors. heerganxs al totter moiderkircke Kessingen, voirtaen om dy alden personen, krancken ende gebonden, welcke dagelykx totter moiderkercke nyet komen en konnen. Welcke Missen, rentten ende andere kleynnothen ende cynsen totter vors. capelle toen tertyt behoirende die ondersaetten meynen mit recht nae der alder gewointte te behalden; hebben verbontelyck, op die pene naebeschreven, in handen myns openbaren notaris onderschreven geloifft te halden het contract ende stichtting naebeschreven, te wetene:

Dat der vors. pater Laurentius des vors. convents nu liggende in dy stadt Maeseyck ter plaetse vors. sal leveren ende overgeven den naebuyren van Kinroed, allen en besunderen geystelicke ornamenten tot Goids dyenst noidelyck ende inder Missen profytelyck ende vuertaen belden, bencken, kelcken ende alle andere cleynnothen totter Goidsdyenst begeven, welcke syn voirvaderen off priors des Convents vors. inder capelle bevonden hobben; inde sal die capelle vors. gensselyck ende geheelyck, so als syn nue steyt in huere timmeragye

[p. 224]

met hoeren tuebehoir ende affhangingen, sonder eynich wederseggen also laetten stoen. Item sal ock der vors. pater laeten volgen den vuers. nabuyren alle rentten ende cynsen, welcke der vors. capellen voir dy beginsel des ordens, in der vors. capelle totter hulppe der Missen alle weken te werden, bewesen ende besat syn; welcke hyr van stuck tot stuck claerlyck naer volgen.

Eersten eynen bampt, gemeynlyck O.L. Vrouwenbampt genaempt, besat ende gelaten van Servaes van Knabbenhoussen; secundo, item eyn mut roggenpacht in die mate der plaets, besat ende gelaetten der vors. capellen van Jan van dy Laer ende van hoem gequeten ende affgeloist met dertich goltgulden, met denwelcken der voirige pater⁽¹⁾ heeft gegolden eyn stuck ackerlant in de plaetsse deser dertich goltgulden ewich ende erffelicke tot profyt der vors. capelle. Item eyn bampt van vors. nabuyren by consent des Heren van Kessingen van der gemeyntte affgesneden ende ontdeylt tot vermerderinghe Goits dyenstes in der vors. capelle, besat van de naebuyren, gemeynelyck O.L. Vrouwenbempt genoempt. Item derdehalff malder koren, welcke overschyetten van die VIIJ malder rogge, van welcke VIIJ malder vyff gequeten ende geloist waren van dy naebuyren, ende ock besat doir vors. orden daer erstwerff begonst ende van vors. pater ende syne vuerseten in verscheyde tyden ontfanghen ende gebeurt; voir welcke also gequeten ende geloisde vyff malder van hen ontfanghen, ende voir XXV grypen der vors. capellen cyns te geven, van Ruth vander Nath besat, ock vanden pater ende syne vuergengers ontfanghen, sal der pater vors. ende syne naecomelyngen paters des convents, geleghen in die staet Maeseyck, ter plaetsse vors. ewichlyck schuldich syn alle sondach ende heylige dagen te bidden ende te doen bidden voir alle zeelen levende

(1) Welligt pater Vranck.

[p. 225]

ende doiden des heerganxs van Kinroede. Ende voertaen sall der vors. pater by hoem off by eynen anderen in synen naem, doir alle het joir XCIJ, nae der registeren, aengaende Sinte Jansmysse naestkoemende, alle weken in der vors. capelle syn schuldich verbontelyck eene misse te lesen. Item vuer dy vruchtten in desen jare tot nae kermisse naeskomende opten vors. erven gewassen, sal schuldich syn dit jaer lanck tot Sint Jansmisse naestkomende die vors. pater, by hoem off by eynen anderen alle heyligdagen ende sondagen, sonder enich versuymenisse, allen tot synen lasten inder vors. capelle missen te lesen. Item sal laten volgen der vors. pater ewichlick inde tot allen tyden den vors. nabuyren, totter vors. capellen behoeff, dat lant geheetten den Montfort, den welcken der vors. pater in synen tyt betaelt heeft. Oock heeft noch geloifft der vors. pater Laurens op syne costen te vercryghen ende te verwerffven vanden Pater Generael des vors. ordens van ons lyeffs Heren graffs, voir dy naebuyren vors. dy besegelde bryeffven, dat hynaemals in het toekomende dy vors. naebuyren, nue synde ende naemols komende, sullen van de broders ende susteren des orden van honnen lesten, interessen totter vors. capellen, ewichlyck absolvert syn, gequeten, ongequelt ende schadelois. Ende off men in tuekomende tyden bevont sich eynen off eynige broders ende susteren des orden vors. totter vurs. plaetse vermeten met recht tegen dy naebuyren, mits die in lasten ende schaede quamen, sullen dy vors. pater ende syne naecomelingen des convents vors. sulcke lastten inde schade den vors. nabuyren oprichtten..... Item off men by aventuyre bevont in toekomende tyden dat vors. nabuyren eynigen eyssch offte cavellatie uyt dese tegenwoirdige contract springende, van onssen erwerdigen Here van Ludich syn segelen off van yemant in honnen naem worden opgelacht, sal schuldich syn dieselve pater vors. dy nabuyren, offte sy hon

[p. 226]

eynichsints in dit contract misgrepen muchtten hobben, te releveren ende schadelois te stellen al tot desen dage toe, op dato deses ende nyet langer. Ten letsten hobben dy voirige partyen met naemen boven geschreven in handen myns notaris onderschreven ende eynen jegenlycken besonders beloifft, allen die vors. puncten ende voir het elck bysonder, vast, stedich ende ongequelt te halden, op eyn pene van negen engelsche nobelen metter kostten, dat eyn deyl den erw. Here inder tyt buscop van Ludick, het ander deyl dy klagende partye, en het derde deyl dy onderschreven scheytsluyden, sonder quytscheldinge, als ende wanneer sy vallen, by te voeghen ende te appliceren. Van welcken allen ende eyn jegelycken bysonderen puncten, dy vors. partyen begerden van mich notaris onders. eyn instrument offte wel instrumenten.

Geschyet ende geconcludert dese dynghen in het goitshuys der stadt Maeseyck, inden jaer, maent ende dach, ure, indictie ende pausdom boven geschreven by der declaratie ende vrindelyke verenigynghe der voirsichtige ende wysse Heren, her Reyner van der Cuylen, deecken ende canonick onsser L. Vrouwe tot Aldeneyck ende Her Herman van den Eertwech, lantdeken ende canonick van Eyck, des erntfesten ende fromen Dirck Pollart, ende des erbaren ende wyse Willem van Geneygen, arbitrairs ende vrindelycke peysmeckers, daertoe versocht ende gebeden van vors. partyen totter vereyniginge vors. met my openbaren notaris onders. geroeppen ende gebeden.

Was onderteekend: Ego Johannes van Helmont, clericus Leod. diocesis publ. sacrae imper. auct. notarius etc.

Afschrift berustende in het Kerkarchief te Kinrode.