|
| |
| |
| |
De derthiende gheschiedenisse.
Trufaldijn bemint Roosemonde, die hem haet, ende is verlieft op Polinde, die haer oock hertelijck bemint, Trufaldijn crijcht door middel van Polinde, hoewel sonder sijn weten, Roosemonde in sijn ghewelt, ende haer beyden met ooc haer broeder Horrisel ommebrenghende, wert daer naer oock van Agrican aen een peerts steerte ghebonden, ende alsoo ghedoot.
Int Coninckrijt van Baldaque, regneerden ouer etlijcke Iaren een tyran genaemt Trufaldijn, so wreet ende boosch van natueren, dat Phalaris ende Nero daer goet by gheschenen souden hebben, want hy niet en liet te bedrijuen, dat of met wreetheyt of met verraderie volbrocht mochte worden, ontrent het rijck van desen tyran, woonden een Graef met name Horrisel, so seere in deuchden ende vromicheyt vermaert als die ander in boosheyt, om welcke oorsake Trufaldijn sulcken haet tot desen Horrisel creech dat hy alle middelen sochte om hem om te brengen, ende zijn Graefschap in te nemen, maer Horrisel die zijn verraderye ende tyrannie wel kenden, wist hem so te wachten, dat hy op hem niet gewinnen en coste, want hy hem hielt op een Casteel geheeten Valckenborch, het welcke sonder verraderie onwinnelijck was, also het gheleghen was op een hooghen Steenrots, hebbende maer een engenwech, een mijle lang met een poort, ende die besedt met twee volwercken, van alles wel versien, bouen dese raesden Trufaldijn van liefde, die hy droech tot die suster van dese Graef, genaemt Roosemonde, | |
| |
niet min schoon van aensicht ende leden, als deuchdelijck, alsoo dat sy alle die vrouwen van dier tijt daer in te bouen ghinc, die welcke hy dicwils aenghesocht hadde, met schoone belooften van haer te trouwen, met schoonder ghiften, ia oock met lift, ende pracktijcke van haer noch te doen voeren, maer was al om iet, eensdeels om dat sy, zijn boosch herte wel kennende, haer veel te seer wachten. Eensdeels oock mede om dat sy hertelijck beminde, een ionck, schoon, deuchdelijck ende vroom Ridder, geheeten Polinde, die met haerder liefde niet min ontsteken en was, also datmen wel mochte seggen, dat gheen ghetrouwer paer gheuonden en mocht worden, bouen dien waren sy van natueren ende complexie soo ghelijck, dat die een sonder den anderen niet en wilden noch niet en mocht, maer die Graef, om dat het houwelijck hem niet aen en stont, als gheen ghelijc partuer sijnde, heeft daer in niet willen consenteeren, dies Polinde half mistroostich zijnde, is als een vroom Ridder zijn auontuer gaen soecken, hoopende metter tijt so veel vrome feyten van wapenen te doen, dat hy waerdich ghekent soude worden Roosemonde te trouwen, maer zijn liefde, ofte moghelijc zijn quade fortuyn, heeft niet connen verdraghen het afweesen van zijn wel beminden also dat hy swerende contsom die Frontieren, ten laetsten ghearriueert is in die stadt van Baldach, daer hy seer vriendelijc van Trufaldijn, die alle dese liefde wel vernomen hadde, ende door hem zijn verraderye meende te werck te legghen, ontfanghen is, hem alle eere dat hy conste betooghende, bouen dien hem beloouende te doen hebben zijn lief Roosemonde, so verre hy zijn raet wilde volghen, hier wt machmen mercken die vremdicheyt van die liefde, die haer van alle die werelt | |
| |
mistrout, nochtans elck een gheloof gheeft, want Polinde, so haest niet ghehoort hebbende dese belooften van Trufaldijn, ofte hy heeft terstont vergheten des tyrans leugenen, ende verraderie, hem om hulpe ende assistentie biddende, soo heeft dan Trufaldijn hem voor het eerste gheschoncken een Casteel, leggende een dachreyse van Valckenborch, in welck Casteel hy door een ganc onder die aerde ghemaeckt comen coste, wt een huyse dat daer ontrent gelegen was. Polinde daer zijn woonplaets ghenomen hebbende, heeft so veel gedaen met heymelijcke bootschappen, ende brieuen, dat Roosemonde hem belooft heeft, haer te laten vinden op een sekere plaets daer hy dan, midts haer tot zijn wijf nemende, mochte voeren, daer het hem belieuen soude, het welcke Polinde met grooter deuotien, ende begheerte ghedaen heeft, haer op zijn Casteel brenghende, daer sy met grooter genuchten haer wille volbracht hebben, maer (helaes) niet langhe en heeft die vrolijckheyt gheduert, want Trufaldijn haer beyder compste op het Casteel vernomen hebbende, is met een hoop volcx van onder die aerde ghecomen, ende heeft haer beyde met alle het huys ghesin gheuanghen ghenomen, voor het eerste zijnen wil fortselijck met haer ghebruyckende, daer nae heeft hy haer willen dwinghen te schrijuen aen haer broeder, hoe dat sy teghen haer wille wech ende op sulcken Casteel gheuoert was van Polinde, ende dat by so verre hy met een deel van zijn volc daer comen wilde dat hy haer lichtelijc wederom crijghen soude, ende hem gheuanghen nemen om zijn ende haer leet te wreken, maer heeft haer daertoe met gheene woorden connen brengen, dies hy haer soo langhe ende sware tormenten aen ghedaen heeft, dat sy int leste ghedwongen is ghe- | |
| |
weest, zijn boose wil te valbrenghen, ende den brief te schrijuen, die Trufaldijn door een huysman, die nergens af en wist, aen die Graef gesonden heeft. Horrisel den brief ontfanghen hebbende, is terstont met het meeste deel van zijn volck naer het Casteel ghetrocken, om zijn toorn ouer Polinde te wreken, beuelende zijn Neef voor zijn wedercomste, daer niemant in te laten, maer is onderwegen van Trufaldijn met alle zijn volc, die hem daer verbrogen hadden omcinghelt, ende gheuanghen. Een yeghelijck mach dencken in wat een verschricktheyt den ellendighen Horrisel hem gheuonden heeft, siende hem in handen van zijn meeste vyant, hy wilden hem seluen ombrenghen, maer Trufaldijn heeft dat beledt, want hy door hem meenden in te nemen Valckenborch, heeft hem eerst met soete woorden, daer na met groote dreyghementen af ghevraecht die ordre die hy daer gelaten hadde, maer heeft het selfde, wt hem niet connen verstaen, dies hy die soldaten aenghesproken heeft, die welcke wt vreese vander doot, hem dat altemael te kennen gegeuen hebben, t'welcke Trufaldijn verstaende, heeft zijn voclk doen aentrecken die cleederen van die Soldaten van Horrisel met hem ooc nemende sommighe van haer die hy daer toe met schoone belooften cochte, so is hy na Valckenburch ghetrocken, latende die Graef met zijn volck inde bewaernisse van die reste van zijn volck, alwaer gecomen zijnde inden auont, ende die Neef de stemme van die omghecoste Soldaten kennende, heeft sonder achterdencken die poorte gheopent, maer in plaetse van zijn Neef willecom te heeten, is hy terstont om hals ghebracht met alle sijn volc, ende alsoo heeft Trufaldijn dat Casteel inghecreghen, alwaer hy gelaten hebbende een van zijn Houelingen, zijn Heer in | |
| |
als ghelijck met een sterc Garnisoen, so is hy terstont wederom ghekeert, daer hy die Graef ghelaten hadde, die hy op het Casteel daer Polinde ende Roosemonde, gheuanghen waren gheuoert heeft, om daer zijn wreetheyt te toonen, ouer die onnoosele persoonen, voor het eerste dede hy haer pijnighen met alle die tormenten die hy bedencken conde, van welcke moede zijnde, maer niet versaedt, heeft hy in presentie van Roosemonde, Polinde doen quartieren, ende daer na doen villen den armen Horrisel, dies sy bedruckter zijnde dan Mobe, doen sy haer seuen sonen, ende seuen dochteren in haer teghenwoordicheyt sach doorschieten, daer die tweelingen van Lastona, niet en deden dan die Goden tot haerder wrake te roepen, maer Trufaldijn en ghedoochde dat niet lang, want hy haer ooghen in zijn presentie dede wtsteken, ende haer tonghe af snijden, haer alsoo metter tijt ontleedende. Tot sulcken eynde (beminde Leser) zijn sy gecomen door die onghehoorsame liefde van Roosemonde, ende lichtuaardich gheloof van Polinde, Trufaldijn en heeft ooc die straffe des Heeren niet ontloopen, want ghetrocken zijnde tot assistentie van den Coninck Galafron van Gati. Soo is hy vanden Coninck Agrican van Tartarie die hem beleghen hadde, gheuanghen die hem ghebonden hebbende, aen een peerts steert, heeft doen slepen door den velde, soo langhe dat hy die gheest, die so veel quaets ghevrocht hadde, ghegheuen heeft.
|
|
Auteursrechtvrij