|
| |
De achtste gheschiedenisse.
Paulo Malatesta, door onordentlijcke boose liefde verwonnen zijnde, slaept by zijn Broeders huysvrouwe. De welcke t'selue vernemende seer ghestoort is, ende haer beyden naect byden anderen op een bedde vindende, met eenen slach haer beyder hoofden afslaet.
Rimini is een schoone ende playsantighe Zee-stadt, gheleghen in Romangna ofte Marca d'Ancona, ouer welcke stadt wel eertijts geheerst heeft het huys ende gheslachte van Malatesta, daer vele vrome Capitey- | |
| |
nen wtgesproten zijn, onder welcke wel een vande meeste geweest is. Lancelot Malatesta, die tot sijn huysvrou troude, een seer schoone Iofvrou ghenaemt Francesia dochter van Guyde de Polenta Heere van Rauenna, dese Lancelot hadde een eenighe broeder gheheeten Paulo Malatesta, huys ende fraey van persoone, ende seer gratieus onder die Iofvrouwen, alsoo dat hy ouer al willecom was, dese dan dagelijcx conuerserende met zijn Schoonsuster, heeft zijn ooghen al te seer op haer schoonheyt geworpen, also dat hy met vierigher minnen tot haer ontsteken is, maer in hem seluen ouerdenckende die oneere die hy hem seluen ende schande die hy zijn Broeder aen doen soude, oock mede grootelijcx aen haer wille twijfelende, heeft ghedacht dese quade fantasie wt zijn hooft te verdrijuen, maer als hy wederom aensach die ouerschoone oogen, die twee blinckende sterren schenen te wesen, voorts haer samblant aensicht, so worde al zijn goet opset ende voornemen door die blinde liefde ende oncuysche wil veriaecht. So ist dan gebeurt dat hy met haer alleen in een camer zijnde, in handen ghecreghen heeft, een boeck inhoudende die gheschiedenisse ende auontueren vande Ridders vanden Ronden tafel inghesedt, door den Coninck Artus van Britaignien, in welcken sy met haer beyde hebben gaen lesen, die liefde van Tristan van Lions, ende Isabelle die Blonde, huysvrou van zijn Oom Marcus, Coninck van Cornuaille, voorts die affectie die daer was tusschen Lancelot vanden Poel, ende Geneura Coninginne van Britaignien huysvrou, vanden Coninck Artus, met alle die vrome feyten die sy daerom wtrechten, welcke exempelen Paulo Malatesta soo stout ghemaeckt hebben, dat hy haer ghecust heeft, t'welck sy veynsde qualijck te | |
| |
nemen, dies hy tot haer gheseyt heeft, so verre ghy ghelooft, eenighe hoop ende troost van mijn hart, dat ick die macht soude hebben om te moghen lijden, dat ick niet en can verholen houden, ende dat mijn leuen soude mogen teghenstaen, het vier, het welcke my totten heen toe brant, so hebt ghy groot onghelijck, want weet seker dat so verre ick, corts gheen troost en crijge dat ick haest sal moeten steruen, so sult ghy dan verliesen den getroutsten dienaer die oyt Iofvrou ghehadt heeft, want ghy die ghene sijt om wiens liefde ick alle daghe ende nachte duysent dooden sterue, waerom ick ghedwonghen ben aen v genade te soecken, als een die niet een begeert te leuen, dan om v dienste te doen, gheen ander recompensie daer voor begheerende, dan v dienaer genaemt te worden, welcke woorden hy met so veel tranen ende sware suchten vergeselschapte dat sy: die van vleesch ende bloet, ende niet van marber en was, oock mede want sy hem ouer langhe een goede affectie toeghedragen hadde, groot medelijden met hem creech, t'welck sy nochtans seer arbeyden om verholen te houden, maer nochtans so niet en coste veynsen, oft daer quam al een cleyn suchtken, met een traenken wt, dies hy hem verstoutende, haer inden arm ghenomen heeft, ende half met ghewelt half met wil van haer genomen heeft het ghene daer die minnaers soo langhe om veruolghen, ende heeft haer daer nae, die den ghestoorden maeckte, soo vertroost dat het haer leet was, dat den dach een auont hadde, mette anderen ouerlegghende, hoe sy dicwils byden anderen sonder schandael ende yemants weten soude moghen comen, hebbende nu langhe tijt in dusdanige vreuchden gheleeft, so heeft die fortuyne, haer genuchte benijdende, haer een treeck van haer onge- | |
| |
stadicheyt getoont. Daer was een out dienaer ten huyse, die Lancelot Malatesta seer ghetrouw was, als de ghene die hem wt een ellendighe slauernie ghetrocken hadde, ende het opsicht van zijn huys beuolen had', die welcke siende de groote vrijheyt die dese twee metten anderen gebruyckten, en cost niet gheloouen dat dat sonder zijn meesters schande ende oneere toeghinc, dies hy te neerstiger daer acht op gheslaghen heeft, ende om dies wille dat dese goey lieuen in haer liefde soo verblint waren, dat sy nauwelijcx gheen respeckt meer en droegen, gheheelijck connen mercken, t'welck hem soo verstoort heeft, als een die zijn Heers eere lief hadde, dat hy dat selfde Lancelot, sauons t'huys comende vander Iacht te kennen ghegheuen heeft, alle circonstantien die hy ghesien hadde, daer by voegende. Door welcke woorden Lancelot met sulcken gramschap ontsteken is, dat het weynich schelde als een die in het oorloch op gheuoet was, oft hy soude zijn broeder met zijn huysvrou terstont om hals ghebrocht hebben, maer wat waters in zijnen wijn doende, heeft hem wat bedaert, ende tot die knecht met straffen woorden geseyt, so verre ghijt mijn niet en doet sien met mijn eyghen ooghen, het welcke ghy my nu gheseyt hebt, binnen acht dagen tijts, so sa lick v so tracteeren dat een ander exempel aen v nemen sal, dat sy soo lichtuaerdelijck niet meer accuseeren en sullen haren Vrou, van sulcke leelijcke feyten, het welcke die dienaer hem belooft heeft te volbrenghen, soo verre hy zijn raet wilden doen, te weten, dat hy gheen samblant maken en moeste van yet te weten, maer zijn huysvrou en zijn broeder meer dan op een ander tijt caresserende, t'welck hy al ghedaen heeft, drie daghen daer nae, soo heeft hy gheueynst dat hy moeste na Rauenna | |
| |
trecken, dies hy tot zijn huysvrou geseyt heeft. Alderliefsten v vader heeft my ontboden, dat ick by hem comen moet, om wat sake dat het is en weet ick niet, of v daer en tusschen wat ouerquam, soo meucht ghy mijn broeder aen spreken, die v in als behulpelijck zijn sal, (seggende t'selfde met een innerlijcke sware sucht) ende so verre het mijn breeder sonder mijn presentie niet doen en mach, soo moecht ghy my met een post ontbieden, die vrouwe haer seer droeuich latende van zijn vertrec, heeft hem belooft dat sy dat al doen soude, hem biddende so haest te willen wederom comen, alst hem mogelijck soude zijn, t'welc hy haer belooft heeft, (maer hy dachte al te vroech voor v) daer na van haer ende zijnen broeder oorlof ghenomen hebbende, die hy alle saecke recommandeerden, is vertrocken tot aende eerste post, daer hy solanghe ghetoest heeft, dan den auont begost te vallen, dies hy tot zijn volc geseyt heeft, dat sy hem daer souden verbeyden tot dat hy weder quame, ende hem metter haest vercleet hebbende, is heymelijc by doncker inde stadt ghecomen, ende aenden bogaert van zijn huys comende, is daer van zijn dienaer ingelaten, die hem in een secrete plaetse verborghen heeft, om voorts te gaen vernemen, hoe die saken afloopen souden. Paulo Malatesta ende Francisca de Polenta niet willende laten passeeren die oportuniteyt (maer veel eer ongheluck) die haer die fortuyne scheen te toonen, hebben metten anderen ghesloten sauonts by een te slapen, t'sauonts dan na den eten een yeghelijck slapen ghegaen sijnde, sonder alleen desen ouden dienaer. Soo heeft hy Paulo Malatesta heymelijc sien comen van zijn camer, ende is door hulpe van een secrete dienstmaerte in die camer van zijn Vrou ghegaen. Dies hy terstont na zijn Heer | |
| |
Lancelot ghegaen is, ende heeft hem alle dinghen te kennen ghegeuen, die welcke noch wat verbeydende om zijn dinghen seker te nemen. Is hy daer nae zijn blooten sabel in zijn hant hebbende, metten voorschreuen dienaer, die hem twee barnende tortsen voor droech, na die camer ghegaen, die deur van welcke in stucken ghestooten hebbende, is daer met een verbolgen moet ingetreden. Daer hy dese twee in haer hemde by den anderen gheuonden heeft. Niemant en derf vragen of dese twee verschrickt ende verbaest waren, maer die verbaestheyt en duerden niet lang, want Lancelot hem die vrientschap die hy hem betoont, ende haer die eere die hy haer altijt aenghedaen hadde verwijtende, heeftse ale beyde die hoefden met een slach afghehouden, alsoo sy door die schaemte daer sy in beuonden worden, dicht inden anderen gecropen waren. Daer nae hem keerende tot die dienstmaerte, heeft tot haer gheseyt, en ghy valsche prye, is dit den danck die ick van v hebbe, dat ick v wten drec op ghenomen hebbe, ende heeft haer dit seggende, oock mede het hooft gheclooft, hier hebt ghy (beminde Lesers) het eynde dat die inordentelijcke liefde mede brengt, daer een yeghelijck hem wel voor wachten moet, op dat hem het selfde niet en gheschiede.
|
|
Auteursrechtvrij