|
| |
De derde gheschiedenisse.
Alcestes een Baroen wt Trachien, bemint Lidia, de dochter vanden Coninck Noradin, Coninck van Lidien. Hy doet om haer vele vrome feyten van wapenen, sy wert hem ten houwelijcke geweygert. Dies hy haers vader vyant wert, ende brengt hem ende haer in groote noot, maer sy door schoone woorden hem bedrieghende, comt weder in haer Rijck, ende doet hem daer na van liefden steruen, eyntelijck wert sy met haer vader wt haer rijck gestooten, ende steruen int geuanckenisse ellendichlijc.
Besittende het Keyserrijck van Constantinopelen den machtigen Keyser Mauritius, die van zyn velt ouerste Pyscas omgebrocht worde, so regneerde in Lidien een Coninck, ghenaemt Noradin, de welcke behouden hadde van zijn ouerleden huysvrou een | |
| |
dochter, gheheeten Lidie, nae die hooftstadt vans voorschreuen Rijck, wiens schoonheyt so groot est vermaert was, dat sy alle de werelt daer in te bouen ginck. Die faem van dese schoonheyt hem dan ouer al verspreydende, is ghecomen ten ooren van een rijck Baroen wt Trachien, met name Alcestes, wiens ghelijcke in deuchden ende in vromicheydt der wapenen nieuwers geuonden en worde. Dese voor dese mare met minne ontsteken zijnde, dachte in hem seluen na Lidien te trecken, ende so hy waerachtich vonde dat hy gehoort hadde, hem te geuen in s'Conincx Hof, den welcken hy hoopte soo veel ende groote dienste te doen, dat hy waerdich ghekent soude worden des Conincx swager te mogen zijn, met dit opset derwaerts ghetrocken zijnde, beuont die fame daer veel aen gheloogen te hebben, haer veel schoonder vindende, dies hy hem by den Coninck te Hove ghegeuen heeft, hem ontallijcke ende seer groote diensten doende, want door hem ondergebracht zijn, die Coninc Pamphilie, Carle ende het Coninckrijck van Cilicien, dies hy hem verstoutende, ende op zijn diensten hem betrouwende, die Princesse van haer vader in recompensie van zijn victorien ten houwelijck gheeyst heeft, die Coninck achtende die deuchde ende vromicheyt so veel als een Esel het Snaerspel, heeftse hem geweygert, denckende zijn dochter hoogher wt te gheuen, dan aen een simpel Baroen. Alcestes hem gheweygert siende van een die so grootelijck in hem gehouden was, ende hem behoorde dancbaerheyt te toonen, heeft zijn verlof begeert, ende int vertrecken heeft hy hem gedreycht, dat hem zijn ondanckbaerheyt berouwen soude. So is hy dan vertrocken nae die Coninck Artabano van Armenien, ingheboren ende doetlijck vyant vanden Coninck van Lidien, den | |
| |
welcken hy so opghereyt heeft dat hy die wapenen ende handen ghenomen heeft, makende Alcestes zijn velt ouerste, die niet en begeerde voor zijn roof dan alleen dis Princesse, alle andere conquesten souden voor den Coninck zijn. Ten is niet te vertellen de groote schade dien hy dede, want in min dan een jaer, wont hy vier velt-slagen, innemende alle het Lant, wtghenomen een Casteel, daer die Coninck met zijn dochter opgevlucht was, het welcke door zijn ghelegentheyt onwinnelijck was, die Coninc Noradin al te laet wijs gheworden, en wist wat doen, ende hadde wel ghewilt dat zijn dochter niet alleen Alcestes huysvrouwe, maer zijn dienstmaerte waer geweest, om zijn leuen ende rijck te behouden. Daerom makende vande noot een deucht, heeft zijn dochter aen Alcesten ghesonden om eenich accoort te maken, also het huys opghegheuen moest worden, door honghers noot. Lidia die niet min spijtich ende houeerdich was, als schoon, ende altijt hadde betoont om haer vaders ende eyghen profijts wille Alcestem te beminnen, hoe wel sy hem dootlijck haette, is nae het Leger ghegaen om haer seluen (haers vaders begeerte achtervolghende) aen Alcestes te presenteren, ende hem te bidden te willen ophouden van haer vader te beuchten. Alcestes haer comste vernomen hebbende is haer tegen gecomen, niet als een victorie is man, maer als een verwonnen, beuende ende met een bleeck aenschijn, dies de Princesse merckende dat zijn liefde niet vergaen en was, maer eer vermeerdert, heeft haer eerste opset verandert, ende heeft beginnen te vervloecken zijn liefde, haer grootelijcx beclaghende van zijn wreetheyt, dat hy so onrechtelijc om een weygheringe haer vader ende haer bederf, dat die boom van de eerste slach niet en valt, voorts so verre hy | |
| |
veruolcht hadde, ghelijck hy begost hadde, dat hy haer met haer vaders ende gantsche Rijcx belieuen wel ghecreghen soude hebben, bouen dien, so haer vader int weygeren hertneckich waer ghebleuen, so sende sy hem heymelijc so wel onthaelt hebben, dat hy hem van haer niet beclaecht soude hebben. Maer nu sy sach dat hy door ander middelen te werck ginc, so was sy van sinne hem nimmermeer te beminnen, ende al hoe wel sy nu tot hem ghecomen was door mede dooghen van haer vader, soo macht hy nochtans sekerlijck weten dat die gheneuchte niet lang' dueren en sal, want sy haer seluen het leuen benemen soude, ende andere dies ghelijcke woorden tot hem gebruyckende, waer door hy sulcken berouwe ghecreghen heeft dat hy haer te voet gheuallen is, wt treckende zijn eygen sweert, haer het selfde gepresenteert, biddende dat sy met haer eyghen hant wilde wreken zijn misdaet. Die Princesse hem in sulcken ghesteltenis siende, heeft haer victorie veruolcht, hem goede hoop geuende (hoe wel sonder meenen) van haer te vercrijgen, so verte haer vader weder in zijn Rijck door hem gestelt worde, ende hy voortaen ghetrouwelijc diende, t'welck hy haer altemael gheloeft heeft, haer vry seyndende naer het Casteel, sonder van haer yet anders te nemen dan een cusken. Alcestes is daer nae by den Coninck van Armenien ghegaen, hem biddende te willen laten het Coninckrijck van Lidien aenden rechten Coninck, ende hem contenteren met de ander gheconquesceerde Landen. De Coninck dit hoorende is gram geworden, ende heeft het hem plat wt gheweygert, segghende dat hem alle die conquesten toe behoorden, dat hy niet en begeerde ouer te geuen door zijn bidden het ghene hy met groote moeyte ende costen in een jaer ghe- | |
| |
wonnen hadde, voorts dat hy van daer niet scheyden en soude, soo langhe de Coninck Noradin een voet lants hadde, was hy door een vrou omgheset dat was zijn schade, ende dat hy hem wachten soude yet meer van sulcx te spreken, oft hy soude betoonen dat het hem leet waer. Alcestes met toorn ontsteken zijnde, heeft gheantwoort dat het gheschieden soude, of het hem lief of leet waer, ende met dien zijn sweert treckende heeft den Coninck omgebracht, dies hy van die vande Armenien besprongen zijnde, heeft die selue met hulpe van die van Lidien ende Cilicien, die onder hem stonden, t'onder gebracht, zijn victorie veruolghende heeft in een maent tijts den Coninck Noradin wederom in zijn stoel geset. Daer en bouen innemende Cappadesie, ende een deel van Armenien. Alcestes dan wederom ghecomen zijnde, met segen ende victorie, in plaetse van recompensie dachte de Coninck, met zijn dochter hem om hals te brenghen, altijt ghedenckende het quaet dat sy door hem ghehadt hadden, maer hebben het selfde niet opentlijck moghen volbrengen, ouermits den grooten aenhanck die hy hadde, soo hebben sy dan andere middelen gesocht. Die Princesse heeft haer gelaten hem seer te beminnen, hem dagelijcx meer hoops gheuende van haer ten houwelijck te crijghen, maer dat hy noch zijn vromicheyt toonen moeste tegen haer oude vyanden. Dies sy hem dan alleen, dan met weynich volcx, sout teghen stercke ende machtige vyanden, dien hy altemale door zijn gheluck ende vromicheyt te houen quam, tot haer groot leetwesen. Daer na dede sy hem twist ende querele nemen tegen zijn beste vrienden, op dat hy so in alle de werelts haet comen soude, t'welck hy al dede om haer te behagen, sonder yemant aen te sien. Hebbende nu Lidia doen om- | |
| |
brengen alle haers vaders vyanden, ende Alcestes vrienden heeft sy claerlijck te kennen ghegheuen t'ghene sy so lange ouder een valsch Momaensicht verhoolen ghehouden hadde, te weten: dat sy hem dootlijck haette, ende dat sy zijn doot in alderley manieren sochte. Soe heeft sy daer nae hem niet willen sien noch hooren spreken, noch eenige brieuen ofte bootschap van hem ontfanghen, t'welck Alcestes so seer ter herten ghenomen heeft, als dat hy, gheen ghenade met bidden van haer connen crijghende, van droefheyt ende hertseer gestoruen is. Maer Godt en heeft die ontschuldige doot niet langhe onghewroken ghelaten, want Armenis, sone vanden Coninck Artabano, verstaen hebbende, die doot van Alcestes, is met een machte van volck door assistentie van Pacoreus, Coninck van Parthen, in Lidien geuallen, heeft niet alleen den Coninck Noradin het Rijck afghenomen, maer hem met zijn dochter gheuanghen hebbende, heeft haer in een doncker gheuanckenisse ghestelt, al waer sy haer ondancbaerheyt beschreyende, haer leuen in grooten ellende gheeynt hebben.
|
|
Auteursrechtvrij