Der ionghe dochters tijt-cortinghe

[fol. 15v]

De vierde gheschiedenisse.

Sinato ende Sinori beminnen Camna, Sinato trout haer, Sinori brengt hem om hals, hy eyscht haer ten houwelijck, sy consenteert dat, met die meenighe om haer mans doot te wreecken, gelijckse oock doet, want sy hem ende haer seluen vergeeft.

Ten tijden vanden moghenden Keyser Traiaen, waren in die stadt van Galatien twee borghers, schoon van lichaem ende rijck van haue, d'eene genaemt Sinata ende d'ander Sinori, malcanderen seer lief hebbende, ende dagelijcx metten anderen conuerserende, also sy seer nae bloet-verwanten waren. Dese zijn alle beyde verlieft gheworden op een Griecsche ionge dochter, met name Camna, haer alle beyde ten houwelijck begherende, waerom sy haer alle beyde seer veruolchden ende dienden, maer also die fortuyne den eenen meer toegedaen is dan den anderen, so heeftse Sinato so wel gedient, dat hy haer door zijn neersticheyt ten houwelijck ghecreghen heeft. Sinori siende zijn moeyten verlooren, ende hem wt alle hope, voelde een wtghenomen groote hertseer, die moet nochtans niet verlooren geuende, en liet niet af (sonder eenich resepect te hebben, noch aen zijn vrient, noch aen dat sy ghehylict was) van haer te dienen, haer veruolgende importunerende ende versoeckende, niet twijfelende ofte zijn lange ende getrouwen dienst soude haer eerlijck herte verwinnen, maer was al verlooren moeyten, want sy getrout hebbende Sinato voor haer man, haer herte ende sinne altemael op hem gestelt heeft, alse dat sy niet alleen om haer groote schoonheyt,

[fol. 17r]

heyt tot v. Haer daer na keerende tot Sinori, heeft tot hem een ontsteken aensicht van gramschap ghesproken: O verrader ende dootslager van mijn man Sinato, die met my begeert te houwelijcken vertreckt u wt mijn ooghen: ghy meent dan te leuen in gheneuchte ende in vreuchden, ende ick soude met droeffenisse beuanghen zijn, Neen steruen sult ghy en dat door mijn handen, maer een dinck beclaech ick, dat ghy alte eerlijcken Beul hebt tot u doot, ende dat de pijn niet groot ghenoech en is om te straffen v verraderie. Maer ick bidde die moghende Goden, die alle dinghen met een rechtueerdich oordel ende ooghen aensien, dat sy de straffe die ick na mijnen sinne aen v niet en hebben connen volbrenghen, die reste naer haer rechtueerdicheyt voldoen. Dit ghesproken hebbende, heeft sy haer seluen ter neder gheset, ende alsoo die gheest ghegeuen, ende werde terstont van Sinori gheuolcht. Sy zijn alle beyde begrauen met verscheyden passien, d'een om haer deucht ende eere van gants Grieckenlant gepresen ende beclaecht, d'ander om zijn onvromicheyt ende lachter van alle de werelt ghelaeckt ende vervloeckt.