Historie van Hughe van Bordeus
(1860)–Anoniem Huge van Bordeeus–
Auteursrechtvrij
[Folio 62a(Qij)]
| |
ALs coninc yuorijn dit voorseyt al hadde ghehooret, so was hi seer verslaghen ende seyde. Bi mamet ende appollijn, heeft mi Astermant also verraden dat hi desen garsoen in mijn lant ghebracht heeft die mi so groten scade gedaen heeft, ic sal astermant doen hanghen als een dief ende verrader. Doe werden die twee coninghen versoent, maer het viel astermant sere swaerlick want si werden beyde op hem vergramt ende deden Astermant vangen ende si deden een galge stellen voor palernen. Ende hughe stont bouen in dat palleys ende hi wert dat siende hoe dat dye man astermant werden ghebonden sijn handen achter op sinen rugghe met eenen bande. Ende hughe riep O ghi heeren ic bidde v wapent v terstont, want Astermant is in groter sorghen want men wil hem hanghen hier voor dit casteel, ende desen last heeft hi om mijnen wille ick sal hem verlossen wt sijnre noot oft ick sal daer selue doot bliuen. Aldus hebben si hem terstont ghewapent ende sijn so wter poorten vanden casteele ghereden, ende hughe sadt op sijn goede paert blansadijn. ende hi reedt op coninc yuorijn ende werp hem van den paerde ende hi greep den speelman mettien ende werp hem op sijn paert met groten arbeyt, ende die sarasinen souden hem astermant wedere met machte hebben ghenomen en hadde ghedaen die hulpe van alyames ende van den ridderen ende si deden grooten arbeyt om Astermant te verlossen, also dat si int heyre van den sarasinen verloren haren neue Gherijn den edelen heere dyen die sarasinen hebben doot gheslaghen, dies huge ende alyames seer bedroeft waren ende die ander heeren ende ridders ende keerden ter | |
[Folio 62b]
| |
stont na den casteel ende sloten vaste die poorten, want so langhe als si op dat casteel waren, soo en mochte dat niemant winnen want die stadt ende dat slodt was sere wel gheuitalieert. |
|