Historie van Hughe van Bordeus

¶ Hoe Aliames Gherijn ende dye .x. ridders Claramonden na hughe vraechden, ende hoe si in onmacht viel alsmen huge noemde.

[fol. 59a]

ALs die coninc nv vanden casteel was so quam Claramonde wter cameren bi aliames ende den anderen die nv na hugen vraechden waer hi veruaren was Als Claramonde hoorde hughen noemen so viel si in onmacht. Doe nam gherijn water ende besprayde se in haer aensicht dat si weder bequam. Als si becomen was soo seydese dat se van hughen niet en wiste want als wi tesamen in die barcke waren so dede hi met mi sinen wille, ende terstont quam daer een onweder met eenen donderslach die de barcke in stucken sloech ende wi quamen bi auontueren op een planke daer wi al naect mede te lande dreuen, daer wi tesamen op ghinghen, ende wi hadden so groten coude dat wi beefden ende clippertanden. Doe quamen daer ghereden .xij. sarasinen die hem handen ende voeten bonden ende lieten hem al naect daer ligghen op dat sandt, ende deden mi aen een cleedt dat wel warm was ende vuerden my met hem. Ende doe quam dese tyrant galefier ende nam mi den sarasinen ende hi bracht mi op dit casteel, ende van dier tijt voort en heb ick van Hughen niet meer ghesien noch ghehoort. Maer coninc yuorijn van mombrant heeft gheweest cortelinghe voor dese stadt van palernen ende hi bracht met hem eenen ionghen man die quade wapenen aen hadde ende een verroest swaert, ende hi was ghereden op een cruepel manck wagenpaert, nochtans so versloech hi den groten stercken coninc Sorberijn, ende ooc eenen anderen heere ende eedelen man gheboren van deser stadt. Op desen heb ic dicwil ghedacht, ende mi heeft altijt ghedocht dattet hughe sal sijn. Doen seyde alyames. Och mocht ic mijn neue hughe te mombrant

[fol. 59b]

vinden so waer ick blijde, want ic hebbe een metalen hoornken, hoorde hi mi blasen, hi soude mi daer aen wel kennen. Ende mochte ic hughen int velt sien ende hi mi, ic soude vlyen ende hi soude mi volgen wten heyre ende so souden wi te palernen op dit casteel comen ende wi souden dan gaen vechten ende strijden tegen Galefiers ende yuorijn, want wat leedt ende quaet dat den sarasijnscen honden geschiet dat is al cleen om achten. Ende eer si haer sprake gheeyndet hadden, so was galelier voor die sale ende die schoone Claramonde in haer camer, ende Alyames was wel gheleert, die ontfinck Galefier vriendelijcken met sueter spraken, ende alle die met hem quamen int palleys ghereyden hem allen ter wapenen, ende alle dat heyr vergaderde voor des conincx sale. Ende Galefier is ook op gheseten, ende so sijn si allen met grooter crachte nae mombrant ghetrocken. Ende dese nyen mare quam voor Coninck Yuorijn hoe Galefier op hem was comen, ende hoe hi sijn lant al verderf ende destrueerde, des coninck yuorijn droeuich was, ende doe nam coninc yuorijn hughen metter hant ende seyde. O gherijn ick bidde v helpt mi doch nv mijn landt beschermen. Hughe antwoorde, wel heere, maer tis quaet dat ghi soo langhe verbeydet, ende hi dede terstont alle sijn heeren ende ander volck ter wapenen gaen. Ende als si nv al gereet waren, so saten si alle op, ende huyghe was seer wel ghewapent ende sijn paert blansadijn was ouerdeckt met een yseren coffituere, ende daer bouen noch een ander van siden sindale ende huge reedt naest den coninc yuorijn, aldus sijn si tesamen buten der poorten ghecomen daer si sagen

[fol. 60a]

dat heyr van galefier. Daer vergaderden terstont, de twee heeren, ende daer wert vreeslic gestreden, daer werter menich vanden paerde int sant ghesteken, daer werter menich doot gheslaghen ende ter hellen ghesonden. Maer hughe dede alleen meer schaden in galefiers volck dan al dat ander volck, sulcken moort wracht huge met sinen swaerde ende met sijn goede paert blansadijn. Doe seyde aliames wat duuelscer man is dit niemant en mach voor hem ghedueren want sijn swaert snijt yser ende stael. Doen seyde alyames ick sal den man besoecken, ende hi nam een stercke spere ende wilde op hughen rijden. Ende mettien stac hughe sijn paert ende greep een glauie, ende reden so op malcanderen deen den anderen niet kennende so dat huygens lancie brack in veel stucken, mer alyames dye grijse stack op hughen met sulcker crachte dat hy hughen wten sadel lichte so dat hi ter aerden viel, mer hughe spranc lichtelijc op ende ghinc vechten metten swaerde ende seyde in sijnder franscher tale in sijnder moeder sprake, o god heere Jhesu Criste verwaten moet sijn dese sarasine, ende dit verstont aliames wel, ende hy antwoorde in Fransoys segghende goede vriendt en slaet niet maer segghet mi van waer ghi sijt dat bidde ick v. Ende doe kende hem hughe terstont ende seyde O alyames mijn wtuercoren vrient ende neue sijt willecome Ick ben v neue hughe.

[fol. 60b]

Doe seyde alyames sijt willecome ionchere. Gherijn ende v.x. ridders sijn int heyr, wi hadden v lange gesocht op de zee, ende ten laesten quamen wi hier in des conincx dienst te palernen daer ic sach dye scone claramonde O lieue neue seyde hughe. Ic was voor palernen daer ic versloech den coninc sorberijn, ende daer sach ic claramonde op dat casteel, maer ic sorge al heb ic se ghesien dat ic se nemmermeer weder ghecrighen en sal. Doe loech aliames ende seyde, en sorcht daer niet voren, ic sal mijnen horen blasen als ic wten heyre ben, ende gherijn ende v ridders sullen mi volgen, ende dan sullen wi tesamen vlyen ende ghi sult ons achteruolghen met uwen blancken sweerde, dan sullen die sarasinen werden versaget ende veruaert ende si sullen meynen dat ghi ons iaget. Doen seide huge, dats goeden raet. Ende alyames vloet van hem ende huge sadt op sijn schone paert blansadijn, ende Alyames blies sinen metalen horen dat gherijn ende die thien ridders gheringe hoorden ende si volchden hem terstont nae ende si vloden wech met Alyames. Ende hughe volchdese van achter metten ghetrocken swaerde rechte oft hi se al verslaen soude, Ende dat deden si so langhe tot dat si dat heyr niet meer en mochten sien. Doe stack huge sijn swaert op ende si reden ghekkerhant nae palernen met grooter haeste ouer berch ende dal. Ende als si te palernen quamen so vernamse gheringe die schone Claramonde ende sie liep terstont neder ende ontdede dye poorten vanden casteel ende heeftse blidelic ontfaen. Als si hughen sach so verlichte haer herte gelijc den dach ende si heeft hughen in haren armen ghenomen ende seer vriendelic ghecust ende hete hem willecome, ende aliames ende de ridders sloten de poorten

[fol. 61a(Q)]

Ende als aldat geselscap binnen was, so sloot aliames weder de poorten toe, ende ghingen doe goet die ander ridders om dat si wten heyre ghetrocken waren, want sijn volck wert so seer verslagen dat coninc galefier moste dat velt ruymen ende coninc yuorijn vervolchde hem slaende van achter in sijn volc ende so vliende quam galefier met sijn volck op die graften vanden slote van palernen, ende hi riep segghende, doet doch op terstont die poorte, bi mamet ic ben in grooten lasten Dit hoorde aliames ende hi liep tot eender vensteren ende seyde heere verbeyt mi daer tot morgen, want in een maent en suldi op dit casteel niet comen Als dit galefier hoorde waende hem van rouwe sijn herte scueren. Doe socht galefier ootmoet aen coninc yuorijn van mombrant ende hi gaf hem verwonnen ende hi wert sijn leenman ende hi swoer hem voertaen ghetrouwe te sijn. Doen seyde galefier O coninc yuorijn ic beclage mi seer ouer uwen speelman astermant want ter quader tijt brocht hi Gherijn int lant, hi heeft v ende mi grote schade ghedaen. Hi is te palernen bouen op mijn casteel bi claramonde die schone ionffrouwe die ic met al mijnder herten beminde ende daer sijn noch bi hem .xij. mannen van wapenen die ic cortelinghe had aengenomen in mijn soudie ende daer is vitalien ghenoch, si moghen goet chier maken ende laten mi daer buten, want in .x. iaren en soudemen hen lieden dat casteel niet af gewinnen, dat siet die valsche knaep ooc wel, daerom wordic nv van hem beghect ende bespot, ende ic ben deerlic van hem ghehoent

[fol. 61b]

ende van claramonde die ic meende mijn wijf te worden mer mamet en maecte noyt felder wijf, si was altijt bedroeft mer ic en dachte niet dat se mi so gelaten soude hebben. Ay lacen ic moet wel verwaten ende veruloect sijn. Ende ick segghe dattet is die selue man dye uwen broeder den amirael versloech, want op een tijt liet se haer een woort ontuliegen daer ic wel aenhoorde datse den Saryant ende den bedriegher lief hadde.