Historie van Hughe van Bordeus

¶ Hoe alyames, gherijn, ende die ridders .v. weken lanck hughen sochten op die zee.

[fol. 58a(Pij)]

ALs hughe nv langhen tijt verloren geweest was ende aliames ende sijn ridders nyet en wisten waer hi veruaren was so waren si bedroeft ende creghen een scip ende sloeghen weder in die zee, daer voeren si wel. .v. weken lanck ende sochten hughen, so dat si den lesten quamen in de banen van palernen ende galefier lach op sijn casteel ende sachse comen. Doe ghinc galefier op de hauen ende vraechde oft si comenscap brochten. Doen seide aliames, ghenadighe heere wi en brengen gheen goet, mer wi souden gheern dienen eenigen heere daer ons goet afcomen mocht. Doe seide de coninc van palernen ic sal v wel onderhouden ende gheuen v goed en soudt dat ghi lieden wel blijdelic van mi scheyden sult. Doe si dit hoorden waren si verblijdt ende ghingen te lande ende quamen metten coninc op sijn casteel. Als si nv in de sale waren so quam hen lieden int gemoet Claramonde waerom si ontstelt werdt in haer aensicht, maer nyemant en dorste haer aenspreken. Maer claramonde en conste haer niet onthouden, mer si weende van groten iammer ende si ghinc in haer camer daer si groten rouwe dreef om hughen die si niet en wiste waer hi veruaren was ende om dat hughe bi hem lieden niet en was, so sorchte si dat hi verloren ware. Ende van claramondens droefheyt en wiste galefier oock niet, mer hi seyde tot Aliames ende totten anderen. Ghi heeren ghi moet mi raden want ick had eenen vromen neue gheheeten Sorberijn die is deerlic verslaghen, hierom ben ic vyant den coninck yuorijn van mombrant. Doe seyde alyames. Genadighe heere wildi dat ghewroken hebben so ontbiet v eedelen, v heeren, ende ander volck in die wapenen ende wi sullen te samender hant trecken voor mombrant

[fol. 58b]

Doe seyde de coninc vrient dat moet v lonen die god ternogant, segt mi doch hoe is uwen naem hi seyde ic heet aliames Doe seide de coninc o aliames ic beuele v mijn beminde vrouwe, ic soude gheern wreken den doot van mijnen neue. Doe ghinc die coninc van tcasteel in de stadt ende dede vergaderen sijn heeren, ridders ende sijn volc al in dye wapenen ende ter oorloghen bereyden.