Historie van Hughe van Bordeus
(1860)–Anoniem Huge van Bordeeus–
Auteursrechtvrij
[Folio 56a]
| |
[Folio 56b]
| |
DIe stoute huge had wel gehoort ende verstaen al die woorden die de twee coninghen tesamen hadden Dus is die edel hughe op gheseten op sijn cropel paert ende stact met sporen ende reet al hinckende na, maer het wert seer lanc eer hi te montanien quam met sijn cropel ende mancke paert daer hi den groten coninck Sorberijn vant. Doe seyde Sorberijn, lieue knape wat tijdinge brengdi ons. heeft coninc yuorijn .vij. ridders geuonden die teghen mi dorren te campe comen. Neen seide huge maect v niet te fier ende te stout, de coninc seynt mi alleen hier tegen v alsulcken knape als ick ben ende dat ic sal vechten voor hem. Nv seyde huge vliet van mi oft stelt v ter weer oft ic steke v met mijn spere. Dies balch hem Sorberijn seer ende hi keerde sijn goede paert Blansadijn ende heeft sijn glauie ghenomen, ende is seer verstoort op hughe gereden ende stach hem met cracht door sinen schilt ende hi maecte een grote schore in sinen halsberch dattet yser neffens sijn ribben doorvloech, ende hughe was ghewont mer hi bleef nochtans staen\den in sijn cranck verroest harnas. Ende die edel huge ghinc ter aerden van sijn cropel paert ende hi track wt sijn verroest berooct swaert, ende mettien keerde hem sorberijn tot hughen ende hi meende hem dat hooft af te slaen, mer hughe schuttet op sinen schilt ende hi ontkeerde hem dat houet, want hughe was te vechten wel gheleert. Doen meende die payen anderwerf op hughe te slaen, mer huge hadde hem den slach ondergaen ende hi hief op sijn swaert met beyden handen ende sloech so vreeslic op dat hooft van Sorberijn den payen dat hijt hem totten tanden cloofde, so dat hy doot ter aerden viel. Ende hughe track Sorberijn sijn wapenen wt ende hy wapende hem | |
[Folio 57a(P)]
| |
seluen daermede ende sadt op dat goede paert blansadijn ende hughe seide. O god door v ootmoet behoet doch mi van quader auontueren, ende bewaert ooc mijn goede paert blansadine dattet voor mi si, ende huge is doe ghereden wten geberchten, ende hem quam een teghen ghereden een ridder die van palernen geboren was dien hughe ooc wilde beuechten, des hem die ridder vromelic te weer stelde ende hi liet sijn spere sincken ende stack op hughen, mer hughe ontfinck den steeck op sinen schilt. Ende doe track hughe sijn swaert ende volchde den ridder ende sloech hem op sinen helm van finen stale dien hi doorsloech metten beckeneel so dat hi den ridder dat hooft cloofde totten tanden ende die ridder viel doot ter aerden van den paerde, ende hughe greep dat paert metten thoom van goude. Ende hughe is doen weder ghereden int heyr van daer hi gecomen was ende daer quam hem int ghemoet die verrader die hem te mombrant dat croepel paert dede, dyen gaf hi des ridders paert ende seyde. Dat paert geef ick voor dat beroeste swaert daer ghi my te mombrant so wel mede dyende. Doe seyde die man, danck moet ghi hebben, want dat swaert is immer wel betaelt ende mamet moet v lonen van die grote gauen. Ende doe quam huge in coninc yuorijns tente daer hem die coninc eerlic ontfinc met xij. van sinen heeren om den campe dye hy had ghedaen, ende coninc yuorijn seyde. O lieue gherijn ic wil voortaen al na uwen raet doen, mer hadt de coninc gheweten dat hi bi sijnre nichten ghelegen hadt, ende dat hy sinen broeder verslaghen hadde, hi en soude hem niet so vriendelick hebben ontfaen al had hy hem noch so veel diensten gedaen. Als nv galefier die coninc hoorde dat sijn | |
[Folio 57b]
| |
neue Sorberijn so verslagen was, so beclaechde hi hem seer ende was bedroeft, ende hi was seer vergramt, maer coninc yuorijns belegge en achte galefier niet want al hadden si voor die stadt ende casteel gheleghen .xx. iaer so en souden se die niet ghewonnen hebben: want dat castele was so sterc dat hi niemant en ontsach. Aldus moste coninc yuorijn weder keeren na mombrant want hi en conste galefier niet gedoen. Ende aldus is coninc yuorijn op getrocken met al sijn heyr ende is so wedder gecomen in sijn stadt van mombrant, ende huge reedt biden coninc ende vercreech daer groote eere. |
|