Historie van Hughe van Bordeus

¶ Hoe coninck yuorijn raet vraechde aen Gherijn sinen dienaer, hoe hi weder crighen soude sijns broeders dochter.

[fol. 54a(Oij)]

WAnt nv coninc yuorijn verstaen had dat de coninc van palernen had genomen claramonde sijns broeders dochter, so seyde hi tot gerijn. O vrient wilt mi raet geuen, want ic hebbe den coninc van palernen ontboden met .x. edelmannen dat hi mi sende claramonde mijn nichte ende hi swoer dat ic se niet weder hebben en soude al dade ic al dat ic mochte. Doe huge hoorde van claramonde so wert hi al heel verblijt ende seyde. Genadige heere tis qualic ende scandelic gedaen dat hi v nichte wil houden tegen uwen danc mer wildi minen raet doen hem salder grote scade ende verlies afcomen, so ontbiet v volc van wapenen, ende v edelen, ende dan sullen wi trecken metter macht voor palernen, ende ick sal dijnen standaert vueren, ende wi sullen v nichte claramonde wel gecrigen. Als dit coninc yuorijn hoorde so seyde hy goede gerijn dat is goeden raet. Ende ghi sult hebben van harnas ende van paerden al dat ghi begheert daertoe te hebbene

[fol. 54b]

Dit verhoorde een Sarasijn die den coninc wechleyde ende sprack heymelic met hem ende seyde. Heer coninc en doet dat in gheenre manieren dat ghi hem laet vueren uwe baniere, al is hi cloeck van spreken hi en can bi auontuer niet oorlogen daerom en betrout hem niet te veel mer is hi cloeck voor sijn lijf men sal hem goede wapen ende harnas geuen ende een goet paert ende laten hem seluen proeuen in den strijt. Die coninc seyde ic bens tevreden Ende so heeft hem gereet dye coninc ende alle sijn volc in die wapenen. Maer hoort van hughens gheualle die ooc mede den stride soude riden, hem wert gebracht een harnas oudt ende verroest ende een hinckende paert dat achter ende voor croepel was, ende had langhen tijt in een karre ghegaen, ende men bracht hem een swaert dat wel vij. iaer inden roock had ghehanghen, twelc huige wt track ende sach aen twee teekenen dattet gemaect had Galant die smit daer hi wel mede tevreden was want graue Roelant hadde sijn weergade ende des ghelijcken Ende hughe seyde, danck hebt vrient ghy hebt mi wel ghedient, ic sal v voor Palernen een beter weder gheuen. Doe seyde de Sarasijn in spite. O gherijn hoe soudi mi wel betalen. Aldus is de coninc wt gereden met sijn edelen ende met al sijn volc, endelinghe is op geseten ende is onsachtelic vast na ghereden ende somtijts ghinc hi te voet, mer hughe moeste doe paciencie hebben Aldus is die coninck voor palernen ghecomen daer hy sijn tenten heeft opgheslaghen op die groene velden Dit ver\nam coninck galefier van palernen ende hy dede sijn poorten sluyten, ende die van binnen vraechden luttel na coninc yuorijn want hi en mochte dye stadt met fortse niet winnen, want si was seer sterc ende wel

[fol. 55a]

voorsien van vitalien ende van alles dat si behoefden ende galefier ginc tot Claramonde ende seyde Coninc yuorijn heeft mi beleyt om uwen wille, sijt ghinder sijn tenten ende volck. Doe seyde claramonde. Het waer beter dat ghi mi hem ouer gaeft eer ghi bi mi schade liden sout Doe seyde galefier. Dat en sal ic niet doen, ic verlore mi lieuer al dat gout daer ic here ende coninck af ben dan dat ghi in sulcken last ende verdriet comen soudet als hi v aendoen soude hadde hi macht ouer v. Ende ooc en dorren wi niet sorghen hi en soude dit casteel niet winnen in hondert iaren al hadde hijt gesworen bi sijnder cronen, want ic van alles genoch heb ende mi coemt altoos ghenoech van coren taruwe ende wijn in coggen scepen in galeyen als ick wil ende van doen heb, want mijn voorvaders hebben so veel gedaen datmen ons dye hauen niet benemen en can. Hoort nv van coninck Sorberijn die seer groot ende ontsien was dye tot sinen oom den coninc van Palernen quam ende seyde. O lieue oom ic ben ooc een coninc van groter macht ick sal riden tot coninc yuorijn ende segghen hem dat hi op ons wil vechten dat hi daer gheen recht toe en heeft, want Claramonde sal v wijf sijn ende bi haren wille isse bi v gecomen ende goet willichlic isse met v in v stadt ende op v slodt ghereden sonder yemants bedwanc. Ende wilt coninc yuorijn daer teghen seggen so sal ic van hem eenen camp begheren, ende wie den camp winnen sal, die sal Claramonde hebben, ende so sal icse metten swaerde winnen, want ic heb grote begeerte om te vechten daer voren. Doe seyde die coninc van palernen. Danc hebt lieue neue mer wapenen ende harnas sullen ghenoech sijn voor v ende dat suldi hebben tot uwen wille. Doe ghinc hem die

[fol. 55b]

grote stercke coninc Sorberijn seer rijckelic wapenen ende beschreet een seer groet paert dat geheten was blansadijn, dat seer costelic ouerdeckt was met een coffiture ouercleet met roodt siden laken besayt met gulden vlammen, ende hi leedt soo alleen wter stadt van Palernen, ende hi dede die poorten achter hem toe sluyten, ende hi is ten laetsten gecomen totter tenten daer hi coninc yuorijn vant ende hi seyde tot hem. Heer coninc van mombrant so helpe mi ternogant ghi hebt groot onrecht dat ghi op ons begheert te vechten, ende dat ghi belegt mijn ooms stadt om die Jonffrouwe Claramonden si sal doch sijn wijf sijn Spaert hem mamet van der doot Ende wildi hier teghen segghen so begheer ick eenen campe teghen twee die vroomste van uwen mannen die ghi vinden condt. Ende doetse wapenen ende wel gereyden ende sendtse tot mi int geberchte daer sal ic se verwachten maer ende darren die twee teghen mi niet campen so seynter .iij. ende darren die drie mannen niet comen so senter .iiij. want .v. ridders darre ick wel bestaen. Ende vi. oft .vij. mannen en sal ic niet ontvlien, ten ware dat mi faelgeerde mijn goede swaert, oft mijn goede ende starcke paert blansedijn. Aldus bidde ick v dat ghy v mannen doet bereyden, ick reyse na dye montanien Ende moghen mi .vij. ridders verwinnen so suldi met payse v nichte weder hebben. Ende can ic my verweren teghen hem lieden so sult ghi v oorloghen laten staen ende ghi sult die ionffrouwe mijnen oom laten hebben sonder eenich wedersegghen. Doen dit coninc yuorijn hoorde, so was hi seer moedich van herten ende sprac veel quaets, waerom dat sorberijn gram wert, ende keerde sijn paert ende reedt wech.