Historie van Hughe van Bordeus

¶ Hoe die heren van bourdeus cooplieden wt seynden om Hughen haren rechten here te soecken.

NV willen wi spreken van Gheraert hugens broeder die heere wil wesen van den lande van bourdeus want als hughe sijn broeder gebannen was ende hi van paris scheyde, so en meende hi hem niet wedder te sien ende so troude gheraert corts daerna een wijf een dochter van eenen groten hertoge Gubewaert gheheeten. Ende als hi een wijl tijts gehuwet was, so wilde hi here wesen van bourdeus ende si en wilden hem niet ontfangen, doe vuerde hi groot oorloge op bourdeus met hertoge gubewaert sijn wijfs vader dat een valsch verrader was dat namaels wel blijcte, ende daer waren noch meer heren die bi bedwange wilden Gheraert een heere maken van bourdeus. Die edelen des lants en wilden gheeraert voor gheenen here hebben si en wisten eerst dat hughe certeyn doot waer. Ende si hebben al ghesloten met ghemeynen rade dat si wilden hughen doen soecken Ende si senden wt .xij. ricke cooplieden ende borgeren van bourdeus met comanscap in alle hauenen van den steden daer si in heydenisse metten scepe aen quamen, daer si goet coften ende vercoften wederom na haer profijt ende om te vernemen na hugen haren here, ende so voeren si veel waters dach ende nacht ende in veel hauenen. So geuielt dat god sinen vrient wilde vertroosten, so beweechde hi die cooplieden int lant van Palernen, so dat si in die hauene arriueerden ontrent dye casteel Ende huge

[fol. 63a]

sach bouen opter tinnen ende hi sach opten mast van den scepe dat teeken van bourdeus Doe wert huge seer verblijt ende hi riep alyames haestelick bi hem, ende si gingen onder hen beyden van den casteel op de hauen daer si tscip sagghen ende si vraechden van waer dat schip was ende alle dat volc datter in was. Ende si antwoorden op die fransche tale dat si al van bourdeus waren. Doe seyde hughe sidi van bourdeus so kendi hertoghe Sanguijn wel die doot is ende sijn twee sonen. Doe seyden die cooplieden hertoghe Sanguijn was ons here god moet sijn siel ontfermen, ende al tlant versterf op sinen sone hughe, men vant noyt sijns ghelijc so huesch ende goedertieren, mer gheraert die ander sone is fel ende quaet god moet hem bedroeuen. Och oft onse here huge noch wel varende waer so souden wi ons allen verbliden. Lacen hi versloech bi groot ongeual coninc karels sone Charloten. Daerom versant hem coninc karel van vrancrijke een wilde vreemde passagie ende een wonderlijke pelgrimagie ende om een grote swaer bootscap die niet moghelic en is om doen ten waer dat god wilde sonderlinge gracie aen hem bethonen ende hem verleenen wtnemende victorie Dier gheliken en is niet meer gehoret, want coninc karel sant hughen te babilonien totten Amirael Gaudijs om te brengen den baert ende die vier achterste tanden wten monde vanden amirael voorseyt. Ende als hughe van Parijs versonden was, so huwede corts daernae int selue iaer Gheeraert sijn broeder aen hertoge Gubewaerts dochter, die de van bourdeus heeft menighe schade gedaen bi sinen rade hy wilt voor een here des lants ontfanghen sijn, ende die edelen ende die lantsaten en willens niet doen voor dat

[fol. 63b]

si seker sijn waer hughe gebleuen is oft hi leuende of doot is. Ende om hughen te soecken ende daeraf te vernemen so waren wi .xii. mannen daer toe gheor\dineert om in veel landen te reysen met onser comenscap, wi hebben langhen tijt op de zee gheuaren, ende wi hebben gheweest in veel steden om onsen heere te soecken. Doen seyde Hughe, ghi hebt den man gheuonden, ende ick bent selue.