¶ Hoe hughe knielde voer Coninck Abroen ende dancten van sijnre victorien die hi hem hadde doen hebben ende alle weldaden.
ALs nv die battalie gedaen was ende die sarasinen meest verslaghen waren so quam huge met groter begeerten ende viel ootmoedelijc op sijn knyen voer coninc abroen ende badt hem vergiffenisse ende seyde. O edel here weest mijns ghenadich, ic kenne dat ick teghens v misdaen heb ende dat ick v o mijn oom here verwracht heb dat heeft gedaen mijn onwijsheyt ende dat ic uwen geboden ongehoorsaem geweest heb, nv bid ic genade door god ende sijn bitter lijden. Doe seide coninc abroen staet op het is al vergheuen, ende maect v bereyt om na parijs te reysen ende neemt den baert van den ammirael Gaudijs ende sijn vier hoecktanden ende brengtse coninc karel van vrancrijcke. Doen seyde claramonde O edel here hoe sal hi dit connen bewaren Ende doe loech abroen ende seyde, herde wel Doe nam huge dat hooft vanden amirael ende track daer den baert wt ende nam ooc die vier winckel tanden wt dat hooft. Doe seide coninc Abroen. O ionffrouwe om dat si wel bewaert sullen sijn so wensche ic dit al in aliames lancken, twelck al so gheschiede. Doe seyde coninc abroen. O hughe ionghelinc nv hoort na mi ende ic segghe v hier openbaerlic ende voor waer dat ghi met Claramonde dye ionffrouwe geen conuersacie en hebt noch bi haer en comet om met haer enighe oncuysheyt te bedriuen eer ghijse ghetrout hebt ende dat si ghedoopt ende kersten gedaen is. Ende doet ghi dat buten minen rade ghi sulter grote scade by hebben. Doe seyde hughe Dat en moet god nemmermeer gehingen dat ic v gebot soude breken
Auteursrechtvrij