Historie van Hughe van Bordeus

¶ Hoe hughe campte teghens den grooten rijcken ende machtighen coninc Agapaert.

[fol. 43b]

ALs hughe nv alle zijn dinghen weder had dat hem genomen was, als den cop, den horen ende den halsberch dien huge aen dede ende nam sinen schilt. Ende aliames spien hem twee vergulden sporen ende die ionffrouwe Claramonde gaf hem een lancie in zijn hant ende seyde Joncheer denct om mi als ghi ons eere bewaren sult. Doe was huge blide ende hi was wel ghewapent meet eenen helm van fijnen stal ende met eenen stercken schilt. Ende doe bescreet hi zijn goede paert dat wel toe ghereet was ende hi nam oorlof aenden ammirael ende aen die ioncfrouwe seer minlic ende hi is doen ghereden te velde daer hen agapaert verwachte die groot verlangen hadde oft daer yemant teghen hem soude comen campen. Ende agapaert heeft hughen haest vernomen ende hi quam hughen tegen ghereden ende vraechde hem, heeft v die amirael hier gesonden om teghen mi te campen. Doe seyde hughe. Ja hi dyes heb god danc Als agapaert god hoorde noemen des gaf hem wonder ende seyde. Segt mi van waer sidi gheboren. Huge seyde in vrancrijcke te beurdeus ben ick kersten ghedaen ende eer ic hier quam int lant, so versloech ic te dunalster den dagayant ende desen halsberch was zijn die ic hier aen hebbe. Ende also langhe als dagayant dien hadde aen sijn lijf so en ontsach hi wapen noch swaert. Agapaert dit hoorende wert veruaert van desen woorden ende seide. So help mi mamet, dagayant was mijn broeder dien ghi op zijn slodt versloecht twelck een swaer sake is voor mi. Maer wildy mijn vrient werden ick salt v al vergheuen, so sal ons die amirael moeten sonder bedwanck opgheuen alle zijn lant, ende ick sal v ouergheuen in v ghewelt ende onde v macht alle dat

[fol. 44a]

goet, lant, ende sloten van mijnen broeder dagayant Ende ooc sculdi den chins ontfaen van minen broeder ende daer toe sal ic v mijn suster gheuen toe eenen wiue ende ghi en saecht ooc binnen uwen leuen geen ioncfrouwe so groot ende so sterck ende ooc en heeft se niet eenen tant in haren mondt hi en is wel eenen haluen voet lanck. Als hughe dit hoorde wert hi lachende ende seyde sulcke ioncfrouwen moeten verre van mi bliuen om sulcken huwelijck en quam ic niet in dit landt. Nv seyde hughe wi hebben langhe genoech onsen tijt verquist met clappen, laet ons onse saken voleynden daer wi om hier gecomen zijn. Doe seide die sarazijn agapaert O fransoys so muechdi v wel ontsien. Ende si keerden beyde haer paerden ende si quamen met sulcker cracht op malcanderen dat si beyde haer speeren braken soo dat si haer swaerden trocken. Ende huyghe vroom ende wel ghemoet als een lybaert sloech den coninc Agapaert op sinen helme van fijnen stale dattet swaert afspranck ende sloech in stucken den gouden circkel die beneden aen dat helmet stont die rijckelic verchiert was met ghesteenten daer dat vuere met dien slaghe wt spranck dat hem zijn ooren daer af songhen dat coninc Agapaert nauwelijc en wist waer hi was Mer coninc agapaert bleef onuersaecht ende hi sloech op hughen eenen slach dat man ende paert int sandt viel ende hi sloech eenen groten cant van huyghens schilt ende cloofde hughens schilt totter hant toe Dyes hem huge seer schaemde ende hy verhief hem haestelijc weder op metten paerde ende sloech so vreeslick op agapaert ende coninc agapaert weder op hem ende dese battalie duerde langhen tijt tusschen hen beyden.

[fol. 44b]

Ende claramonde lach ter vensteren ende sach dit al aen ende seyde heymelic biddende. O mogende god der kersten door die grote ootmoedicheyt dat ghi die menscheit aengenomen hebt ende wt v eewige glorie hier neder gedaelt sijt, wilt doch hughe v dienaer bewaren, dat hy hier niet verslaghen en worde, ende so waerlic als ic mijn afgoden wil laten ende v geboden onderhouden so wilt Hughe v knecht bistaen. Dese twee hebben so vreeslijck teghen malcander geuochten dat vreeslijc was om sien. Ende hughe lichte hem in den steechreep ende sloech so vreeslijck op agapaert mer hi schutte al die slaghen op sinen schilt Dit siende huge quam van besiden ende gaf agapaert eenen slach dat hi metten paerde ter aerden viel, mer tpaert spranc haestelic weder op Ende doe riep huge wacht v wel ghi Sarasijn, ende hughe quam met eenen aefschen slach ende sloech Agapaert dat hooft af. Ende terstont spranck huge vanden paerde ende greep dat hooft ende sadt weder op zijn paert ende brachtet ten palleyse daer Claramonde was, ende de ammirael quam hem tegen ende ontfinck hem met groter eeren ende seyde. O ghi fransoys veele goets so moet v ghescien ende mamet geef v prijs ende eenen hogen name, ende nv muechdi reysen als ghi wilt totten coninc Abroen ende ic sal v brieuen gheuen aen coninc karel van vrancrijcke uwen here ende ghi sulten seer grueten van mynent wegen, ende hi sal van ons chins ontfangen so lange als ghi leeft. Doen seyde Huge dye noch was onueruart. Heer amirael ic bid v swiget van sulcke woorden, want ic wil hebben daer ic om ghesonden ben van coninc karel van vrancrijcke, dats uwen baert ende v vier winckel

[fol. 45a(M)]

tanden Doe wert die amirael seer gram ende seyde tot sinen heren. Hoort doch wat dese francoys noch seyt ende wat hi begeert ic en gaue hem mijn winckel tanden niet om al coninc karels landen, ende hi seyde doe tot hugen. O ghi fransoys ghi hebt mi te seer vergramt ende v seluen veel te cort gedaen want ic en sal nemmermeer eten noch drincken ghy en sidt ghesloten in mijn gheuangenisse Als hughe dit hoorde toech hi sijn swaert ende seyde wacht v heer amirael want ic sal nv uwen baert hebben wilt god die heer, ende mettien sloech hi na den am\mirael. Doe wert vreeslic op hughen geslagen dat hi hem niet langher gheweren en conde door die groote menichte der sarasinen. Dit vernam aliames ende quam in die wapenen met gherijn ende met .x. Ridders die hugen quamen te hulpe die grote moort wrachten onder die sarasinen, mer der sarasinen quammer so veel dat si haer macht niet wederstaen en conden so vloot huge met sijn geselscap op eenen groten toren vanden casteel, ende huge nam sinen horen ende blies ende doe mosten si haer felheyt laten ende si gingen al danssen die den horen hoorden al warent heeren, knechten, vrouwen ionffrouwen Daer en was niemant hi en danste na tgheluyt van den horen ende hughe blies met so groter cracht dattet coninc Abroen hoorde te moyn daer hi lach in die sale. Ende riep tot alle die hem dienden ende seyde. Mijn heeren ende knechten hughe van bordeus is in groten last, want hi blaest seer den heren die ic hem gaf, ende god heeft hem vergheuen al sijn misdaden door de passie die hi hem vermaende met deuoter herten, daerom schelde ic hem oec quijt van alle minen euelen moede. Daerom wesche ic mi te babilonien by huyghen met .c. m. man\nen

[fol. 45b]

wel ghewapent ende te paerde, ende terstont was coninc abroen te babilonien met sijn volck. Ende huge kende terstont sijn banner metten cruce ende hi was seer verblijt ende liep nederwaert daer seer vreeslicken gheuochten waert als huge sijn blasen liet. Ende dye sarasinen verwonderden seer van waer al dat volck van wapenen comen was dat so onuersiens op hem lieden sloech soo dat si hem niet verweren en consten teghen Abroen ende sijn volc so dat si daer meest al verslaghen bleuen ende luttel vanden sarasinen ontquamen van daer.