Historie van Hughe van Bordeus

¶ Hoe die Amirael sprack met Tryakel sinen neue hem raet vraghende hoement beste metten campe maken soude ende wie dien best soude slaen.

[fol. 42a(Lij)]

ALs die amirael met agapaert ghesproken hadde ende hadde den campe aenueert so ghinc hy in zijn sale ende hi riep sinen neue triakel tot hem ende seyde, neue nv geeft mi raet, want ic hebbe eenen camp aenghenomen tegen den coninc agapaert. Als dit alyames hoorde, seyde hi lieue oom nv hoort na mi. Ic heb raet geuonden voor ons, ende voor v eere, want so mi Claramonde heeft vertelt van woorde te woorden alle die auontuere van eenen kersten, so ist een iaer leden dat hier quam een kersten messagier op Sint Jans dach die boetscap bracht van coninc karel van vrancrijck, ende hi versloech te dunalster den agayant. Ende ic heb wel so veel gehoort wildi den kersten sijn goet zijn gelt zijn gulden cop sinen horen weder gheuen, hi sal teghen hem campen.

[fol. 42b]

Als die amirael dit hoorde riep hi tot hem claramonde ende seyde, lieue dochter ghi dedet mi verstaen dat de fransoys doot was die hier quam, tis nv een iaer gheleden Claramonde seyde, lieue vader ick meende hi hadde doot gheweest van honger want in dye drie eerste daghen ende nachten en adt hi noch en dranc hy niet ende als ic sach dat hi weder bequam so was mijn herte gram dat ick v lueghenen had doen verstaen mer anders heuet hi water ende broot gegeten dat ick soude weten de waerheyt of hi te dunalster Dagoyant had verslagen Ja hi in trouwen dat is immer waer daer is nv tidinghe ghenoech af, maer laet hem nv comen, ick heb aengenomen eenen campe teghen den coninc Agapaert, ende wilt hi dien vechten ick sal hem al weder gheuen dat hem hier ghenomen is. Als dit Claramonde ende alyames hadden gehoort van den amirael, so ghingen si onder hen beyden daer si hughen vonden ende si seyden hem van den campe, daer hi seer willich toe was om vechten daer Claramonde seer blijde om was ende si ghinghen onder hen drien inder salen daer si den ammirael vonden. Als nv die amirael hughen sach seyde hi. Sijt willecome fransoys, moechdi den coninc Agapaert verwinnen in den campe ick sal v al v goet weder gheuen dat v hier ghenomen is, ende ick sal v minlijc doen gheleyden wt minen lande, ende ick sal v brieuen gheuen aen coninc karel daer ick hem seer in sal doen groeten, ende ooc sal ic hem iaerlicx gheuen van mijnen hoofde .lxx. m. gouden ducaten also langhe als ic leuen sal, ende ic salse hem senden te parijs binnen der stadt. Doen dachde hughe in hem seluen. Dat waer quaet dat karel chins ontfanghen soude dat soude mi by auontueren scha\den

[fol. 43a]

want mochte ick een kint ghewinnen aen claramonde so soudt mi mede gaen ende daer mochte noch in kerstenheyt groot profijt afcomen. Als hughe aldus stont in ghepeise so brachtmen hem sinen halsberch sinen cop ende sinen horen.