Historie van Hughe van Bordeus

¶ Hoe die donder ende blixem ende den storm der zee in stucken sloech dat schip daer hughe in was.

[fol. 47a]

ALs alle dat geselscap hadt oorlof ghenomen aen coninc Abroen die met hen lieden ghinc op de banen daer hi hen lieden elc bisonder die hant gaf. Doe gaf hi hen sijn benedixie ende is doe van hen lieden ghescheyden seer minlic, ende heeft hughen menichwerf gheauiseert ende ghewaerschuwet dat hi sijn gebodt niet en brake. Ende huge is doe van babilonien ghescheyden met die schone Claramonde ende hi is tschepe gegaen met Aliames ende met alle tgheselscap. Als hughe met al sijn geselscap nv te scepe was, so hebben si ter stont dat zeyl op getogen wanttet recht voor wint was ende het waeyde een matelick goet vaerweer, ende so sijn si van babi\lonien gescheyden ende sijn ter zee in gheuaren Ende als si nv langhe tijt in die zee hadden geuaren: so wert hughe siende op claramonde dat si seer schoon was so wert hi met liefden ontsteken op haer ende seide Och god waerom heeft mi abroen verboden dat ic met minen wiue mijnen wille niet doen en mach, och dat is mi een swaer ghebodt, mer al heeft hijt ghesworen bi sijnre crone ic sal nochtans gaen slapen by mijn wijf Ende huge seyde tot Claramonde Jonffrouwe ic bid v gaet te bedde. Die ionffrouwe antwoorde. O mijn lief coninc abroen soudes hem belghen ende hi soude gram op v werden. Neen seide hughe, ic meen wel dat ic met v gheen sonde doen en mach, want so gheringe als wi te Romen comen ende ghi gedoopt sijt dan sal ic v trouwen tot minen wiue, hierom sal ic desen nacht bi v slapen Dit verhoorde alyames hi wert seer bedroeft, dies gheliken dede gherijn ooc ende seyden tot hughen, wy bidden v door god ende door sijn moeder maria, dat ghi doch niet breken en wilt dat ghebot van coninc abroen

[fol. 47b]

oft wi moeten al daerom steruen. Doe seyde huge. O ghi heren ic weet v goeden raet dat ghi noch scade noch last van mi hebben en sult Ist sake dat ghi enigen tempeest donder, blixem en ander onweder wter zee oft wter lochte siet comen, vliet ter stont wter barcken in den boot Ende want die heren, als aliames, gherijn ende die .x. ridders hadden grote sorge so stelden si terstont den boot wt ende ginghen daer al tesamen in ende huyghe ende Claramonde ende die stuerman bleuen in die barcke, ende hy scafte ende dede met haer sinen wille. Ende terstont quam so groten onweder opter zee van winde van donre, van blixem so datter eenen groten swaren donreslach quam die de barcke in stucken sloech so dattet al verloren bleef dat hi van babilonien mede genomen had als sinen gulden cop, sinen horen, sinen halsberch, gout siluere ende ander manieren van costelicheyt ende alle haer vitalie ende noottruften dat bleef al verloren. Ende hughe ende Claramonde waren in groten last ende waren al naect ende si quamen met nauwer noot op een plancke van den schepe so dattet god ordineerde dat si aen lant quamen Ende doe waren si arm ende en hadden niet behouden des si beyde groten rouwe bedreuen ende wrongen haer handen, si clapperden haer tanden van groeten couwe Doe seyde claramonde God weet dat wi ter quader tijt hebben ghebroken Abroens ghebot, nv sullen wi beyde moeten steruen van groter couden ende catiuicheyt.