vader wilt mi doch verstaen, want twaer quaet dat ghi desen fransoys sout doen dooden, want mijn here dagayant heeft hem hier tot v geseynt, ghi en dorft niet willen om al v lant dat ghi hem hadt ghedoot, mer gheeft mi den fransoys ic sal hem stellen int prijsoen, ic sal hem water ende broot teten gheuen. Dit horende die Amirael seyde, lieue dochter uwen raet is seer goet ende is comen wt wisen verstant, mamet moet des eer hebben die v ghewracht heeft. Ende die ionffrouwe heeft hughen ghenomen ende heeften in haer camer gheleyt, ende setten hem daer op groen siden tapijtserie cleederen; ende dye schoone bloeme ghinc bi hem sitten ende seyde Jonchere met oorlof dat ic vraghe hoe is uwen naem. Hi seyde, Joncffrouwe ic heete Hughe van bourdeus, de ioncffrouwe seyde tot huge wildi mijn lief sijn ende mijn minne draghen, ghi sult daer veel mede winnen ende wildi met mi dijn minne hanteren ick sal v wederomme in kerstenrijcke doen keeren, ende al behoudelijk uwer eeren ende ghesont, al hadden si al uwen doot ghesworen die in babilonien sijn. Doe seyde hughe Jonffrouwe en wilt daer niet af spreken, want dat en sou ic niet doen om alle dat goet van uwen landen, want ghy sijt een sarasine ende ghelooft in mamet ende in ternogant, Ay lacen ick ben comen in dit verdriet om een woort dat mi ontuloech waer om ic den goeden coninc Abroen verwracht ende vertoornt hebbe. God die here moet mi helpen, want ic sorghe ick en woorde nemmermeer weder abroens vrient. ia seyde claramonde ghi hebt mi sarasine gheheeten, ende ghi hebt grotelijck misdaen ghi sult ervoor quaden loon ontfaen ende Claramonde was seer gram op Hughen ende si de\de
Auteursrechtvrij