Historie van Hughe van Bordeus

[fol. 32b]

¶ Hoe hughe inden kercker badt god den here om sijn gracie ende hulpe.

ALs hughe inden kercker sadt sonder eeten ende drincken drie daghen ende drie nachten, so dat hem dochte dat hem den honger dooden soude en wert seere clagende ende den tijt wert hem seere lanck ende hem docht dat hy noyt in meerder noot noch last en quam. Ende om dat hi van allen weerliken troost verlaten was, so riep hi aen gode van hemelrike ende badt hem ootmoedelic seggende. O almoghende god vader god sone ende god heylighe gheest een int wesen ende drie in personen so gewarich als ghi met uwer cracht gemaekt hebt hemele ende aerde, dach ende nacht ende alle creatueren elc na sijn weerdicheyt. O here also waerlic als ghi mensce sijt geworden om des menschen ontfangen van den heilighen geest, hebbende v menscheit ontfangen van dat alre suuerste bloet der glorioser maget v moeder maria als ghy in haer lichaem ruste ix. maende ende vijf dagen leuende, ende na geboren in die stadt van Bethleem in een arm huysken geleyt in die cribbe der beesten daer dat hoy v bedde was O minlike Jhesu also gewaerlic als die heylighe drie coninghen in uwer geboorten v sterre in orienten sagghen, ende si verlieten goet ende lant ende sochten v ende vonden v te Bethleem daer si v aenbaden ende offerhanden gauen daer si grote genade vercreghen ende dat licht des ghelouen aen v cleen voeten O goedertieren Jhesu also waerlijk als die onnosel kinderkens storuen om uwent wille die herodes dede doden die nv in der eewicheyt volghen dat lammeken O soete Jhesu also waerlick als ghi hier opter aerden geweest sijt .xxxiij. iaer lanc met groten arbeyt ons eerende met v minlike woorden ende sermonen daer ghi

[fol. 33a(J)]

hier dedet .xx.c. sermonen ende vaste voor ons .xl. dagen ende .xl. nachten, in welcker tijt ghi o mijn heere boghet xl.c. mael v ghebenedide knien ende badet uwen hemelschen vader voor ons sondaers O barmhertige Jesu also waerlic als ghi ons verlost hebt vander eewiger doot door v alder bitterste passie die ghi voor ons geleden hebt .viij. vren duerende, ende waert al heel verlaten van den godliken troost. Ende seyt als ghi v auontmael gehouden hadt. Mijn siel is bedroeft totter doot. Ende ghinct doen met uwen discipulen na den berch van oliueten in dat hoofken daer ghi driewerf op die aerde veelt biddende uwen hemelscen vader dat hi van v nemen wilde den kelc dijns bitteren lijdens, maer niet na uwen wil mer naden wil dijns hemelschen vaders, daer ghi o heere Jhesu openbaerlijck voorsaecht alle die pinen die v aenghedaen souden werden, so dat v edele menscelijcke natuere was ontstelt tot inden strijt der doot, so dat v edele menscheyt door vreese ende anxt der pijnen wert schuddende ende beuende ende ghi O minlijcke Jesu sweete daer water ende bloet tot .xxx.c. ende .xij. dropelen sweets ghemenghet met den bloede tot onser salicheyt, dat noyt meer gehoort en is geweest. O suete Jesu also gewaerlijcke als ghi v vianden teghen ghinct daer v Judas leuerde met een cussen inden handen der sondaren die alle achter ouervielen als ghi hem minlic vraechde wie suecti, ende si riepen Jesum van nazareth, doen ghi suetelic antwoorde Ic bent, ende gaeftse doe oorlof ende sijn op gestaen ende hebben v geuangen ende ghebonden dattet bloet wt uwen nagelen spranc daer si v in den wege sloegen in uwen hals .lxij. werf ende .xxx. mael voor uwen heyligen mont

[fol. 33b]

ende brachten v in Annas huys daer si in den wege spogen in v minlic aenschijn .xxx. mael ende .xl. mael sloegen in uwen hals ende niemant en weet o goede ihesu wat ghy den geheelen nacht voor ons in Cayphas huis geleden hebt daer .lxvi. raesheren waren die na v bloet hakeden. Ende smorgens werdi gebracht voor pylatum met .iiijc. knechten ende doe voor herodes dye v wederom sende tot pylatum als een sot. O criste ihesu so ghewarichlic als ghi v dierbaer bloet oueruloedelijc voor ons gestort hebt als v pylatus dede gheesselen daer ghi om onsen wille ontfinct .vi.c slaghen ende wert tweemael ghecroont met die scerpe doornen crone met die .lxxij. tacken als v pylatus verwees totter doot des cruycen Also waerlic als ghi gheladen ginct met dat swaer hout des crucen op v gescoorde scouder ende vielt daer mede vijf male inden wech eer ghy quaemt aenden berch van caluarien daer v die joden aen den cruyce deden slaen eerst met v minlike hande daer si op sloegen .lx. slagen ende op v heylige voeten .lxxxiij slagen, ende op uwen minliken nase metten hamere eenen slach dattet bloet daerwt vloeyde. O goede ihesu also gewarichlic als ghy drie vren lanc leuende aen den cruce hinct ende badet uwen hemelscen vader voor ons sondaren ende seydet O vader vergeuet hen want si en weten niet wat si doen Ende gaeft den moordenaer gracie ende seyde. Ic segghe v voorwaer, heden suldi met mi sijn in den paradise, ende seyt tot v bedructe moeder, wijf siet v kint. Ende seydet ooc Mijn god mijn god waerom hebdi mi ghelaten Daer ghi seyt Mi dorst, ende wert gelaeft met gal ende edic. Als ghi seyt. Nv is al veruult. Ende ghi weende aen den cruyce vijftich tranen ende riept met luyder stemmen

[fol. 34a(Jij)]

Vader in uwen handen beueel ic minen gheest ende sterft so voor ons den alre bittersten doot. O naecte bloedighe ghecruyste Jhesu also gewaerlic als longinus v heylighe side opende ende v hert doorstac daer wt liep water ende bloet in verghiffenisse van onse sonden. Ende wert begrauen in een nieu graf ende daelde ter hellen verlossende die heylighe oude vaders ende die heylighe vrouwen ende bondet lucifer totten wtersten daghe. Ende also waerlic als ghi verreest aen den derden daghe vander doot ende ghi verthoonde v ghebenedide moeder maria ende den anderen Ende opten .xl dach clomdi ten hemel met al den salighen sielen door v eyghen cracht, ende sondet neder den .l. daghe den heylighen gheest. O alder rechueerdichste here ihesu criste also gewarich als ghi comen sult ten wtersten daghe ordelen leuende ende doode, also gewarich als ghy susanna verloste van den valschen rechters, also gewarich als ghi den propheet Daniel verloste vanden hongerigen leuwen also gewarich als ghi den propheet Jonam be\waerde inden buyck van den waluisch ende dedet hem ghesont te lande comen. O alre minlicste ihesu, also ghewarich als ghy dit al ghedaen hebt ende so veel voor ons gheleden hebt, soo bid ic nv v arme dienaer, door al die weldaden die ghy ons bewesen ende door al dat liden dat ghi voor ons gheleden hebt, dat ghi mi wilt verlossen vander doot ende laten mi met ghesontheyt ende met eeren weder keeren in vrancrike ende vercrighen die vrientscap mijns heeren, door v hulpe o Jhesu criste Amen.